Faifakamoʻoni ʻAki ʻa e ʻUlungaanga Lelei

¹ ʻI he sōsaieti fakangofua tavale ʻo e ʻaho ní, ko e toʻutupu tokolahi ʻoku nau fakamoleki noaʻia ʻenau moʻuí he faitoʻo kona tapú, ʻulungaanga taʻetāú, angatuʻú, mo e fakamālohí. ʻI hono kehe ʻaupitó, ko e ʻulungaanga alafaʻifaʻitakiʻanga ʻo e toʻutupu lelei ʻi he fakatahaʻanga Kalisitiané ʻoku fakaongoʻimālohi ke fai ha vakai ki ai pea ʻoku moʻoni ko ha meʻa fakaʻofoʻofa ia kia Sihova. ʻOku hoko ia ko ha fakamoʻoni mālohi ke tohoakiʻi mai nai ai ʻa e niʻihi kehé ki he moʻoní.​—1 Pita 2:12.

² ʻOku hā mei he ngaahi meʻa naʻe hoko lahí ko e ʻulungaanga lelei ʻo e kau talavou Kalisitiané kuo ʻi ai ʻene maongo tonu ki he kau mamata maí. ʻI he talanoa ʻo kau ki ha Fakamoʻoni kei siʻi ʻa ia ko ʻene tokotaha ako, naʻe tala ange ʻe ha faiako ki he kalasí fakakātoa ko e ʻOtua ʻo e kiʻi taʻahine ko ʻení, ʻa Sihova, ko e ʻOtua moʻoní ia. Naʻá ne leaʻaki ʻa e meʻá ni koeʻuhí he ko e ʻulungaanga ʻo e kiʻi taʻahiné ʻoku anga-fakaʻapaʻapa maʻu pē. Ko ha faiako ʻe taha naʻá ne tohi ki he Sōsaietí, ʻo pehē: “Te u saiʻia ke fakaongoongoleleiʻi atu kimoutolu koeʻuhi ko e toʻutupu lelei ʻoku mou maʻu ʻi hoʻomou lotú. . . . Ko hoʻomou kau talavoú ko ha faʻifaʻitakiʻanga moʻoni. ʻOku nau fakaʻapaʻapaʻi ʻenau kau taʻumotuʻá, ʻoku nau anga-ʻaʻapa, pea ʻoku fakanānā honau valá. Pea he ʻilo moʻoni ē ko kinautolu ki heʻenau Tohitapú! Ko hono moʻoní ko e lotú ia!”

³ Naʻe maongo ki ha faiako ʻe taha ʻa e ʻulungaanga lelei ʻo ha Fakamoʻoni taʻu fitu ʻi heʻene kalasí. Naʻe tohoaki ia ʻe he ʻulungaanga anga-vaivai mo anga-ʻofa ʻa e kiʻi tamasiʻí, ʻa ia naʻe ʻai ai ia ke ne makehe atu ʻaupito mei he tamaiki tangata kehé. Naʻe maongo kiate ia ʻa e fakamātoato ʻene fakakaukaú ki heʻene ngaahi tui fakalotú​—naʻe ʻikai mā ke ʻai ia ke ne kehe koeʻuhi ko e meʻa ʻokú ne tui ki aí. Naʻe lava ke sio ʻa e faiakó ko e konisēnisi ʻo e kiʻi tamá kuo akoʻi pea naʻá ne malava ai “ke sivi ʻa e lelei mo e kovi.” (Hep. 5:14) Faifai atu pē, naʻe ʻaʻahi ange ʻa e faʻē ʻa e tamasiʻí ki he faiakó, pea naʻe kamata ha ako Tohitapu. ʻI he faai atu ʻa e taimí, naʻe papitaiso ʻa e faiakó pea ki muí ni mai naʻá ne hoko ko ha tāimuʻa tuʻumaʻu!

⁴ Ko ha kiʻi tangata kei talavou ʻe taha naʻe tākiekina ia ʻe he ʻulungaanga lelei ʻo ha Fakamoʻoni ʻi hono ʻapiakó. Naʻá ne kehe moʻoni​—mātuʻaki anga-ʻaʻapa, faʻa ako, pea anga-fakanānā maʻu pē hono valá; ʻikai ko ia pē, naʻe ʻikai hangē ko e tamaiki fefine kehé, naʻe ʻikai ʻaupito te ne fakamalinga kākā mo e tamaiki tangatá. Naʻe malava ʻa e kiʻi tangatá ke ne sio naʻe moʻuiʻaki ʻe he kiʻi taʻahiné ʻa e ngaahi tefitoʻi moʻoni ʻo e Tohitapú. Naʻe ʻeke ange ʻe he kiʻi tangata talavoú kiate ia ʻa e ngaahi fehuʻi fekauʻaki mo ʻene ngaahi tui fakalotú pea naʻe maongo kiate ia ʻa e meʻa naʻá ne akó. Naʻe kamata ke ne ako, ʻo ne papitaiso, pea faai atu ʻo ne kau ʻi he ngāue fakafaifekau tāimuʻá pea ngāue ʻi Pēteli.

⁵ Kapau ko ha Kalisitiane kei siʻi koe ʻokú ke holi ke fai ha fakamoʻoni lelei ki he niʻihi kehé, tokanga ki ho ʻulungāngá ʻi he tafaʻaki kotoa pē. ʻOua te ke fakavaivai ʻaki haʻo hoko ʻo saiʻia ʻi he ngaahi ʻulungaanga fakangofua tavale ʻo e māmaní, ngaahi fakakaukaú, pe founga moʻuí. Fokotuʻu ha faʻifaʻitakiʻanga māʻolunga ʻi hoʻo leá, valá, pea mo e teuteú, ʻo ʻikai ʻi he lolotonga pē ʻo e kau ki he ngāue fakamalangá mo e ʻi he ngaahi fakataha ʻa e fakatahaʻangá kae toe pehē foki ʻi he lolotonga ʻa e ʻi he ʻapiakó pea ʻi he taimi ʻoku fai ai ha fakafiefia. (1 Tim. 4:12) Te ke maʻu ʻa e fiefia moʻoní ʻi he taimi ʻoku mahuʻingaʻia ai ha taha ʻi he moʻoní koeʻuhí ko hoʻo ʻai ke ‘ulo atu hoʻo māmá’ ʻo fakafou ʻi ho ʻulungaanga leleí.​—Mt. 5:16.