ʻOku Fiemaʻu ʻe Hotau Ngaahi Kaungāʻapí ke Fanongo ki he Ongoongo Leleí
1 Ko e finangalo ia ʻo e ʻOtuá “ke maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.” (1 Tim. 2:4) ʻE fakakau atu ki he “kakai kotoa pe” ʻa e kotoa ʻo hotau ngaahi kaungāʻapí. Ke aʻu kiate kinautolu mo e ongoongo leleí ʻoku fiemaʻu ke tau hoko ʻo alaisia-alaikolonga ʻi heʻetau ngaahi tuʻuakí mo tokanga fekauʻaki mo e meʻa nai ʻoku mahuʻingaʻia ai ʻa e tokotaha taki taha ʻoku tau fetaulakí. (1 Kol. 9:19-23) Kuo tokonaki mai ʻe he kautaha ʻa Sihová ʻa e ngaahi meʻangāue ʻa ia ʻe lava ke ne tokoniʻi kitautolu ke aʻu ai ki he loto ʻo e faʻahinga ko ia ʻoku nau “hehema totonu ki he moʻui taʻengatá.” (Ng. 13:48, NW) Tau sio angé ki he founga ʻoku lava ai ke tau ngāueʻaki ha ngaahi polosiua kehekehe he lolotonga ʻo Siulai mo ʻAokosí ke tokangaʻiʻaki ʻa e ngaahi fiemaʻu fakalaumālie ʻa hotau ngaahi kaungāʻapí.
2 Tuʻuaki ʻo e Ngaahi Polosiuá: Ko e fakahokohoko ʻi laló te ke maʻu ai ha ngaahi fokotuʻu ʻa ia ʻe ʻaonga nai ʻi hono tuʻuaki ha ngaahi polosiua pau. ʻOku kau ʻi he fokotuʻu taki taha (1) ha fehuʻi fakatupunga fakakaukau ke kamata ha fetalanoaʻaki, (2) ha maʻuʻanga fakamatala ʻa ia ʻe lava ke maʻu ai ha ngaahi poini fakafetalanoaʻaki ʻi he polosiuá, pea (3) ko ha konga Tohitapu feʻungamālie ʻa ia ʻe lava ke lau ʻi he lolotonga ʻo e fetalanoaʻakí. ʻE lava ke ke toki fakamatalaʻi ʻa e toenga ʻo hoʻo tuʻuakí ʻaki hoʻo ngaahi lea pē ʻaʻau, ʻo fakatatau ki he tali ʻa e tokotahá. Ki he lahi taha ʻo e ngaahi polosiuá, ko e lau ʻi he tatau ki muʻa ʻo ʻEtau Ngāue Fakafaifekau ʻo e Puleʻanga te ke maʻu ai ha fakaikiiki lahi ange ʻo e tuʻuaki ki he polosiuá.
Moʻui Fiefia ʻI He Mamani ʻO Taʻengata!
Kuó ke fifili pe ko e hā ʻa e meʻa ʻa Sīsū ʻoku fai he taimi ní?—Fakatātā 41-42; Fkh. 11:15; km 8/96 p. 8.
Ko e Puleʻanga Te ne ʻOmai ʻA e Palataisi.
Te ke saiʻia ke ʻilo fekauʻaki mo e Puleʻanga ko ia naʻe akoʻi mai ʻe Sīsū ke tau lotuʻakí?—Peesi 3; Mt. 6:9, 10; km 8/96 p. 8.
ʻI he Mate ha Taha ʻOkú Ke ʻOfa Ai.
Kuó ke fifili ki he founga ke fakafiemālieʻi ai ha tokotaha ʻa ia kuo mole ha taha ʻi he maté naʻe ʻofa ai?—Peesi 26, palakalafi 2-5; Sione 5:28, 29; km 7/97 p. 4.
ʻOku Totonu Ke Ke Tui ki he Tolu-tahaʻi-ʻotua?
ʻOku mahuʻinga ki hotau kahaʻú ʻa ʻetau mahino fekauʻaki mo e anga moʻoni ʻo e ʻOtuá?—Peesi 3, palakalafi 3, 7-8; Sione 17:3.
