Ngaahi Fakataha-Lahi Fakavahe “Folofola Fakaekikite ʻa e ʻOtuá” 1999
1 ʻI he taimi naʻe fangafanga hū atu ai ʻa e kau ʻIsilelí ki he Fonua ʻo e Talaʻofá, naʻe kōlenga ʻa Mōsese kiate kinautolu ke nau houngaʻia ʻi he fakahinohino ʻa e ʻOtuá. Naʻá ne tala ange kiate kinautolu: “Talaʻehai ko e meʻa maʻamaʻa ia kiate kimoutolu; he ko hoʻomou moʻuiʻanga.” (Teu. 32:45-47) ʻIkai ʻoku tau fakamālō kia Sihova koeʻuhí ko e mātuʻaki mahuʻinga kiate ia ʻetau moʻuí he ʻokú ne hokohoko atu ke tataki kitautolu fakafou ʻi heʻene Folofola mātuʻaki mahuʻingá? Ko ia ai, ʻoku tau vēkeveke fakatuʻamelie atu ki he Fakataha-Lahi Fakavahe ʻaho ʻe tolu “Folofola Fakaekikite ʻa e ʻOtuá” pea mo e meʻa kuo tuku tauhi ʻe Sihova maʻatautolú.
2 ʻI he taʻú ni, ʻoku palani ʻa e ngaahi fakataha-lahi fakavahé ki he ngaahi fonua ʻe tolu ʻi he feituʻu hotau vaʻá, pea ʻe fai ia ʻi he ngaahi lea faka-Pilitānia, faka-Haʻamoa, pea mo e faka-Tonga. Ko e ngaahi feituʻú mo e ngaahi ʻahó ʻa ē ʻoku hoko haké. Haʻamoa ʻAmelika: Kingdom Hall, Tafuna, Siulai 30–ʻAokosi 1, 1999 (Faka-Pilitānia); Community College, Mapusaga, ʻAokosi 6-8, 1999 (Faka-Haʻamoa) Tonga: Fale Fakatahaʻanga, Main Road, ʻAtele, ʻAokosi 27-29, 1999. Haʻamoa: Holo ʻAsemipilī, Sinamoga, Sepitema 17-19, 1999.
3 ʻOku ʻikai ha veiveiua kuo mou ʻosi fai ʻa e ngaahi fokotuʻutuʻu ke mou maʻu ʻi he ʻaho kotoa pē ʻa e fakataha-lahí koeʻuhi he ʻoku mou tui ʻoku ʻamanekina ʻe Sihova kimoutolu ke mou ʻi ai. Fakapapauʻi ʻokú ne ʻafioʻi ʻa e ngaahi feinga mo e ngaahi feilaulau fakafoʻituitui ʻoku fai ʻe heʻene kau sevānití ke maʻu iá, pea ʻokú ne manatuʻi ʻa e ngaahi meʻa peheé fakataha mo e houngaʻia. (Hep. 6:10) ʻI hono maʻu ʻa e ʻaho fakataha-lahi taki taha mei he hiva kamatá ki he lotu tukú, ʻoku tau fakahāhā ai kia Sihova ʻoku tau fakamahuʻingaʻi ʻene ngaahi folofola mai kiate kitautolú. (Teu. 4:10) ʻOku tau toe fakahāhā ʻa e houngaʻia ki he ngāue lahi ʻa hotau fanga tokoua tokolahi naʻa nau kau ʻi he teuteu ki he fakataha-lahí.
4 Ko hono fai ha fokotuʻutuʻu ki he laui teau ʻo e kakai ʻa e ʻOtuá ke fakatahataha ki he feituʻu faiʻanga fakataha-lahi taki taha ʻoku fiemaʻu ki ai ʻa e palani mo e fokotuʻutuʻu maau lelei ki muʻa. ʻI hono ʻiloʻi ko ia kuo fai ʻi he anga-ʻofa ʻa e ngaahi fokotuʻutuʻu ki he fakataha-lahí ʻoku totonu ke ne ueʻi kitautolu ke tau fengāueʻaki fakataha, koeʻuhí he “ko e meʻa kotoa pe ke fai ke tāu mo māu.” (1 Kol. 14:40) Kuo tokonaki mai ʻa e ngaahi fakamatala mo e fakamanatu hoko haké koeʻuhi ke ke aʻu nai ki ho feituʻu faiʻanga fakataha-lahí kuó ke ʻosi teuteu kakato ke fiefia ʻi he meʻakai fakalaumālié mo e feohi faka-Kalisitiané.
