Ko ha ʻAʻahi ʻOku Lava ke Hoko ko ha Tāpuaki
1 Naʻe fiefia ʻa Sākeasi ʻi hono maʻu ʻa Sīsū ko ha tokotaha ʻaʻahi ki hono ʻapí. Pea ko ha tāpuaki lahi ē naʻe hoko ʻi he ʻaʻahi ko iá!—Luke 19:2-9.
2 ʻI he ʻahó ni, ʻi he tuʻunga ko e ʻUlu ʻo e fakatahaʻangá, ʻoku tataki ai ʻe Sīsū Kalaisi ʻa e kau mātuʻá ke “tauhi ʻa e fanga sipi ʻa e ʻOtua.” (1 Pita 5:2, 3; Sione 21:15-17) Tānaki atu ki he faiako ʻi he ngaahi fakatahá pea takimuʻa ʻi he malaʻe malangá, ko e kau ʻovasia ʻo e fakatahaʻangá ʻoku nau tokonaki ʻa e tokoni anga-ʻofa, mo fakafoʻituitui ki he kau mēmipa tāutaha ʻi he fakatahaʻangá. Kae kehe, mei he taimi ki he taimi, ʻokú ke fakatuʻamelie atu nai ke maʻu ha tokanga fakafoʻituitui mei he kau mātuʻá, ʻi ho ʻapí, pe ʻi he Fale Fakatahaʻangá, ʻi he lolotonga ʻa e ngāue fakataha ʻi he malaʻe malangá, pe ko ha ngaahi tuʻunga kehe. ʻOku totonu ke ke ongoʻi manavasiʻi fekauʻaki mo e ngaahi ʻaʻahi ʻa e kau mātuʻá? ʻIkai ʻaupito. Ko ʻenau ʻaʻahi atu kiate koé ʻoku ʻikai ʻuhinga iá ʻokú ke tōnounou ʻi ha founga. Ko e hā leva ʻa e taumuʻa ʻo ha ʻaʻahi fakatauhisipi?
3 Naʻe pehē ʻe Paula ʻokú ne fiemaʻu ke ʻaʻahi ki he ngaahi tokouá ‘ʻo vakai pe naʻa nau fēfē.’ (Ngāue 15:36) ʻIo, ʻi he tuʻunga ko e kau tauhi-sipi anga-ʻofá, ʻoku fuʻu mahuʻingaʻia ʻaupito ʻa e kau mātuʻá ʻi he tuʻunga ʻokú ke ʻi aí. ʻOku nau saiʻia ke ʻoatu ha tokoni fakalaumālie ʻe ʻaonga nai pea fakatupu langa hake kiate koe. Ko ha tokanga pehē ko e meʻa ia ʻoku loto ʻa hotau Tauhi-sipi anga-ʻofa ko Sihová ke maʻu ʻe he tokotaha taki taha ʻo kitautolu.—Isi. 34:11.
4 Talitali Lelei ʻa e ʻAʻahi ʻa e Kau Mātuʻá: Ko e taumuʻa ʻa Paula ʻi heʻene ʻaʻahi ki hono ngaahi tokouá ke ‘feʻiloaki mo kinautolu; koeʻuhi ke ne ʻatu haʻanau meʻi kelesi fakalaumalie, heiʻilo ʻe poupou ai kinautolu, ke ai haʻanau fetokoniʻaki.’ (Loma 1:11, 12) ʻOku fiemaʻu kiate kitautolu kotoa ʻa e fakalototoʻa fakalaumālie ʻi he ngaahi ʻaho fakaʻosi faingataʻa ko ʻení, pea ʻoku fiemaʻu kiate kitautolu ʻa e tokoni ke hokohoko atu ʻetau tuʻumaʻu ʻi he tuí. Ko hoʻo tali pau ki ha ʻaʻahi fakatauhisipi ʻe ʻikai ha veiveiua ʻe iku ia ko ha fefakalototoʻaʻaki lelei.
5 Houngaʻia ʻi he ngaahi ʻaonga lahi ʻoku maʻu mei he ngāue fakatauhisipi ʻa e kau mātuʻá. Kapau ʻoku ʻi ai ha meʻa ʻe niʻihi pe ko ha fehuʻi fekauʻaki mo ha meʻa ʻokú ke tokanga ki ai, manatuʻi ko e ʻi ai ʻa e kau mātuʻa ʻi he fakatahaʻangá ke tokoni. ʻOua ʻe toumoua ke pōtalanoa mo kinautolu ki ha faʻahinga meʻa ʻokú ne uesia nai hoʻo tuʻunga moʻui lelei fakalaumālié. Houngaʻia ʻi he fokotuʻutuʻu anga-ʻofa meia Sihová, pea fiefia ʻi he ngaahi tāpuaki ʻoku lava ke ʻomai ʻe ha ʻaʻahi pehē.