3 Ngaahi Polosiua Kehe: ʻOku fakahokohoko ʻi he fakalahi ʻo ʻEtau Ngāue Fakafaifekau ʻo e Puleʻanga ʻo Fepueli 1998 ʻa e ngaahi tohi kehe, kau atu ki ai ʻa e ngaahi polosiua, ʻa ia ʻoku faʻu makehe ke ngāueʻaki ʻi he faifakamoʻoni ki he kau lotu-Puta, kau lotu-Hinitū, kau Siu, mo e kau Mosilemi. Kapau ʻoku feʻungamālie, ko e ngaahi polosiua ko ʻení ʻe lava ke tuʻuaki nai ki he kakai ʻoku tau fetaulakí. ʻE lava ke ke fakamanatu ʻa e ngaahi fokotuʻu ʻi he peesi 4-6 ʻo e fakalahi ko iá fakataha mo e peesi 21-24 ʻi he tohi Reasoning pea faʻu ha ngaahi tuʻuaki nounou ʻe langaʻi nai ai ʻa e mahuʻingaʻia ʻa e kakai ko ʻení.
4 Ko ha polosiua ʻe taha kuo teuteu ia ke tokoniʻi ʻa e kakai ʻoku nau ako lelei nai ka ʻoku siʻi ʻenau ʻilo fekauʻaki mo e Tohitapú. ʻOku faʻu ia ke ueʻi kinautolu ke nau fiemaʻu ke sio ki he Folofola ʻa e ʻOtuá. ʻI Tongá ni, tokolahi taha ʻa e kakai ako leleí ʻoku nau ʻilo lelei ki he lea faka-Pilitāniá. Ko ia, kapau ʻoku feʻungamālie, te ke fili nai ke tuʻuaki ʻa ia ʻoku hoko haké:
A Book for All People.
Te ke loto-tatau ko hono maʻu ko ia ʻo e ako lelei angé ʻoku kau atu ki ai ʻa hono maʻu ʻo e ʻilo ʻe niʻihi ki he meʻa ʻoku ʻi he Tohitapú?—Peesi 3, palakalafi 1-3 mo e peesi 30, palakalafi 2, Koh. 12:9, 10.
5 Polosiua Ako Tohitapu: Ko ʻetau taumuʻa ʻi he ngāue fakafaifekaú ʻoku totonu maʻu pē ke kamata ha ako Tohitapu, pe ʻi he ʻuluaki ʻaʻahí pe ʻi ha toe ʻaʻahi ʻamui ange. Ki he tafaʻaki ko iá, ʻoku tau maʻu ha polosiua faingofua-ke-ako hoko haké ke kamata pe ko hono fai ha ngaahi ako Tohitapu ʻi ʻapi:
Ko e Hā ʻOku Fiemaʻu ʻe he ʻOtuá Meiate Kitautolú?
Naʻá ke ʻiloʻi ko e miniti pē ʻe 30 pe siʻi ange ʻi he uike taki taha ʻi he uike ʻe 16, te ke lava ai ke maʻu ha mahino tefito fekauʻaki mo e Tohitapú?—Lēsoni 2, palakalafi 6; 2 Tim. 3:16, 17; km 3/97 p. 4.
6 ʻI he fakatātā ʻo e Samēlia anga-fakakaungāʻapí, naʻe ʻai ai ʻe Sīsū ke hā mahino ko e kaungāʻapi moʻoní ko e tokotaha ʻoku ʻofa mo anga-ʻofa ke tokoniʻi ha taha ʻi he taimi faingataʻá. (Luke 10:27-37) Ko hotau ngaahi kaungāʻapí ʻoku nau faingataʻaʻia fakalaumālie. ʻOku nau fiemaʻu ke fanongo ki he ongoongo leleí. ʻAi ke tau fefuaʻaki ʻa e fatongia ke vahevahe atu ia kiate kinautolu, pea fakamoʻoniʻi ai kitautolu ko e kau ākonga moʻoni ʻa Sīsū Kalaisi.—Mt. 24:14; Kal. 5:14.