Ki Muʻa ʻi he Fakataha-Lahí
5 ʻOku fiemaʻu tokoni ʻa e faʻahinga ko ia ʻokú ke ako Tohitapu mo kinautolú pea mo e faʻahinga mahuʻingaʻia kehé ʻi hono fai ha ngaahi fokotuʻutuʻu fakafoʻituitui ke maʻu ʻa e fakataha-lahí? Ko e meʻa ʻoku nau sio mo fanongo ki ai lolotonga ʻenau ʻi aí ʻe ueʻi nai ai kinautolu ke nau hoko ko e kau lotu ʻa Sihova. (1 Kol. 14:25) ʻOku totonu ke lāuʻilo ʻa e kau mātuʻá ki ha taha pē ʻoku fiemaʻu tokoni ki ha nofoʻanga pe meʻalele, tautautefito ki he ngaahi mēmipa taʻumotuʻa ange ʻo e fakatahaʻangá, pea tokanga anga-ʻofa ʻo fakahoko ʻenau ngaahi fiemaʻú.—Kal. 6:10.
6 Ko e tokolahi taha ʻo e faʻahinga ʻoku nau maʻu ʻa e ngaahi fakataha-lahi ʻi he ngaahi fonua he malumalu ʻo hotau vaʻá ʻoku lava ke nau nofo ʻi ʻapi pe fai ha ngaahi fokotuʻutuʻu pē ʻanautolu ki he nofoʻangá. Kae kehe, kapau ʻoku fiemaʻu kiate koe ha nofoʻanga, fai ha tohi ʻo fakahaaʻi ai ʻa e ngaahi fakaikiiki ʻo hoʻo ngaahi fiemaʻú pea ʻoange ia ki he sekelitali ʻo hoʻo fakatahaʻangá ke fakafolau ki he potungāue ʻo e fakataha-lahí ki he nofoʻangá.
7 Kapau ʻokú ke fiemaʻu ha fakamatala fekauʻaki mo e fakataha-lahi ʻi ho feituʻú, ʻe malava nai ʻe he sekelitali ʻa e fakatahaʻangá ke ʻoatu ia kiate koe. Kapau ʻoku ʻikai te ne maʻu ʻa e fakamatalá, ʻoku lava ke ne maʻu ia ʻaki ʻene vakaiʻi ki he kōmiti fakataha-lahí pe ko e ʻōfisi vaʻá. Kātaki ʻo ʻoua ʻe fetuʻutaki ki he pule ʻo e ngaahi holo kuo haea ke ngāueʻaki ki he ngaahi fakataha-lahí.
8 Koeʻuhi ʻoku fokotuʻu ʻa e Potungāue ʻUluaki Tokoni Fakafaitoʻo ʻi he fakataha-lahí ke tokangaʻi ʻa e ngaahi tuʻunga fakatuʻupakeé pē, ʻoku mau fokotuʻu atu ke mou ʻomai haʻamou ʻesipilini, meʻa haʻi lavea, ngaahi meʻa pamu mānava, ngaahi tokoni fakafaitoʻo ki he keté, pea mo e ngaahi meʻa meimei tatau ki he fakataha-lahí kapau ʻokú ke tui ʻoku fiemaʻu nai ʻa e ngaahi meʻa peheé. Kapau ko koe pe ko ha taha ʻokú ke ʻofa ai ʻoku ʻi ai hano mahaki tauhi, hangē ko ha mahaki mafu, suka, pe mahaki moa, kātaki ʻo ʻomai ʻa e faitoʻo ʻoku fiemaʻú ki he fakataha-lahí ke tokangaʻiʻaki ʻa e ngaahi fiemaʻu ko ʻení ʻo hangē pē ʻokú ke ʻi ʻapi pe ʻi haʻo mālōlō ʻeveʻevá. ʻE fakapotopoto ki ha mēmipa ʻo e fāmilí pe kaungāmeʻa ofi ʻokú ne mahinoʻi ʻa e tuʻungá ke ne hanganaki tokangaʻi ʻa e tokotahá, koeʻuhi ko e taha ko iá te ne ʻi he tuʻunga lelei taha ke tokonaki ʻa e tokoni ʻoku fiemaʻú.
