Ngaahi Founga ke Fakalahi Atu Ai Hoʻo Ngāue Fakafaifekaú
1 Laka hake ʻi he taʻu ʻe 40 ki muʻá, naʻe hā ha kupu naʻe fakakaveinga “ʻOkú Ke Fai ʻa Hoʻo Lelei Tahá?” ʻi he Watchtower ʻo Sanuali 15, 1955. Naʻá ne tuhuʻi anga-ʻofa mai ai ʻa e founga ʻe malava nai ki he kakai ʻa Sihová ke fakaleleiʻi ai ʻenau ngaahi feinga fakafoʻituitui ʻi he ngāue fakafaifekaú koeʻuhí ke nau fakatupulekina nai ai ʻenau ngāue maʻá e Puleʻangá. Ko e akonaki lelei ko iá ʻoku toe ngāueʻaki he ʻahó ni, ʻi heʻetau hokohoko atu ke fai ʻetau lelei tahá ʻo toe hulu ange.
2 ʻOku totonu ke ueʻi ʻa e kotoa ʻo ʻetau ngāué ʻe he fekau lahi tahá: “Te ke ʻofa ki he ʻEiki ko ho ʻOtua, ʻo fai ʻaki ʻa e kotoa ʻo ho loto, mo e kotoa ʻo ho laumālie, mo e kotoa ʻo ho ʻatamai, mo e kotoa ʻo ho ivi.” (Mk. 12:30) ʻOku tau fakahāhā ʻa ʻetau ʻofa kakato kia Sihová ʻaki hono ngāuekakatoʻaki ʻa e ngaahi faingamālie ʻa ia ʻoku tau ala maʻú ke fakalaka ki muʻa ʻa ʻene ngāue maʻá e Puleʻangá. Fakakaukau ki he ngaahi founga hoko hake te ke fakalahi atu nai ai hoʻo ngāue fakafaifekaú.
3 Fua Ho Fatongiá: ʻOku malava ke feinga ʻa e ngaahi tokoua ʻosi fakatapuí ke nau taau ke hoko ko e kau sevāniti fakafaifekau pea fakalakalaka atu ke ngāue ko e kau mātuʻa. Ko e ongo kupu ko e “ʻOkú Ke Kakapa Atu?” mo e “ʻOkú Ke Poto Taau ke Fai ʻa e Tauhí?,” ʻi he tatau ʻo e Taua Leʻo ʻo ʻEpeleli 1, 1991, ʻokú ne ueʻi ai ʻa e ngaahi tokoua tokolahi ke fakafaingamālieʻi kinautolu ki he ngaahi fatongia ʻi he fakatahaʻangá. ʻEke ki hoʻo kau mātuʻa fakalotofonuá ki ha ngaahi fokotuʻu pau ki he founga ke kakapa atu ai ʻo tāú.
4 Ko e kau mātuʻa mo e kau sevāniti fakafaifekau ʻoku teʻeki ke nau malí ʻoku fakaafeʻi atu ke nau fakakaukau fakamātoato fekauʻaki mo e tohi kole ki he Akoʻanga Ako Fakafaifekaú. ʻE lava ke ke alāanga mo e ako ko ʻení ʻaki hono lau ʻa e ngaahi maʻuʻanga fakamatala ʻi lalo ʻi he “Akoʻanga Ako Fakafaifekau” ʻi he ʻū Watch Tower Publications Index ki he 1986-1995, 1996, mo e 1997. ʻOkú ke sio atu ki he ‘matapā lahi ʻo e ngāué’ ʻoku fakaava mai mei muʻa kiate koé? (1 Kol. 16:9a, NW) Ko e ngaahi tokoua tokolahi naʻa nau hū atu aí naʻe ʻikai haʻanau teitei fakakaukau ki he ngaahi fuʻu monū ʻo e ngāué ʻi he tafaʻaki ʻe tahá. ʻI he ʻahó ni ʻoku nau fiefia ʻi he ngāue he Pētelí pe ʻi he malaʻe malangá ʻi heʻenau hoko ko e kau tāimuʻa makehe, kau misinale, pe kau ʻovasia fakafeituʻu.
5 Kakapa Atu ki he Ngāue Taimi-Kakató: Ko e kau talavou kuo nau ʻosi mei he kolisí, ngaahi uaifi tauhi ʻapí, pea mo ha taha pē kuo maʻu vāhenga mālōlō ʻoku totonu ke nau fai ha fakakaukau fakamātoato ki he ngāue tāimuʻá. Fakamanatu ʻa e fakalahi ʻi he ʻEtau Ngāue Fakafaifekau ʻo e Puleʻanga ʻo Siulai 1998, pea talanoa leva ki he kau tāimuʻa ʻa ia ko honau ngaahi tuʻungá ʻoku meimei tatau mo ia ʻi hoʻo moʻuí tonu. Mahalo pē ʻe ueʻi nai ai koe ke fakalahi hoʻo ngāue fakafaifekaú ʻaki ʻa hoʻo ngāue tāimuʻa, ʻo hangē ko ia ʻoku nau faí. (1 Kol. 11:1) Ko e hā ʻe lava ke fai ke fakalahi atu ai hoʻo ngāué ki he houa ʻe 70 ʻi he māhina pea ngāue ai ko ha tāimuʻa tuʻumaʻú?
