Ngaahi Polosiua ke Tuʻuaki ʻi Nōvemá
1. Ko e hā te tau tuʻuaki lolotonga ʻa Nōvemá?
1 ʻI heʻetau sio ki hono fakahoko ʻa e kikite ʻa e Tohi Tapú, ʻoku tau fiefia ai ʻi heʻetau ʻamanaki ʻo e Puleʻangá, pea ʻoku ueʻi kitautolu ke tau lea fekauʻaki mo ia ki ha taha pē ʻe fanongó. (Luke 6:45; Loma 12:12) Ko ʻetau tuʻuaki ko ia ʻa e ngaahi polosiua ʻi he malaʻe fakafaifekaú lolotonga ʻo Nōvemá ko e founga ia ʻe taha ʻe lava ke tau vahevahe atu ʻa ʻetau ʻamanaki ʻo e Puleʻangá ki he niʻihi kehé ʻo hangē ko ia naʻe fekauʻi ʻe Sīsuú.—Mt. 24:14.
2. Ko e hā ʻa ʻetau pole fakafoʻituitui fekauʻaki mo e ngaahi polosiuá?
2 Koeʻuhi ʻoku tau maʻu ha ngaahi polosiua kehekehe fakalanulanu mo mohu fakahinohino ke fili mei ai, ko fē nai ʻia kinautolu te ne feau lelei taha ʻa e ngaahi fiemaʻu ʻa e faʻahinga ko ia ʻi hotau feituʻu ngāué pea langaʻi ai ʻenau mahuʻingaʻiá? Ke ngāueʻaki ʻa e ngaahi polosiuá ki he lelei taha ʻe ala lavá, kuo pau ke tau ʻiloʻi honau ngaahi meʻa ʻi lotó. Ko e ngaahi fakamanatu nounou hoko haké te ne tokoniʻi kitautolu fekauʻaki mo e meʻá ni.
3-6. ʻE fēfē nai haʻatau tuʻuaki ʻa e (a) polosiua “Vākaí!”? (e) polosiua Leʻo!? (f) polosiua Fiemaʻu?
3 “Vakai! ʻOku Ou Fakafoʻou ʻa e Meʻa Kotoa Pe”: Ko e polosiua ko ení ʻokú ne fakatātaaʻi ʻa Palataisi pea langa hake ʻa e houngaʻia ʻi he Tohi Tapú pea mo hotau Tokotaha-Fakatupú. Hili ʻa e lāulea ki he ʻuhinga ʻoku fakaʻatā ai ʻe he ʻOtuá ʻa e koví, ʻoku hanga tefito ʻa e polosiuá ki he ngaahi akonaki tefito ʻe tolu ʻi he Tohi Tapú: ko e huhuʻí, ko e toetuʻú, pea mo e Puleʻangá. Ko e polosiua ko ení ʻoku toe ʻi ai ʻa e ngaahi fehuʻi ʻi lalo ʻi he ngaahi pēsí, ʻa ia ʻokú ne ʻai ke faingofua ange kia kitautolu ke fai ai ha ako Tohi Tapu.
4 Hanganaki Leʻo! ʻE lava ke ke pehē: Ko e kakai tokolahi ʻoku nau hohaʻa fekauʻaki mo e ngaahi palopalema mafatukituki mo e ngaahi meʻa fakaʻohovale ʻoku anga-maheni ʻi he ʻahó ni. [Lave ki ha fakatātā ʻoku ʻiloʻi fakalotofonua.] Naʻá ke ʻiloʻi ko e ngaahi meʻa pehē ko e konga ia ʻo ha fakaʻilonga fakamāmani lahi ʻoku fakahaaʻi ai ko e founga pule ʻa e ʻOtuá ʻoku vavé ni ke ne puleʻi ʻa e ngaahi meʻa ʻi he māmaní? [Tuku ke ne tali. Pea lau leva ha potutohi feʻungamālie, ʻo hangē ko e Mātiu 24:3, 7, 8; Luke 21:7, 10, 11; pe 2 Timote 3:1-5.] Ko e polosiua ko ení ʻoku lāulea ki he ʻuhinga ʻoku mātuʻaki fakavave ai ke tokanga ki he mahuʻinga ʻo e ngaahi meʻá ni ʻi he taimi ní.”
5 Ko e toe fakalea ʻe taha ʻe lava ke ngāueʻakí: “Ko e tokolahi ʻi he ʻahó ni ʻoku nau mafasia ʻi he ngaahi meʻa fakaʻohovale pe ko ha mole fakamamahi fakafoʻituitui. Ko e niʻihi kuo nau fifili pe ko e hā ʻoku ʻikai kau mai ai ʻa e ʻOtuá ke taʻofi ʻa e ngaahi meʻa peheé. ʻOku fakapapauʻi mai ʻe he Tohi Tapú kiate kitautolu ko e ʻOtuá kuo vavé ni ke ne fai ha meʻa ke ne toʻo atu ʻa e faingataʻaʻia ʻo e faʻahinga ʻo e tangatá. [Lau ʻa e Fakahā 14:6, 7.] Fakatokangaʻi ʻa e ʻuhinga ʻo e fakamaau ʻa e ʻOtuá ki he faʻahinga ʻo e tangatá. [Lau ʻa e 2 Pita 3:10, 13.] Ko e polosiua ko ení ʻokú ne tokonaki mai ʻa e ngaahi fakamatala lahi ange fekauʻaki mo e kaveinga mahuʻinga ko ení.”
6 Ko e Hā ʻOku Fiemaʻu ʻe he ʻOtuá Meiate Kitautolú? Ko e ngaahi meʻa hoko haké ʻe lava ke ngāueʻaki: “ʻOkú ke fakakaukau naʻe ʻuhinga ʻa e ʻOtuá maʻa kitautolú ke tau moʻui ʻo ʻātakaiʻi ʻaki ʻa e ngaahi faingataʻá ʻo hangē ko e ngaahi meʻa ko ia ʻoku tau fehangahangai mo ia ʻi he ʻaho ní? [Tuku ke ne tali. Lau leva ʻa e Mātiu 6:10.] Kuó ke fai ha fakakaukau pe ko e hā koā ʻa e Puleʻanga ʻo e ʻOtuá?” Huke ki he Lēsoni 6, pea lau ʻa e ngaahi fehuʻi ʻa ia ʻoku fakahaaʻi ʻi he kamataʻanga ʻo e lēsoní. Kamata ha fetalanoaʻaki ʻi he lēsoní, pe fokotuʻutuʻu ke fai pehē ʻi he ʻaʻahi hokó. Fakatauange te tau kau kakato kotoa ʻi hono tuʻuaki ʻa e ngaahi polosiuá lolotonga ʻa Nōvemá!