ʻE Fēfē Haʻanau Fanongo?
1. Ko e hā ʻe hoko nai ai ʻa e ngāue fakamalangá ʻo faingataʻá, pea ko e hā ke tau kīvoi aí?
1 ʻI he vave ke hoko mai ʻa e ʻaho ʻo Sihová, ʻoku ʻi ai e fiemaʻu fakavavevave ke tokoniʻi ha faʻahinga tokolahi ke nau maʻu ha ʻilo totonu ʻo e ʻOtuá mo ʻene taumuʻa ki he faʻahinga ʻo e tangatá. (Sione 17:3; 2 Pita 3:9, 10) ʻE hoko nai eni ʻo faingataʻa ʻi he taimi ʻe niʻihi, he ʻoku taʻemahuʻingaʻia ʻa e tokolahi pe manukiʻi nai kitautolu koeʻuhi ko ʻetau ngāue fakamalangá. (2 Pita 3:3, 4) Ka neongo ia, ʻoku tau maʻu ʻa e ʻuhinga ke tui ʻoku kei ʻi ai pē ʻa e faʻahinga ʻi hotau feituʻu ngāué te nau tali ʻa e ongoongo leleí ʻi heʻenau fanongo pē ki aí. ʻE fēfē ha fanongo ʻa e faʻahinga ko iá kapau ʻoku ʻikai ha taha ʻe malanga?—Loma 10:14, 15.
2. ʻOku anga-fēfē hono fakalototoʻaʻi kitautolu ʻe he faʻifaʻitakiʻanga ʻa e ʻapositolo ko Paulá?
2 Fehangahangai mo e Fakafepaki: Kuo pau ke ʻoua te tau holomui, koeʻuhi ko e faʻahinga ʻoku nau loto-lelei ke fanongo ki he pōpoaki ʻo e Puleʻangá. Ko Filipai ʻa e ʻuluaki kolo lahi ʻi ʻIulope naʻe fanongo ki hono malangaʻi ʻa e ongoongo leleí ʻe he ʻapositolo ko Paulá. ʻI he taimi naʻe tukuakiʻi loi ai ʻa Paula mo Sailosí, naʻe fakatou haha kinaua ʻaki ha ʻakau pea lī ki he pilīsoné. (Ng. 16:16-24) Kae kehe, ko e meʻa fakamamahi ko ia naʻe hokosiá naʻe ʻikai ʻai ai ʻa Paula ke holomui ʻi he manavahē. ʻI heʻene ʻaʻahi ki Tesalonaiká, ʻa e kolo lahi hono hoko ʻi heʻene fononga fakamisinalé, naʻá ne ‘maʻu ʻa e loto-toʻa fakafou ʻi he ʻOtuá.’ (1 Tes. 2:2, NW) ʻOku hā mei he faʻifaʻitakiʻanga ʻa Paulá ʻa e ʻuhinga ke ʻoua ai te tau ‘fiu’?—Kal. 6:9.
3. Ko e hā ʻokú ne fakatupunga nai ha niʻihi naʻe ʻikai te nau mahuʻingaʻia ki muʻa ke liliu ʻenau fakakaukaú?
3 Ko e tokolahi kuo nau fakafisi ke fanongo ʻi he laui taʻu, kuo liliu ʻenau fakakaukaú. Ko e feliliuaki ʻa e tuʻunga fakaʻekonōmiká, mahamahakí, ko ha mate ʻi he fāmilí, pe līpooti ʻo e ngaahi meʻa fakahohaʻa ʻi he māmaní ʻoku fakatupunga nai ai ha liliu pehē. (1 Kol. 7:31) Ko e niʻihi naʻe fakafepaki ʻenau ngaahi mātuʻá kuo nau hoko ko e kakai lalahi pea loto-lelei ke fanongo. Ko ʻetau hokohoko atu ʻi he malangá ʻoku ʻoange ai ha faingamālie ki he faʻahinga ko iá ke ‘tautapa ki he huafa ʻo Sihová’ ki muʻa ke fuʻu tōmui.—Loma 10:13.
4. Ko e hā ʻokú ne ueʻi kitautolu ke hokohoko atu ʻo “ʻikai tuku” ʻi he ngāue fakafaifekaú?
4 “ʻIkai Tuku”: Ko ʻetau ʻofa ki he ʻOtuá mo e kaungāʻapí ʻe ueʻi ai kitautolu ke hokohoko atu ʻo “ʻikai tuku” ʻi he ngāue fakamalangá mo e ngaohi-ākongá, ʻo hangē pē ko ia naʻe fai ʻe he kau ʻapositoló ʻi he ʻuluaki senitulí. (Ng. 5:42) Ko e tokolahi he ʻahó ni ʻoku nau “mapuhoi mo toʻe koeʻuhi ko e ngaahi fakalielia” ʻoku lolotonga hokó. (Isi. 9:4) He ʻamanaki mo e nonga ē ʻoku maʻu ʻe he faʻahinga peheé ʻi heʻenau fanongo ki he ongoongo leleí! Naʻa mo e taimi ʻoku fakafisi ai ʻa e kakai tokolahi taha ke fanongó, ʻoku tau maʻu ʻa e fakapapau Fakatohitapu ʻoku hōifua moʻoni ʻa Sihova ʻi heʻetau ngaahi feingá.—Hep. 13:15, 16.