“Malangaʻi ʻa e Folofolá . . . Fakavavevave”
1 Kapau ʻokú ke maʻu ha meʻa ʻoku fakaʻilongaʻi “FAKAVAVEVAVE,” ʻoku anga-fēfē hoʻo vakai ki aí? Ko e foʻi lea “fakavavevavé” ʻoku ʻuhingá ko e “fiemaʻu leva ʻa e tokanga.” ʻI he ʻuhinga lelei, naʻe fakahinohino ʻe he ʻapositolo ko Paulá ʻa e kau Kalisitiané ke nau “malangaʻi ʻa e folofolá . . . fakavavevave.” (2 Tim. 4:2, NW) ʻOkú ke tali ia ʻaki hoʻo fai leva ha tokanga ki he ngāue ko ʻení?
2 Mahalo pē naʻe fai ha līpooti kia Paula ʻo pehē ko e niʻihi ʻo hono fanga tokouá naʻa nau fakahāhā ha hehema ke ‘fakabikobiko i heʻenau gaué’ ʻi he tuʻunga ko e kau Kalisitiané. (Loma 12:11, PM) Naʻe fakangatangata heni ʻa e ngaahi ola ʻo ʻenau ngaahi ngāué pea pehē ki he fiefia naʻa nau mei malava ke maʻu mei hono tokoniʻi ʻa e niʻihi kehé.
3 Vakai ʻa Sīsū ki he Ngāue Fakafaifekaú: He fiefia ē naʻe maʻu ʻe Sīsū ʻi heʻene fakahoko ʻa ʻene ngāue fakafaifekaú! Naʻá ne pehē: “Ko ʻeku meʻakai e, ko e tuli ke fai ʻa e finangalo ʻo ia naʻa ne fekau mai au, pea ke fakaʻosi haʻána ngaue.” Naʻe ueʻi ʻe he faʻifaʻitakiʻanga ʻa Sīsuú ʻa ʻene kau ākongá, ʻa ia naʻá ne fakalototoʻaʻi ʻaki ʻene tala kiate kinautolu ko e ‘ngaahi ngoue na kuo fisi hina ia ki he ututaʻú.’ (Sione 4:34, 35) Ko e ongoʻi ʻo e fakavavevave ko ia naʻá ne fakahāhā ʻi he kotoa ʻo ʻene ngāue fakafaifekaú naʻe hā mahino ia ʻi he taimi naʻá ne tala ai ki heʻene kau ākongá ke nau “kole ki he ʻEiki ʻoku aʻana ʻa e taʻu, ke ne kouna atu mo ha kau ngaue ke utu ʻene taʻu.” (Mt. 9:38) Naʻe mahinoʻi ʻe Sīsū naʻe fekauʻi maí ke malanga, pea naʻá ne fakapapauʻi ke ʻoua ʻe tuku ha meʻa pē ke ne taʻofi ia mei hono fai iá.
4 Fēfē Kitautolu? ʻI he ʻahó ni, ʻoku ʻi ai ʻa e fakavavevave lahi ange ʻi ha toe taimi ki muʻa ke ʻunu ki muʻa ʻa e ngāue fakamalangá. ʻI he ngaahi konga lahi ʻo e māmaní, ʻoku motuʻu ai ʻa e taʻú ki he utu-taʻú. Naʻa mo e ngaahi fonua ʻoku ngalingali kuo ʻosi fai ai ha fakamoʻoni fakaʻāulilikí, ʻoku papitaiso ai ʻa e laui afe ʻi he taʻu taki taha. ʻI he tuʻunuku vave mai ʻa e ngataʻanga ʻo e fokotuʻutuʻu ʻo e ngaahi meʻa ko ʻení, ʻoku “lahi ʻa e meʻa ke fai ʻi he ngāue ʻa e ʻEikí.” (1 Kol. 15:58, NW) Laka hake ʻi ha toe taimi, ʻoku mātuʻaki mahuʻinga ke tau feinga mālohi longomoʻui ʻi hono vahevahe atu ʻa e pōpoaki ʻo e Puleʻangá ki he niʻihi kehé.
5 ʻAi ke tau femoʻuekina ʻi he aʻu ki he niʻihi kehé mo e ongoongo leleí, fakatouʻosi ʻi he fale ki he fale pea ʻi ha feituʻu pē ʻe lava ke maʻu ai ha kakai ʻi he feituʻú. ʻI he kau ki he ngāue fakamalangá ʻi he kakato taha ʻe ala lavá, ʻoku tau fakahaaʻi mahino ai ʻoku tau fakamuʻomuʻa ʻa e Puleʻangá ʻi heʻetau moʻuí. (Mt. 6:33) Ko ʻetau fai tōnunga ʻi hono malangaʻi fakavavevave ʻa e folofolá te ne ʻomai ai kiate kitautolu ʻa e fiefia lahi.