Ngāueʻaki ha Ngaahi Polosiua Kehekehe ʻi Hoʻo Ngāue Fakafaifekaú
1 ʻOku fakamānako ki he kakai ʻo e ʻaho ní ʻa e kehekehe ʻi he ngaahi tuʻunga-leá. ʻI hoʻo kau ko ia ʻi he ngāue fakamalangá ʻi he lolotonga ʻo Siulaí, ʻe malava ke ke ʻalu mo ha ngaahi polosiua kehekehe, ʻo ngāueʻaki ai ha foʻi taha pau ʻa ia ʻe hā fakatupu tokanga ki he kakai ʻi he kauhalá. Mahalo te ke saiʻia ke ʻahiʻahiʻi ha taha ʻo e ngaahi tuʻuakí ni:
2 ʻI hono tuʻuaki ʻo e polosiua “Ko e Puleʻanga Te ne ʻOmai ʻA e Palataisi,” te ke malava ʻo ʻeke:
◼ “ʻOkú ke fakakaukau ʻe fēfē ʻa e māmaní kapau ko e ʻOtuá tokotaha pē naʻe pulé? [Tuku ke ne tali.] Ko e meʻa tofu pē ia ʻoku tau kole ki aí ke fetongi ʻe he ʻOtuá ʻa e tuʻunga-pule ʻi he māmaní ʻi heʻetau lotuʻaki ʻa e Lotu ʻa e ʻEikí, pe ko ʻEtau Tamaí, ʻa ia naʻe akoʻi ʻe Sīsū Kalaisi kiate kitautolú. [Huke ki he peesi 3, pea lau ʻa e ʻuluaki palakalafí, ʻa ia ʻoku hiki ai ʻa e Mātiu 6:10.] Kapau te ke saiʻia ke moʻui ʻi ha māmani hangē ko iá, ʻoku totonu ke ke lau ʻa e polosiuá ni.” Tuʻuaki ke tuku ia.
3 “ʻI he Mate ha Taha ʻOkú Ke ʻOfa Ai” ʻe malava ke tuʻuaki ia ʻi he founga ko ʻení:
◼ “ʻOkú ke fakakaukau ʻe toe hoko mai nai ha ʻaho ʻa ia heʻikai ʻi ai ha taha ʻo kitautolu ʻe toe mole ha taha ʻokú ne ʻofa ai ʻi he maté? [Tuku ke ne tali.] Ko e polosiua kuo fakaʻofoʻofa hono hiki ko ʻení kuó ne fakafiemālieʻi ʻa e laui miliona ʻaki ʻa e talaʻofa papau ʻi he Tohitapú ki ha ʻaho pehē ʻa ia ʻoku vavé ni ʻene hoko mai ʻi he kahaʻú. [Huke ki he peesi 5, pea lau ʻa e palakalafi hono nimá, ʻo kau ai ʻa e 1 Kolinitō 15:21, 22. Hili ia pea huke leva ki he fakatātā ʻi he peesi 30.] Kuo hanga ʻe he tokotaha ʻaatí heni ʻo fakahaaʻi ʻa e fiefia ʻe lava nai ke tau aʻusiá ʻi hono talitali lelei mai ʻa hotau ngaahi ʻofaʻanga kuo maté ʻi he toetuʻú. Ka ʻe fai nai ʻi fē ʻa e meʻa fakafiefia ko ʻení? ʻE fakahā atu kiate koe ʻe he polosiuá ni ʻa e tali mei he Tohitapú ki he fehuʻi ko iá.” Kapau ʻe tali ʻa e polosiuá, te ke toe hoko atu nai: “Te u saiʻia ke u toe foki mai ʻamui pea fetalanoaʻaki lahi ange ai ki he kaveingá ni.”
4 Te ke tuʻuaki nai ʻa e polosiua “Vakai! ʻOku Ou Fakafoʻou ʻa e Meʻa Kotoa Pe,” ʻo ngāueʻaki ʻa e fakaofiofi fakahangatonu ko ʻení ke kamata ha ako Tohitapu:
◼ “ʻOku tokolahi ʻa e kakai ʻoku ʻi ai ʻenau ngaahi fehuʻi ʻo kau ki he Tohitapú. Pau pē kuó ke faʻa fifili ʻo fekauʻaki mo ha tali ki he taha ʻo e ngaahi meʻá ni. [Fakaava ki he peesi 30.] Ko e foʻi fehuʻi fakamuimui ko ʻení kuó ne fakalanga ʻa e mahuʻingaʻia ʻa e tokolahi: ‘ʻE fēfē nai ʻa hoʻo teuteu ki he moʻui taʻengata ʻi he palataisí?’” Kapau te ke fetalanoaʻaki ʻi he palakalafi 57-58 ʻi he peesi 29-30 pea lau ʻa e Fakahā 21:3, 4, te ke fakatoka leva ai ha makatuʻunga ki ha ako Tohitapu. Fakaʻosi ʻaki ʻa hono tuku ʻa e polosiuá pea fokotuʻutuʻu ki ha toe ʻaʻahi ʻa ia ʻe malava ai ke ke fetalanoaʻaki ʻi he niʻihi ʻo e ngaahi fehuʻi kehé.
5 Ke ngāueʻaki ʻa e ngaahi polosiua lelei kehekehe peheé, ko e moʻoni ʻoku tau mateuteu lelei ai “ke ʻalu mo e ongoongolelei ki he masiva.”—ʻAi. 61:1.