“Kofuʻaki ʻa e Tangata Foʻou”
1 ʻOku houngaʻia ʻa e kau Kalisitiané ʻi hono ʻiloʻi ʻa e moʻoní! Kuo tau ako ki he founga ke moʻui ai ʻo fakaʻehiʻehi mei he ʻalunga ʻo e faʻahinga ʻi he māmaní. ʻI he “motu mei he moʻui ʻa e ʻOtua,” ʻoku “fakapoʻuli honau ʻatamai.” (Ef. 4:18) Kuo akoʻi kitautolu ke fakaʻatā hotau ʻatamaí mei he fakakaukau fakamāmaní ʻaki hono huʻihuʻi atu ʻa e angaʻitangata motuʻá pea ʻai ʻa e angaʻitangata foʻoú.—Ef. 4:22-24.
2 Ko e angaʻitangata motuʻá ʻoku taki atu ai ki ha hokohoko atu ʻo e ʻalunga ʻulungaanga ololaló, ʻo iku ia ki he taʻemaʻa mo e mate. Ko ia ai, ʻoku tau kole ki he faʻahinga te nau fanongo ki he pōpoaki ʻo e Puleʻangá ke huʻihuʻi atu ʻa e ʻitá, lilí, loto-koví; lea koví mo e talanoa fakalieliá. Ko e faʻahinga ʻoku loto ke hōifua mai ʻa e ʻOtuá kuo pau ke nau fakapapauʻi ke huʻihuʻi atu mo fakaʻaufuli ʻa e angaʻitangata motuʻá—ʻi he founga te nau huʻi atu ai ha kofu ʻoku ʻuli.—Kol. 3:8, 9.
3 Ko ha Mālohi Foʻou ʻOkú Ne Ueʻi ʻa e ʻAtamaí: Ko hono ʻai ʻa e angaʻitangata foʻoú ʻoku kau ki ai ʻa e fakafoʻou ʻi he mālohi ʻokú ne ueʻi ʻa hotau ngaahi ʻatamaí. (Ef. 4:23) ʻOku anga-fēfē hono ʻai ʻe ha taha ʻa e mālohi ko iá, pe anga ʻo e fakakaukaú ke foʻou, koeʻuhí ke ne hehema ki he fakahinohino totonú? ʻOku fai ʻeni ʻaki hono ako tuʻumaʻu mo fakamātoato ʻa e Folofola ʻa e ʻOtuá pea fakalaulauloto ki he meʻa ʻoku ʻuhinga ki aí. ʻOku tupulaki leva ha sīpinga foʻou ʻo e fakakaukaú, pea ʻoku sio ʻa e tokotahá ki he ngaahi meʻá mei he anga ʻo e vakai ʻa e ʻOtuá mo Kalaisí. ʻOku liliu ʻa e moʻui ʻa ha taha ʻi heʻene kofuʻaki ʻa e ngaahi ʻulungaanga faka-Kalaisi lahi, kau ai ʻa e kaungāongoʻi, anga-ʻofa, fakaʻakiʻakimui, anga-mokomoko, anga-kātaki, mo e ʻofa.—Kol. 3:10, 12-14.
4 ʻI hono ʻai ʻa e angaʻitangata foʻoú, ʻoku tau fakamavaheʻi ai kitautolu mei he māmaní. Ko ʻetau founga moʻuí ʻokú ne ʻai kitautolu ke tau kehe. ʻOku tau leaʻaki ʻa e moʻoní pea ngāueʻaki ʻa e lea lelei ke langa hake ʻaki ʻa e niʻihi kehé. ʻOku tau mapuleʻi ʻetau ʻitá, lilí, feʻiohoʻakí, leakoví, pea mo e kovi kotoa pē pea fetongi ʻaki ʻa e ngaahi ʻulungaanga māʻoniʻoni, mo fakaʻotua. ʻOku tau fakalaka atu ʻi he meʻa ʻoku fiemaʻu anga-maheni kiate kitautolú ʻi he hoko ʻo fakamolemolé. Ko e kotoa ʻo e meʻá ni ʻoku fai loto-lelei ia mei he lotó.—Ef. 4:25-32.
5 ʻOua ʻaupito ʻe huʻi atu ʻa e angaʻitangata foʻoú. ʻE ʻikai te tau tauhi fakahōifua kia Sihova ʻo taʻekau ai ia. Fakaʻatā ia ke ne tokoni ki hono tohoakiʻi ʻa e kakaí ki he moʻoní, pea fakaʻatā ia ke ne fakalāngilangiʻi ʻa Sihova, ko e Tokotaha-Fakatupu ʻo hotau angaʻitangata fakaofo foʻoú.—Ef. 4:24.