6 ʻOku laka hake ʻi he ngaahi tokoua mo e ngaahi tuofāfine ʻe toko 17,000 ʻoku nau ngāue he taimí ni ʻi he ngaahi ʻōfisi vaʻá mo e ngaahi ʻapi Pētelí takatakai ʻi he māmaní. ʻOku fakamatalaʻi ʻe he Our Kingdom Ministry ʻo Maʻasi 1995 ʻa e meʻa ʻoku fiemaʻu ki he tohi kole ki he ngāue peheé. Ko e hā ʻoku ʻikai te ke lau ai ʻa e fakalahi ko iá pea sio pe ko ha tokotaha nai koe ʻoku taau ki he monū laulōtaha ʻo e ngāue Pētelí?
7 Ngāue ʻi he Feituʻu ʻOku Lahi Ange Ai ʻa e Fiemaʻú: ʻOkú ke nofo ʻi ha feituʻu ʻoku faʻa toutou ngāueʻi pe ko e feituʻu ʻoku tokolahi ai ʻa e ngaahi tokouá ke vahevahe ʻa e kavengá? Kuó ke fakakaukau fekauʻaki mo hono fakalahi atu hoʻo ngāue fakafaifekaú ʻaki hoʻo hiki ki he feituʻu ʻoku lahi ange ai ʻa e fiemaʻú? Mahalo pē ko e hikí ki ha feituʻu ʻuta ofi mai ʻa ia ʻoku fiemaʻu ai ha kau ngāue tokolahi ange. (Mt. 9:37, 38) ʻOku ʻikai totonu ke fai fakavaveʻi ʻa e meʻá ni. ʻOku taau ke fai ha fakakaukau faʻa lotu ki ai. (Luke 14:28-30) Fetalanoaʻaki ki ho tuʻungá mo e kau mātuʻá pea mo e ʻovasia fakafeituʻú. Te nau fakaʻuhinga mo koe pe ʻoku fakapotopoto ke fai ha hiki pehē he taimí ni pe ko e teuteu ke fai pehē ʻi he kahaʻú. Kapau te ke loto ke tohi ki he Sōsaietí ki ha fokotuʻu ki he feituʻu te ke malava ke hiki ki aí, kuo pau ke ʻave fakataha hoʻo tohí mo e tohi ʻoku fakamoʻoni ai ʻa e Kōmiti Ngāue hoʻo Fakatahaʻangá.
8 Fakaleleiʻi ʻa e Tuʻunga ʻo Hoʻo Ngāué: Ngalingali ʻe lava ke tau kau kakato ange kotoa ʻi he ngāue fakafaifekaú ʻaki hono fakaleleiʻi ʻa e tuʻunga ʻo ʻetau ngāue fakamalangá. ʻOkú ke kau ki he ngaahi tafaʻaki kotoa pē ʻo e ngāué, kau ai ʻa e fakamoʻoni fale-ki-he-falé mo e ʻikai ʻi he founga anga-mahení pea pehē ki he ngāue toe ʻaʻahí mo e ako Tohitapú? Kapau ʻokú ke fai ha ako, ʻe lava ke ke fakaleleiʻi hoʻo pōtoʻi fakafaiakó? ʻE lelei ke fakamanatu ʻa e fakalahi ʻo ʻEtau Ngāue Fakafaifekau ʻo e Puleʻanga ʻo Sune 1996 ki ha ngaahi fokotuʻu ʻe lava ke ke ngāueʻaki ke ueʻi hoʻo kau akó ki he fakatapuí mo e papitaisó.
9 Ko ha fakamatala lahi ange ʻo e ngaahi founga ke fakalahi mo fakaleleiʻi ai hoʻo ngāue fakafaifekaú ʻoku maʻu ia ʻi he vahe 9 ʻo e Organized to Accomplish Our Ministry. Ko e moʻoni, ko kitautolu kotoa pē ʻoku totonu ke tau holi ke fai ʻa e meʻa lahi taha ʻe malavá ʻi he ngāue ʻa e ʻOtuá. Ko e hā ʻoku ʻikai ke fai ai ha fakakaukau fakamātoato ki hoʻo ngaahi taumuʻa fakalaumālié? Fai ʻo hangē ko ia ʻoku fakahinohino mai ʻe he 1 Timote 4:15: “Ke ke mamafa ki he ngaahi meʻa ko ia; ke ke ngaue ki he ngaahi meʻa ko ia; koeʻuhi ke ha ki he kakai kotoa hoʻo laka ki muʻa.”