Faʻifaʻitaki kia Sihova ʻAki ʻa e Tokanga Moʻoni ki he Niʻihi Kehé
1 Ko Sihová ko e faʻifaʻitakiʻanga lahi taha ia ʻo e toko taha ʻokú ne fakahā ʻa e tokanga moʻoni ki he niʻihi kehé. ʻI hono tuʻunga ko e Hau Fakalevelevá, ʻokú ne mātuʻaki tokanga ki he ngaahi fiemaʻu ʻa ʻene fakatupu ko e faʻahinga ʻo e tangatá. (1 Pita 5:7) Naʻe fakalototoʻaʻi ʻe Sīsū ʻa hono kau muimuí ke nau fakahāhā ʻa e ngaahi ʻulungaanga ʻo ʻene Tamaí, ʻa ia ʻokú ne fakaulo ʻa e laʻaá mo fakatō ʻa e ʻuhá ki he kakai māʻoniʻoní mo e taʻemāʻoniʻoní. (Mt. 5:45) ʻE lava ke ke faʻifaʻitaki kia Sihova ʻaki hono fakahā ʻa e tokanga moʻoni ki he niʻihi kehé—ʻo mateuteu ke ʻoatu ʻa e pōpoaki ʻo e Puleʻangá ki he tokotaha kotoa pē te ke fetaulaki mo iá. ʻI he hoko ʻo alāanga kakato mo e ngaahi polosiua ko ia ʻe ngāueʻaki ʻi he ngāue fakafaifekaú he lolotonga ʻo Siulaí, te ke ʻi ha tuʻunga lelei ai ke ʻoatu ha tokoni fakalaumālie ki he niʻihi kehé. Ko e ngaahi fokotuʻu hoko haké ʻoku ʻoatu ai ʻa e ngaahi fakakaukau ʻe niʻihi ki he founga te ke teuteu nai ai ki he ʻuluaki ʻaʻahí pea toe foki ki he mahuʻingaʻiá ʻi he ngaahi toe ʻaʻahi taimi totonu.
2 ʻI hono tuʻuaki ʻa e polosiua “Vakai! ʻOku Ou Fakafoʻou ʻa e Meʻa Kotoa Pe” ʻe lava ke ke pehē:
◼ “Kuó ke fifili pe ko e hā ʻoku fakangofua ai ʻe he ʻOtuá ʻa e faʻahinga ʻo e tangatá ke nau faingataʻaʻia kapau ʻokú ne tokanga moʻoni mai ʻo fekauʻaki mo kinautolu? [Tuku ke ne tali.] Ko e polosiua ko ʻení ʻoku ʻikai ngata pē ʻi heʻene tokonaki ʻa e tali fakafiemālie ki he fehuʻí ni ka ʻokú ne fakahā mai foki kuo talaʻofa ʻe he ʻOtuá te ne toʻo atu kotoa ʻa e maumau kuo fai ʻe he tangatá kiate iá mo hono ʻapi fakamāmaní.” Lau ʻa e palakalafi 28 mo e 29 ʻi he peesi 15. Fakahā ʻa e fakatātā ʻi he takafi ʻi muʻá, pea lau ʻa e Fakahā 21:3, 4 mei he palakalafi 57. Tuʻuaki ʻa e polosiuá. Kapau ʻe tali lelei ia, ʻeke ha fehuʻi ʻe lava ke tali ia ʻi he ʻaʻahi hoko maí, ʻo hangē ko e: “Te ke saiʻia ke ʻilo ʻa e founga ʻe fakahoko ai ʻe he ʻOtuá ʻene taumuʻa ko hono ʻomai ʻa e ngaahi tāpuaki ki he faʻahinga ʻo e tangatá pea liliu ʻa e māmaní ko ha palataisi?” Fakapapauʻi ke lave ki heʻetau ngāue ko ia ʻi māmani lahí ʻoku poupouʻi ʻaki ʻa e ngaahi tokoni loto-fiefoakí.
