Fakalahi ʻa e Faifakamoʻoní ʻi he Ofi ʻa e Ngataʻangá
1 Ko e faʻahitaʻu utu-taʻú ko ha taimi fakafiefia. Ko ha toe taimi ia ki he ngāue mālohi. ʻOku fakangatangata pē ʻa e taimi ke tānaki ai ʻa e fuá. Kuo pau ke ʻoua ʻe fakatuotuai ʻa e kau ngāué ʻi heʻenau ngāué.
2 ʻI he lea fakaefakatātaá, naʻe fakafehoanaki ʻe Sīsū ʻa e “fakaʻosi ʻo ha kuonga” ki ha taimi utu-taʻu. (Mt. 13:39) ʻOku tau moʻui ʻi he ngataʻanga ʻo e fokotuʻutuʻu ko ʻeni ʻo e ngaahi meʻá, fakataha mo ha taimi fakangatangata ʻoku toe ki hono fai ha fakamoʻoni “ki mamani katoa.” (Mt. 24:14) ʻI he toe ofi ange ʻa e ngataʻangá, ʻoku fiemaʻu ke tau fakalahi atu ʻetau kau ki he ngāue fakafaifekaú. Ko e hā hono ʻuhingá? Naʻe fakamatalaʻi ʻe Sīsū: “Kuo lahi ʻa e taʻu kuo motuʻu, ka ʻoku kaungatamaki ʻa e kau ngaue.”—Mt. 9:37, 38; Loma 12:11.
3 Ke Fakavavevave Ia: ʻI he taimi naʻe kamata ai ʻe Sīsū ʻene ngāue fakamalanga lahí, naʻe taʻu pē ʻe tolu mo e konga ke ne fakaʻosi ai ʻa e meʻa naʻe vaheʻi ange ke ne faí. Naʻá ne malanga fakataha mo ha ongoʻi ʻo e fakavavevave, ʻo pehē: “Kuo pau ke u ʻave ʻa e ongoongolelei ki he ngaahi kolo kehe foki, ʻo tala ʻa e Puleʻanga ʻo e ʻOtua; he naʻe fekau mai au ki he meʻa ko ia.”—Luke 4:43.
4 Naʻe fakahūhū ʻe Sīsū ki heʻene kau ākongá ha ongoʻi tatau ʻo e fakavavevavé. (Mk. 13:32-37) Ko e ʻuhinga ia “ko e ʻaho kotoa pē, ʻi he Temipale pea ʻi ʻapi, naʻe ʻikai tuku ʻenau ako mo malangaʻaki ʻa Sisu ko e Misaia ia.” (Ng. 5:42) Naʻe ʻikai ke fakamuʻomuʻa ʻi heʻenau moʻuí ʻa e ngaahi ngāue ʻoku mahuʻinga siʻisiʻí. Neongo ʻenau tokosiʻí, naʻa nau lavameʻa ʻi hono malangaʻi ʻa e ongoongo leleí “ki he meʻa moʻui kotoa pe ʻi he lalo langi.”—Kol. 1:23.
5 ʻOku toe ʻi ai ʻa e ʻuhinga lahi ange kiate kitautolu ke fakatupulekina ʻa e ongoʻi ʻo e fakavavevave tatau he taimí ni, he “kuo panaki ʻa e ngataʻanga ʻo e meʻa kotoa pe.” (1 Pita 4:7) Kuo fokotuʻu ʻe Sihova ha ʻaho mo e houa ki he ngataʻanga ʻo e fokotuʻutuʻu ko ʻeni ʻo e ngaahi meʻá. (Mt. 24:36) ʻE ʻosi ʻa e ngāue fakamalangá ʻi he taimi ko ia ʻoku toé. Ko e ʻuhinga ia ʻoku tau hokohoko atu ai ke fakalahi ʻetau ngaahi feinga ke aʻu ki he kakai tokolahi ange mo e ongoongo leleí.
6 ʻI hono fakalahi ʻetau kau ki he ngāue fakaefakamoʻoní ʻi he fakaʻau ke ofi ʻa e ngataʻangá, te tau maʻu ai ʻa e fiemālie ʻi he lea kia Sihova, ʻo hangē ko ia naʻe fai ʻe Sīsuú: ‘Kuo mau fakaʻosi ʻa e ngaue naʻá ke tuku kiate kimautolu ke mau faí.’—Sione 17:4.