9 ʻE malanga hake nai ha ngaahi faingamālie ke fai ha fakamoʻoni ʻikai ʻi he founga anga-mahení ʻi hoʻo fononga mai mo foki mei he fakataha-lahí. Te ke mateuteu ke vahevahe atu ʻa e moʻoní ki he niʻihi kehé? Ko kitautolu kotoa pē, kau ai mo e fānau īkí, ʻoku lava ke tau kau ki ai ʻaki hono tuʻuaki ʻa e ngaahi tulekí ki he kau ngāue ʻi he pausá, kau fakaʻuli pasí pe tekisií, mo ha niʻihi pē ʻoku tau fetaulaki ʻi heʻetau fefonongaʻakí. ʻE ʻi ai ʻa e ngaahi faingamālie ke tufa ai ʻa e ngaahi makasiní, ngaahi polosiuá, pe ko e ngaahi tohi kehe pē ki he faʻahinga mahuʻingaʻiá. ʻAi ke mateuteu ke faifakamoʻoni ʻikai ʻi he founga anga-mahení ki he kakai ʻoku ʻikai nai ke aʻu ki ai ʻaki ha ngaahi founga maheni fakaemalanga kehekehe lahi ange.
10 Kātaki ʻo maʻu ʻa e ngaahi kaati fakaʻilongá mo e ngaahi faʻoʻangá kiate koe mo ho fāmilí ʻo fakafou ʻi he fakatahaʻanga fakalotofonuá, koeʻuhi heʻikai ke ala maʻu ia ʻi he fakataha-lahí. ʻOua ʻe tuku ʻeni kae ʻoua kuo toki aʻu ki ha ʻaho siʻi ki muʻa ʻi he fakataha-lahí. Kātaki ʻo fakapapauʻi ʻokú ke tui ho kaati fakaʻilongá he lolotonga ʻo e ʻalu mo e foki mei he fakataha-lahí pea mo e lolotonga ʻa e taimi ʻokú ke ʻi he kolo faiʻanga fakataha-lahí. ʻOku faʻa fakatupunga ai heni ha ngaahi faingamālie ke fai ha fakamoʻoni lelei.
ʻI he Lolotonga ʻo e Fakataha-Lahí
11 Te ke lava ʻo taʻofi ha ngaahi nofoʻanga maʻá e faʻahinga pē ʻi ho fāmilí tonu pe kau heka ʻi he kaá. ʻI he ngaahi fakataha-lahi lalahi angé, ʻe taʻofi ha nofoʻanga ʻoku faingamālié maʻá e fanga tokoua mo e fanga tuofāfine taʻumotuʻá, pea ʻe tuku mavahe ha ngaahi feituʻu maʻá e kau faingataʻaʻiá mo e faʻahinga ko ia ʻoku nau fiemaʻu ha hūʻanga ki he salioté. ʻOku ʻikai malava ke tuku mavahe ha ngaahi loki makehe ʻi he feituʻu fakataha-lahí maʻá e faʻahinga ʻoku puke ʻi he ʻātakaí pe kovi ki ai ha faʻahinga meʻa. ʻI he ʻaho taki taha ʻi hoʻomou mavahe mei homou tangutuʻangá, kātaki ʻo vakaiʻi ke fakapapauʻi ʻoku mou ʻalu mo hoʻomou ngaahi meʻa kotoa pē.
12 Koeʻuhi ke fakatahataha ʻi ha fuʻu tokolahi ki heʻetau ngaahi fakataha-lahi fakavahé, ʻoku fiemaʻu kiate kitautolu ke tau ngāueʻaki ʻa e ngaahi lao ʻo e feituʻú, ngaahi lao ki he tāmate-afí, pea mo e ngaahi fakatokanga maluʻi kehé. Ko ia ai, ʻoku ʻikai totonu ke ʻomai ki he fale ʻa ia ʻoku tau fakatahataha aí ha ngaahi saliote pēpē pea mo ha ngaahi sea tākoto. ʻOku fakatuʻutāmaki ʻa e ngaahi meʻá ni ki he ngaahi feituʻu fefonongaʻakí pe ʻi he vahaʻa ʻo e ngaahi ʻotu seá. Kae kehe, ko e ngaahi sea maluʻi ʻo e kiʻi tamá ʻa ia ʻe feʻunga ʻi ha nofoʻanga hoko atu ki he ongo mātuʻá pea ʻoku malava ke fakamaʻú ʻoku ala tali.
