ʻOkú Ke Fiemaʻu ke Fai ha Meʻa Lahi Ange?
1 Naʻe fakatatau ʻe Sīsū ʻa e Puleʻangá ki ha ngaahi koloa mahuʻinga ʻaupito. (Mt. 13:44-46) Ko e ngāue ʻo hono fakamafola ʻa e ongoongo lelei ʻo e Puleʻangá ko ha toe koloa mahuʻinga ia. ʻOku tuha mo e ngāue fakafaifekau ko ʻení ke fakamuʻomuʻa ʻi heʻetau moʻuí, ʻo tatau ai pē kapau ko e kau kakato ki aí ʻoku kau ki ai ha tuʻunga ʻo e fakaʻikaiʻi-kitá. (Mt. 6:19-21) ʻOkú ke fiemaʻu ke fai ha meʻa lahi ange ʻi he ngāue ʻo e Puleʻangá?
2 Fakakaukau ki he Ngaahi Meʻa Tefito ko ʻEní: ʻOku fiemaʻu ʻa e ngaahi meʻa ʻe niʻihi koeʻuhi ke fakalahi ai ʻetau kau fakafoʻituitui ʻi he ngāue fakafaifekaú: (1) fakapapauʻi ke fakamuʻomuʻa ʻa e ngaahi meʻa mahuʻinga ʻo e Puleʻangá ʻi he moʻuí (Mt. 6:33); (2) ngāueʻi ʻa e tuí pea falala kia Sihova (2 Kol. 4:1, 7); (3) kumi ki he tokoni ʻa e ʻOtuá fakafou ʻi he lotu loto-moʻoni mo e kīkīvoi (Luke 11:8-10); (4) muimui pea ngāue ʻo fehoanaki mo ʻetau ngaahi lotú.—Sem. 2:14, 17.
3 Ngaahi Founga ke Fakalahi Ai ʻEtau Ngāue Fakafaifekaú: ʻOku lava ʻe kitautolu kotoa ʻo fokotuʻu ha taumuʻa pau ki hono fakamoleki maʻu pē ha taimi ʻi he ngāue fakafaifekaú ʻi he māhina taki taha. Ka kuó ke toe fakakaukau ke maʻu mai ʻa e faingamālie kotoa pē ke faifakamoʻoni ai ʻi he founga ʻikai anga-mahení, feinga ke ʻai hoʻo ngaahi lea kamatá ke mohu ʻuhinga ange, fakalahi ʻa e ola lelei ʻo hoʻo ngaahi toe ʻaʻahí pea feinga ke fai ha ngaahi ako Tohitapu fakalakalaka ʻi ʻapi? Mahalo pē te ke lava ke tāimuʻa tokoni pe tuʻumaʻu pe ke ngāue ʻi ha feituʻu ʻoku lahi ange ai ʻa e fiemaʻú? Kapau ko ha tokoua ʻosi papitaiso koe, ʻe lava ke ke kakapa atu ke taau ke hoko ko ha sevāniti fakafaifekau pe ko ha tokotaha mātuʻa? (1 Tim. 3:1, 10) ʻE lava ke ke fakalahi hoʻo ngāue fakafaifekaú ʻaki hoʻo kole ki he ngāue Pētelí, Akoʻanga Ako Fakafaifekaú, pe ko e ako fakamisinale ʻi he Akoʻanga Kiliatí?—Luke 10:2.
4 Ko ha tokoua naʻá ne maʻu ha ngāue taimi-kakato peá ne fakamoleki ʻa e taimi lahi ʻi he ngaahi vaʻinga sipotí naʻe fakalototoʻaʻi ia ke ne hoko ko ha tāimuʻa tuʻumaʻu. Naʻá ne kamata ke ngāue tāimuʻa tokoni pea feʻunuʻaki leva hono ngaahi tuʻungá ke hū ki he ngāue fakafaifekau taimi-kakató. Ki mui ai, naʻá ne kau ki he Akoʻanga Ako Fakafaifekaú, ʻa ia naʻe tokoni ki hono teuteuʻi ia ki heʻene ngāue lolotonga ʻi he tuʻunga ko ha ʻovasia fakasēketi. Naʻá ne fiefia ʻaupito ʻi heʻene tali ʻa e fakalototoʻa naʻá ne maʻú, pea ʻokú ne loto-pau ʻokú ne fiefia ange ko ha ola ia ʻo ʻene fili ke fai ʻa e meʻa lahi ange ʻi he ngāue ʻo e Puleʻangá.
5 ʻOku tāpuakiʻi ʻe Sihova ʻa e faʻahinga ʻoku nau fakafaingamālieʻi kinautolú. (Ai. 6:8) ʻOua ʻe ʻai ha meʻa ke ne taʻofi koe mei hono fakalahi ʻa hoʻo ngāue fakafaifekaú pea mo hono maʻu naʻa mo e ola fakafiemālie mo fakaivifoʻou lahi angé.