3 ʻI he toe foki ki he faʻahinga ko ia naʻá ke tuku ai ʻa e polosiua “Vakai! ʻOku Ou Fakafoʻou ʻa e Meʻa Kotoa Pe” te ke lava nai ke fai ha fetalanoaʻaki kehe ʻo kamataʻaki ʻa e foungá ni:
◼ “ʻI heʻeku ʻaʻahi fakamuimui maí, naʻá ta lave ai ʻo pehē ʻoku tokanga moʻoni mai ʻa e ʻOtuá kiate kitautolu pea ko ʻene taumuʻá ia ke toʻo atu kotoa ʻa e maumau kuo fai ʻe he tangatá kiate ia pē mo hono ʻapi fakamāmaní.” Fakaava ʻa e polosiuá ki he peesi 26 peá ke pehē: “Naʻe fakangata ʻeta fetalanoaʻakí ʻaki ʻa e fehuʻi, Ko e hā ʻa e founga ʻe fakahoko ai ʻe he ʻOtuá ʻa ʻene taumuʻa ko hono ʻomai ʻa e ngaahi tāpuaki ki he faʻahinga ʻo e tangatá pea liliu ʻa e māmaní ko ha palataisi? Ko e hā hoʻo fakakaukaú?” Tuku ke ne tali. Lau ʻa e palakalafi 50 mo e Fakahā 16:16. Hili iá, lau ʻa e palakalafi 52 ʻi he peesi 27. ʻEke ange ki he tokotaha-ʻapí pe te ne saiʻia ke mo lave fakataha ki he palakalafi 1-4 ʻo e polosiuá. Kapau te ne loto ki ai, mo ako fakataha ia.
4 Ko ha fakaofiofi ʻeni ʻe lava ke ke ngāueʻaki nai ʻi hono tuʻuaki ʻa e polosiua “ʻI he Mate ha Taha ʻOkú Ke ʻOfa Ai.” Fakahā ange hono takafí peá ke pehē:
◼ “ʻI he ʻahó ni ʻoku mau ʻoatu ʻa e polosiuá ni ʻa ia ʻokú ne ʻomai ʻa e fakafiemālie mo e ʻamanaki ki he laui miliona ʻo e kakai kuo mole honau ngaahi ʻofaʻanga ʻi he maté. Kuó ke fifili pe ko e hā ʻa e ʻamanaki ʻoku ʻi ai ki he maté? [Tuku ke ne tali.] ʻOku fakahā mahino ʻe he Tohitapú ʻa e talaʻofa ʻa e ʻOtuá ki ha toetuʻu.” Lau ʻa e Sione 5:28, 29. Fakaava ʻa e polosiuá pea fakamatalaʻi ʻa e ngaahi poini ʻoku ʻomai ʻi he palakalafi fakamuimui ʻi he peesi 28 pea mo e ʻuluaki palakalafi ʻi he peesi 31. Fakahā ʻa e ngaahi fakatātā ʻoku nau fekauʻakí. Tuʻuaki ʻa e polosiuá. ʻE lava ke ke teuteu ha founga ki ha toe ʻaʻahi ʻaki hoʻo ʻeke ange, “ʻE lava fēfē ke tau fakapapauʻi ʻe faai atu ʻa e maté ʻo fakangata fakaʻaufuli?”
5 Ko ha feituʻu pē naʻá ke tuku ai ʻa e polosiua “ʻI he Mate ha Taha ʻOkú Ke ʻOfa Ai,” te ke saiʻia nai ke ngāueʻaki ʻa e tuʻuakí ni ʻi he toe ʻaʻahí:
◼ “ʻI heʻeta talanoa ki muʻá, naʻá ta talanoa ai ki he ʻamanaki ʻo e toetuʻú. Ko e polosiua naʻá ku tuku atu kiate koé ʻoku fakamatala ai ki he ʻuhinga ʻe lava ke tau fakapapauʻi ai ʻe faai atu ʻa e maté ʻo fakangata fakaʻaufuli. ʻIkai ʻokú ke ʻilo ko e ngaahi talaʻofa ʻa e ʻOtuá ʻoku fakafiemālie mo fakalotomaʻu?” Tuku ke ne tali. Pea huke ki he peesi 31 ʻi he polosiuá, pea lau ʻa e palakalafi hono uá mo hono tolú, fakataha mo e Fakahā 21:1-4. Fakaeʻa ʻa e ʻamanaki ʻoku tau maʻú ko e moʻui fiefia ʻo ʻikai toe mate. Fakatuʻunga ʻi he mahuʻingaʻia ʻoku hā maí mo e ngaahi tuʻunga lolotongá, te ke tuʻuaki nai ha ako Tohitapu ʻi he tohi ko e ʻIlo pe ko e ʻeke ha fehuʻi ʻe taha ke ʻi ai ai ha founga ki he toe ʻaʻahi hono hokó.