13 ʻOkú ke teu papitaiso ʻi he fakataha-lahi fakavahé? Ki he konga pongipongi ʻo e Tokonakí, ʻe taʻofi ai ha konga ʻo e ngaahi nofoʻangá ki he kau teu papitaisó, pea ʻe fakahinohino koe ʻe he kau fakanofonofó ki he feituʻu ko ʻení. Kapau ʻe ala lava, kātaki ʻo tangutu ai ki muʻa ke kamata ʻa e kongá. Toʻotoʻo mai hoʻo Tohitapú, tohi hivá, tauveli, pea mo ha teunga kaukau taau. Ko e ngaahi talausese tangikalī mutú, ngaahi falani tā mo hono tuʻuakí, pea mo e ngaahi vala meimei tataú ʻoku taʻefeʻunga ia ki ha kātoanga molumalu pehē. Ko e kau mātuʻa ʻoku nau fakamanatu ʻa e ngaahi fehuʻi ʻi he kiʻi tohi Ngaahi Akonaki Tefito ʻa e Tohi Tapú mo e kau teu papitaisó ʻoku totonu ke nau fakapapauʻi ʻoku mahinoʻi ʻe he tokotaha taki taha ʻa e ngaahi poini ko ʻení. Koeʻuhi ko e papitaisó ko ha fakaʻilonga ia ʻo e fakatapui fakafoʻituitui kia Sihova ko e ʻOtuá, ʻe ʻikai ke taau ki he kau teu papitaisó ke fepikinima he lolotonga ʻo e papitaisó.
14 Te ke lava ʻo ngāueʻaki ʻa e ngaahi meʻa-faitā, ngaahi meʻa-faitā vitiō, mo e ngaahi naunau hiki polokalama ʻi he fakataha-lahí. Kae kehe, ko honau tuʻuʻangá pe ko hono ngāueʻakí ʻoku totonu ke ʻoua ʻe ʻefihia ai ʻa e ngaahi hala vahaʻa seá, fakafaingataʻaʻiaʻi ʻa e mamata ʻa e niʻihi kehé pe fakaleluʻi ʻa e tokangá mei he polokalamá. Kuo pau ke nau ʻataʻatā—ʻa ia, ʻoku ʻikai ke fakahoko ki he ngaahi naunau fakaʻuhilá pe fakaleʻolahí.
15 ʻI he tupulaki hono ngāueʻaki ʻo e ngaahi telefoni selulaá mo e ngaahi meʻa-fakaongó, kātaki ʻo tokanga ʻe ʻikai ke fakahohaʻasi ʻe he ngaahi meʻa ko ʻení ʻa hoʻo tokanga ki he polokalamá pe ko e tokanga ʻa e faʻahinga ʻoku tangutu takatakai kiate koé. ʻOku totonu ke ʻoua ʻe fakaʻatā ʻa e ngaahi meʻa ko ʻení ke tatangi pe kikī leʻo-lahi he lolotonga ʻo hoʻo tangutu ʻi he kau fanongó. Kapau ʻoku fiemaʻu kiate koe ke ke ngāueʻaki ha telefoni selulā he lolotonga ʻo hono fai ʻa e polokalamá, kātaki ʻo fai pehē ʻi tuʻa ʻi he fale faiʻanga fakatahá.
