ʻIkai Tuku Hono Talaki ʻa e Ongoongo Leleí
1 Naʻe fai fakamātoato ʻe he muʻaki kau Kalisitiané ʻenau ngāue fakafaifekaú. Naʻe fakamatalaʻi ʻe Luke: “Ko e ʻaho kotoa pē, ʻi he Temipale pea ʻi ʻapi, naʻe ʻikai tuku ʻenau ako mo malangaʻaki ʻa Sisu, ko e Misaia ia.” (Ng. 5:42) Halaʻatā ha meʻa, naʻa mo e fakatangá, te ne taʻofi kinautolu! (Ng. 8:4) Naʻa nau lea ki he niʻihi kehé ʻo kau ki he moʻoní he ʻaho kotoa pē.
2 Fēfē kitautolu? ʻEke hifo kiate koe: ‘ʻOku ou tokanga ki he fakavavevave ʻo e taimí? ʻOku ou hehema ke hokohoko atu hono talaki ʻa e ongoongo leleí ʻo ʻikai tuku?’
3 Ngaahi Faʻifaʻitakiʻanga ʻi Onopooni ʻo e Malanga ʻo ʻIkai Tukú: Ko e tuofefine ʻe taha, ko ha poliō, naʻe fakahū ki ha mīsini fakamānava. Naʻe ʻikai malava ke ne ʻalu ki he Fale Fakatahaʻangá pe kau ki ha ʻasemipilī. Ka naʻá ne mātuʻaki kau ʻi hono talaki atu ʻa e ongoongo leleí. Lolotonga ʻa e taʻu ʻe 37 ʻo ʻene tokamohengá, naʻe malava ai ke ne tokoniʻi ha kakai ʻe toko 17 ke ako ʻa e moʻoní! Naʻe anga-fēfē ʻene fai iá? Neongo ʻa e ʻikai malava ke ʻalu mei he matapā ki he matapā, naʻá ne maʻu ha founga he ʻaho taki taha ke fakamoʻoni ai he founga ʻikai anga-mahení ki he faʻahinga naʻa nau haʻu ʻo ʻaʻahi mai kiate iá.
4 Ko hotau ngaahi tokoua ʻi Posiniá kuo nau fekuki mo e taú pea mo e masivá. Ka neongo ia, ʻoku nau hokohoko atu ke malanga ki he niʻihi kehé. ʻI Sarajevo ko e kau malangá kuo fakaʻavalisi ki he houa ʻe 20 ʻi he māhina taki taha he talanoa ki he niʻihi kehé ʻo kau ki he ongoongo leleí, pea nau fai mo e ngaahi ako Tohitapu ʻoku fakaʻavalisi ki he ako Tohitapu ʻe ua ki he tokotaha. Neongo ʻa e ngaahi tuʻunga kakaha ʻoku nau ʻi aí, ʻoku nau malanga mo faiako ʻo ʻikai tuku.
5 Ko e kau talavoú foki ʻoku nau fakahāhā ʻa e faivelenga ʻi he ngāue fakafaifekaú. Ko ha fāmili Fakamoʻoni ʻi Luanitā naʻe tuku ʻi ha loki naʻe teuteu ʻe he kau sōtiá ke tāmateʻi ai kinautolu. Naʻe kole ʻe he fāmilí ha ngofua ke ʻuluaki fai ha lotu. Naʻe fakaʻatā ʻeni, pea ko e ʻofefine kei siʻí, ko Deborah, naʻe lotu leʻo-lahi: “Sihova, ʻi he uiké ni ko au mo ʻeku tangataʻeikí naʻá ma tufa ha makasini ʻe nima. ʻE anga-fēfē ke ma toe foki ki he kakai ko ʻení ke akoʻi kiate kinautolu ʻa e moʻoní pea tokoniʻi kinautolu ke maʻu ʻa e moʻuí?” Koeʻuhi ko ʻene tui mālohí pea mo ʻene ʻofa he ngāue fakafaifekaú, naʻe tukuange leva ʻa e fāmilí fakakātoa.
6 ʻI he ʻahó ni, ʻoku ʻi ai ha fiemaʻu ke lamalama ʻa e ngaahi faingamālié ke fakamoʻoni ki he niʻihi kehé pea kumi ʻa e faʻahinga “ʻoku hehema totonu ki he moʻui taʻengatá.” (Ng. 13:48, NW) Fakatatau ki he ngaahi tuʻunga fakalotofonuá, ʻoku fai ʻe he kau mātuʻá ha ngaahi fokotuʻutuʻu ki he faifakamoʻoni fakakulupú ʻi ha ngaahi taimi faingamālie, pe ʻi he pongipongí, hoʻataá, pe efiafí. Ko e ngaahi kupu ʻi he ʻEtau Ngāue Fakafaifekau ʻo e Puleʻanga mo e ngaahi konga ʻi he Ngaahi Fakataha Ngāué, ngaahi ʻasemipilī fakafeituʻú, pea mo e ngaahi fakataha-lahi fakavahé ʻoku ʻomai ai ʻa e ngaahi fokotuʻu taimi totonu mo e fakalototoʻa ke kau ʻi he ngaahi founga kehekehe ʻo e faifakamoʻoni fekauʻaki mo e Puleʻangá. Tānaki atu ki he meʻá ni, ʻoku akoʻi ʻe he kau ʻovasia fakafeituʻú mo fakavahé ʻa e kau malangá ki he faifakamoʻoni ʻi he halá, ʻo fakahā ai ʻa e founga ke ngāueʻi ai ʻa e feituʻu fakapisinisí, pea fokotuʻu atu ʻa e ngaahi founga ke fai ha fakamoʻoni ʻi ha feituʻu pē ʻoku ʻi ai ha kakai. ʻOku fakamamafaʻi kotoa ʻe he meʻá ni ke ʻikai tuku hono talaki ʻa e ongoongo leleí!
7 Naʻe fakahā loto-toʻa ʻe he kau ʻaposetolo ʻa Sīsuú: “ʻE ʻikai te ma tuku ʻema lea ki he ngaahi meʻa naʻa ma sio ki ai mo fanongoa.” Naʻe anga-fēfē ʻenau kītakí neongo kotoa ʻa e ngaahi fakafaingataʻaʻiaʻangá? Naʻa nau kole kia Sihova ke tokoniʻi kinautolu, ʻa ia naʻá ne fai pehē, pea “naʻe fakafonu ʻa kinautolu katokatoa ʻi he laumālie māʻoniʻoni: pea naʻa nau malangaʻaki ʻa e folofola ʻa e ʻOtua ʻo taʻemāluʻia.” (Ng. 4:20, 29, 31) Ko e tokotaha kotoa pē ʻoku ʻikai ke tāpuakiʻiʻaki nai ia ʻa e ngaahi hokosia tuʻu-ki-muʻa ʻi he ngāue fakafaifekaú, ka ʻo kapau ʻoku tau holi moʻoni ke talaki ʻa e ongoongo leleí ʻo ʻikai tuku pea kapau ʻoku tau fai ha feinga ke fai pehē ʻi he ʻaho kotoa pē, ʻe tokoniʻi kitautolu ʻe Sihova.