6 ʻE lava ke ke leaʻaki nai ʻa e meʻá ni ʻi hono fakaʻaliʻali ʻa e polosiua “Moʻui Fiefia ʻI He Mamani ʻO Taʻengata!”:
◼ “Ko e kakai tokolahi kuo nau fifili pe ko e hā ʻa e taumuʻa ʻo e moʻuí. ʻOku nau ʻeke hifo kiate kinautolu: ‘Ko e hā ʻoku ou ʻi heni aí? Ko ʻeku ʻalú ki fē? Ko e hā ʻoku tuku tauhi mai ʻe he kahaʻú maʻakú?’ Ko fē ʻokú ke fakakaukau ʻe lava ke tau maʻu mei ai ʻa e talí? [Tuku ke ne tali.] Fakatokangaʻi ʻa e meʻa ʻoku leaʻaki ʻe he Tohitapú ʻo kau ki he kahaʻú. [Lau Sāme 37:11, 29.] ʻIkai ʻoku ʻuhinga lelei ke fakaʻosiʻaki ko e Tokotaha-Fakatupu ʻo e tangatá ʻoku ʻi he tuʻunga lelei taha ke ne fakamatalaʻi pe ko e hā ʻe hoko ʻi he kahaʻú? [Tuku ke ne tali.] Ko e polosiuá ni ʻokú ne fakahā ʻa e taumuʻa maʻongoʻonga kuo tuku tauhi ʻe he ʻOtuá maʻatautolu.” Huke ki he fakatātā 47-49, lau ʻa e ngaahi fakamatala ʻo e fakatātaá, pea lave ki he ngaahi fakatātaá; tuʻuaki leva ʻa e polosiuá. Kapau ʻe tali, ʻeke ange: “ʻE anga-fēfē hono ʻomai ʻe he ʻOtuá ʻa e Palataisí ki he māmaní?” Fakamatalaʻi ʻa e fokotuʻutuʻu ki hono fai ʻa e tokoní. Fokotuʻu ha taimi ke toe foki.
7 Kapau ko e polosiua “Moʻui Fiefia ʻI He Mamani ʻO Taʻengata!” ʻoku tukú, ʻe lava ke ke leaʻaki ha meʻa hangē ko ʻení ʻi hoʻo toe fokí:
◼ “ʻI heʻeku ʻaʻahi mai ki muʻá, naʻá ku fiefia ʻaupito ʻi heʻeta fetalanoaʻaki ki he vakai ʻa e Tohitapú ko e moʻui ʻa e faʻahinga ʻo e tangatá ʻoku ʻi ai hano taumuʻa.” Fakahā ʻa e fakatātā ʻi he takafí pea ʻeke ange: “ʻE anga-fēfē hono ʻomai ʻe he ʻOtuá ʻa e Palataisí ki he māmaní?” Lau ʻa e fakamatala ʻo e fakatātā 41-45. Fetalanoaʻaki ki he ngaahi poini ʻo e ngaahi konga Tohitapú. Tuʻuaki ha ako Tohitapu taʻetotongi ʻi ʻapi. Fakaʻaliʻali ʻa e tohi ko e ʻIlo, pea tuʻuaki ange ai te ke fakaʻaliʻali ʻa e founga ʻoku tau ngāueʻaki ai ia ko ha tokoni ki hono ako ʻa e Tohitapú.
8 Ko ʻetau ngāue fakafaifekaú ʻoku totonu ke tapua mei ai ʻa e mahuʻingaʻia loto-moʻoni ʻoku tau maʻú ke tokoniʻi ʻa e faʻahinga loto-totonú ke “aʻusia ʻa e ʻilo kanokano ki he moʻoni.” (1 Tīm. 2:4) Ko ia ai, ʻai ha taimi ʻi hoʻo taimi-tēpile fakamalangá ke toe foki ki he tokotaha taki taha ʻa ia naʻá ke tuku ai ha polosiua. Ko hoʻo fakahā ʻa e tokanga moʻoni kiate kinautolú ʻe maʻu nai ai ha ola ʻi hono tokoniʻi ʻa e faʻahinga ʻoku nau māpuhoi mo toʻe koeʻuhi ko e ngaahi meʻa fakalielia ʻoku fai ʻi he lotu loí ke hoko ʻo fakaʻilongaʻi ki he fakahaofí. (ʻIsi. 9:4, 6) Te ke aʻusia foki ʻa e loto-fiefia mo e fiemālie ʻoku hoko mai mei hono ʻiloʻi ʻokú ke faʻifaʻitaki kia Sihova ʻaki ʻa e tokanga moʻoni ki he niʻihi kehé.—Fakafehoanaki mo Filipai 2:20.