16 ʻI he mahuʻingaʻia ʻi he taimí mo e tuʻunga faingofuá, kuo kole mai ai ʻe he Sōsaietí kiate kitautolu ke tau ʻomai ʻetau kai hoʻatā pē ʻatautolu ki he fakataha-lahí ʻi he ʻaho taki taha. ʻOku muimui ʻa e tokolahi taha ʻo e fanga tokouá ki he fakahinohino ko ʻení pea kuo nau ʻiloʻi ʻi he hili ʻa e mālōlō mei he taimi hoʻataá, ʻoku lava ke nau tangutu hifo mo honau ngaahi fāmilí pea kai ʻa e meʻa naʻa nau ʻomai ki he ʻaho ko iá. Naʻe pehē ʻe he tokolahi ko e faingamālie ko ia ke mālōlō he lolotonga ʻo e mālōlō hoʻataá pea fakamoleki ʻa e taimi lahi ange mo honau fanga tokouá mo e fanga tuofāfiné ʻoku hoko ʻo fakafiefia. ʻOku fiemaʻu heni ʻa hono fakatau ʻa e meʻakaí mo e inú ki muʻa pea faʻoaki kinautolu ʻi ha meʻa-faʻoʻanga siʻisiʻi pe kula ʻa ia ʻe lava ke feʻunga ʻi he lalo seá. ʻOku mau kole atu ki he kau maʻu fakataha kotoa pē ke nau muimui ki he fakahinohino ko ʻení. Kapau ʻoku mavahe atu ʻa e fanga tokouá mei he faiʻanga fakatahá ke fakatau meʻakai mei he ngaahi falekoloa ofi maí, ʻoku lava ke tau kau ai ʻi he tuʻu laine tatali fuoloa ke fai ʻete fakataú pea feohi ai mo e kakai ʻo e māmaní, ʻa ia ʻe uesia ai ʻa e ʻatimosifia fakafiemālie ʻo ʻetau ngaahi fakataha-lahí. Ko ia ai, ʻoku mau kole atu ki he tokotaha taki taha ke ne feinga ke ʻomai haʻane meʻakai mo e inu pē ʻaʻana ki he fakataha-lahí ʻi he ʻaho taki taha. Ko e faʻahinga mahuʻingaʻia te nau haʻu fakataha mo koe ki he fakataha-lahí ʻoku totonu ke nau toe ʻomai mo haʻanau meʻakai pē ʻanautolu. Ko e ngaahi hina sioʻatá mo e ngaahi inu ʻolokaholó ʻoku ʻikai ke fakaʻatā ia ke ʻi he ngaahi fale fakataha-lahí.
17 ʻE lava ke ke pole ke tokoni ki hono fakamaʻa ʻa e falé ʻi he hili ʻa e ngaahi konga ʻo e ʻaho taki taha? Pe ʻe malava ke ke ngāue ʻi ha taha ʻo e ngaahi potungāue kehe ʻi he fakataha-lahí? Kapau te ke malava ke tokoni, kātaki ʻo haʻu ki he Potungāue Ngāue Pole ʻi he fakataha-lahí. ʻOku talitali lelei ʻa e fānau ʻoku ʻi lalo ʻi he taʻu 16 ke nau ngāue fakataha mo ha mātuʻa tauhi fānau pe ko ha tokotaha lahi ʻe taha ʻoku fakapotopoto. Ko ia ai, ʻoku lava ke tokoni ʻa e tokotaha kotoa pē ki he fakamaʻa ʻo e falé ʻaki ʻenau sio ʻo tufi fakalelei ʻo ʻave ha veve pē.
18 Kuo tau maʻu ʻa e ngaahi faleʻi lelei ki he meʻa ʻoku kau ki he vala mo e teuteu taau ʻi heʻetau ngaahi fakataha-lahí. Ko e fakatātaá: ʻOku tau maʻu ʻa e fakahinohino fekauʻaki mo e meʻá ni ʻi he ngaahi fakalahi ʻo ʻEtau Ngāue Fakafaifekau ʻo e Puleʻanga, ʻoku tau maʻu ʻa e ngaahi fakahāhā mo e ngaahi fakatātā ʻi heʻetau ngaahi tohí, pea ko e meʻa mahuʻinga tahá ʻi he meʻa kotoa, ʻoku tau maʻu ʻa e meʻa ʻoku leaʻaki ʻe Sihová ʻi he Tohitapú. (Loma 12:2; 1 Tim. 2:9, 10) ʻOku ʻilo ʻe he kakaí kitautolu pea mo e ʻuhinga ʻoku tau fakatahataha mai ai ki honau koló. Ko ia, ko hotau valá mo e teuteú ko ha fakamoʻoni mālohi ia ʻiate ia pē. Ko e tokolahi taha ʻo e kakai ʻa Sihová ʻoku nau fokotuʻu ha faʻifaʻitakiʻanga lelei ʻi he tafaʻaki ko ʻení. Ka neongo ia, ʻi he taimi ki he taimi, ʻoku tau vakai ki he laumālie ʻo e māmaní ʻoku tapua mai ʻi he vala mo e teuteu ʻo e niʻihi ʻoku haʻu ki heʻetau ngaahi fakataha-lahí. Ko e kofu aata ʻo ha faʻahinga ʻokú ne fehuʻia ai ʻa e taku ʻa ha tokotaha tāutaha ko ha tokotaha fakalaumālie iá. Ko ha fōtunga hāmai taau, maʻa, mo maau ʻa e meʻa ʻoku fakamānako lahi tahá. Ko ia ai, ʻoku totonu ki he ngaahi ʻulu ʻo e fāmilí, ke nau tokanga ki he meʻa ʻoku palani ke tui ʻe honau ngaahi mēmipa ʻo e fāmilí. ʻE toe ngāueʻaki ʻeni ʻi he taimi ʻoku tau mamaʻo ai mei he feituʻu faiʻanga fakataha-lahí. Ko hono tui hotau kaati fakaʻilongá ki muʻa pea mo e hili ʻa e ngaahi konga ʻo e ʻahó ʻoku toe fakaʻilongaʻi fakapapau ai kitautolu fakataha mo Sihova pea mo ʻene kakai maʻá.—Fakafehoanaki mo Maake 8:38.
19 Naʻe fakamānavaʻi ʻa e tuʻi poto ko Solomoné ke ne pehē “ʻoku tāvani ʻa e vale ʻi he loto ʻo ha tamasiʻi” pea “ko e tamasiʻi ʻoku tukuange noa ʻoku ne fakamaaʻi ʻene faʻe.” (Pal. 22:15; 29:15) ʻI he lolotonga ʻo e ngaahi kongá, ko e Kau Fakamoʻoni iiki ʻoku taʻetokangaʻí kuo nau fakatupunga ʻa e fakahohaʻa ki he fanga tokoua mo e fanga tuofāfine ʻoku nau feinga ke fanongo ki he polokalamá. ʻOku hā mahino ko e kau talavou ko ʻení naʻe ʻikai te nau maʻu ha ʻaonga mei he polokalama fakalaumālie kuo teuteuʻi mo e fakakaukau kiate kinautolú. Koeʻuhi ʻoku moʻuaʻaki ʻe he ngaahi mātuʻá kia Sihova ʻi he ʻulungaanga ʻo ʻenau fānaú, ʻe lava ke ʻilo pau ha faʻē pe tamai ʻoku anga-lelei pea fanongo ʻa e fānaú ki he fakahinohino ʻa Sihová ʻo kapau pē ʻoku tangutu fakataha mo kinautolu ʻa e fānaú. ʻE fakaofiofi atu ʻa e kau fakanofonofó ki ha faʻahinga pē ʻoku nau fakatupunga ha fakahohaʻá pea kole ange ke nau taʻofi ʻenau fai peheé, ʻo fakamanatu anga-ʻofa ange kiate kinautolu ke nau tokanga ki he polokalamá.
20 Koeʻuhi ʻoku tau talitali lelei ʻa e kakaí ki heʻetau ngaahi fakataha-lahí, ʻoku fakapotopoto ke fai ha tokanga fekauʻaki mo e fānaú pea mo e ngaahi koloa fakafoʻituituí. Ko ʻetau fānaú ko ha meʻaʻofa mahuʻinga ia meia Sihova. Ka ʻoku tau ʻiloʻi ʻoku tapua mei he māmaní ʻa e natula anga-fītaʻa ʻo Sētané. ʻI heʻene peheé, kātaki ʻo fakatokangaʻi ʻa e feituʻu ʻoku ʻi ai hoʻomou fānaú ʻi he taimi kotoa pē. ʻIkai ko ia pē, ko e ngaahi meʻa-faitaá, ngaahi pēsí, mo e ngaahi meʻa mahuʻinga kehé ʻoku totonu ke ʻiate kimoutolu ia ʻi he taimi kotoa pē pea ʻoua ʻe tuku ʻi homou tangutuʻangá. Fakapapauʻi ʻoku lokaʻi hoʻomou meʻalelé, pea tuku ʻa e ngaahi koloa fakafoʻituituí ʻi he putí pe te mou ʻalu pē mo ia. ʻOku fakasiʻisiʻi heni ʻa e ʻahiʻahiʻi ʻo ha taha ke ne hae ʻo hū ki hoʻo meʻalelé.
21 ʻOku ala maʻu ʻi he ngaahi hōtele lahi ʻa e ngaahi polokalama TV mo e vitiō ʻoku faʻa hū ki he ngaahi sēnolo ʻoku fakaeʻa ai ʻa e ngaahi polokalama fakalielia. Kapau ʻokú ke nofo mo ha ngaahi kāinga fakamāmani, te ke toe ʻilo foki nai ai ko ʻenau fili ki he ngaahi polokalama televīsoné pe ngaahi vitioó ʻoku ʻikai ke feʻunga ia ki ha Kalisitiane. Hangē ko e ʻi ʻapí, kātaki ʻo tokangaʻi hoʻo fānaú ʻi heʻenau ngāueʻaki ʻa e televīsoné.
22 ʻOku fakalototoʻa ke sio ki he fanga tokouá mo e fanga tuofāfiné ʻoku nau hiki nouti he lolotonga ʻo e ngaahi konga ʻo e fakataha-lahí. ʻE tokoniʻi koe ʻe he ngaahi nouti fakanounoú ke ke hangataha pea toe fakamanatu ai ʻa e ngaahi poini tefitó. Ko hono toe fakamanatu ʻa hoʻo ngaahi noutí ʻamui mo e fāmilí pe ngaahi kaumeʻá ʻe fakaʻatā ai koe ke fakalaulauloto ki he ngaahi meʻa mahuʻinga ʻo e fakataha-lahí koeʻuhi ke ʻoua ʻe ngalo kinautolu.
23 ʻOku nima-homo maʻu pē ʻa e kakai ʻa Sihová ʻi hono fai ha tokoni ki he ngaahi meʻa mahuʻinga fakateokalatí. (Eki. 36:5-7; 2 Kal. 31:10; Loma 15:26, 27) Ko hoʻo ngaahi tokoni loto-fiefoaki ki he ngāue ʻi māmani lahí ʻoku ngāueʻaki ia ke totongiʻaki ʻa e ngaahi fakamole fekauʻaki mo e totongi ʻo e ngaahi fale lalahi ʻa ia naʻe fai ai ʻa e ngaahi fakataha-lahí. Kapau ko hoʻo tokoní ʻoku fai ʻaki ha sieke, kātaki ʻo ʻai ke totongi ki he “International Bible Students Association.”
24 Hangē ko ia ʻoku hiki ʻi he Emosi 3:7, naʻe pehē ʻe Sihova “talaʻehai ʻe fai ʻe Atonai Sihova ha meʻa, ka te ne fukefuke ki heʻene kau tamaioʻeiki ko e kau palofita.” ʻI he tuʻunga ko e “Tokotaha Tatala ʻo e ngaahi meʻa fufuú,” kuo lēkooti ʻe Sihova ʻi he Tohitapú ʻa e ngaahi kikite ʻe laui afe ʻa ia kuo fakahoko totonu mo kakato. (Tan. 2:28, 47, NW) ʻOku kei toe ʻa e ngaahi talaʻofa maʻongoʻongá ke fakahoko. ʻE fakaivimālohiʻi ʻa hoʻomou tui ki he ngaahi talaʻofa ʻa e ʻOtuá ʻe he ngaahi Fakataha-Lahi Fakavahe “Folofola Fakaekikite ʻa e ʻOtuá” 1999. Fanongo tokanga ki he folofola mai ʻa Sihova kiate koé. Ngāueʻaki ʻa e meʻa te mou sio mo fanongo ki aí—ʻi he ngāue fakafaifekaú, ʻi he fakatahaʻangá, pea ʻi hoʻomou moʻui fakafoʻituituí. ʻOku mau lotu ki he tāpuaki lahi ʻa Sihová ke ʻi he kotoa ʻo hoʻomou ngaahi fokotuʻutuʻu ke maʻu ʻa e ʻaho kotoa pē ʻo e kai fakaafe fakalaumālie ko ʻení!
[Fakamatala ʻi he peesi 3]
Palani ke maʻu ʻa e ʻaho Falaité, Tokonakí, mo e Sāpaté kotoa!