ʻOkú Ke Sio Pē ki he Fōtunga Hāmai ʻi Tuʻá?

¹ ʻI heʻetau fai ʻetau ngāue fakafaifekaú ki he kakaí, ko ʻetau ʻuluaki ongoʻi fekauʻaki mo e kakai ʻe niʻihi ʻe ʻai nai ai kitautolu ke tau toumoua ke vahevahe ʻa e ongoongo leleí mo kinautolu. Ko e fakatātaá, ʻe anga-fēfē haʻo tali kapau ko ha tangata mataʻi fakailifia ʻokú ne faʻa sio huʻuhuʻu atu kiate koe ʻi hoʻo ʻaʻahi ki hono kaungāʻapí ʻa ia naʻá ne fakahā ʻa e mahuʻingaʻia ʻi he moʻoní? Naʻe hokosia ʻeni ʻe ha tuofefine tāimuʻa, peá ne fakakaukau ai ke fakaofiofi atu ki he tangatá ʻo lea kiate ia. Naʻe talitali taʻefakaʻapaʻapa ia. Ka, ko e meʻa fakaofó, naʻá ne fanongo ki he pōpoaki ʻa e Tohitapú pea ʻi ha loto-māfana naʻá ne loto-lelei ke ako. Ko hono olá, ʻi he ʻikai ke fakamāuʻi ʻe he tuofefiné ʻa e fōtunga hāmai ʻi tuʻá, naʻe fakaava ai ʻa e hala ki he tangata ko ʻení mo hono uaifí ke na ako ʻa e moʻoní.

² Ko ha tuofefine ʻe taha naʻá ne tomuʻa ilifia ʻi he fōtunga hāmai ʻi tuʻa ʻo ha kiʻi talavou ʻulu-loloa ka naʻá ne kīvoi pē ʻi he faifakamoʻoni nounou kiate ia ʻi ha taimi pē naʻá ne haʻu ai ki he falekoloa naʻá ne ngāue aí. Ko ʻene ngaahi feingá naʻe maʻu mei ai ʻa e ngaahi ola lelei, pea ko e kiʻi talavoú kuo hoko he taimí ni ko ha Fakamoʻoni ʻosi papitaiso. Ko e hā te ne taʻofi kitautolu mei he fakaʻosi vave ʻaki ʻe ʻikai ke tali ia ʻe he faʻahinga peheé?

³ Faʻifaʻitaki ki he Faʻifaʻitakiʻanga ʻa Sīsuú: Naʻe ʻiloʻi ʻe Sīsū te ne foaki ʻene moʻuí maʻá e tokotaha kotoa pē. Ko ia, naʻe ʻikai te ne loto-siʻi koeʻuhi ko e fōtunga hāmai ʻo e niʻihi kehé. Naʻá ne ʻiloʻi naʻa mo e faʻahinga ʻoku ʻulungaanga pango ʻi honau ngaahi ongoongó te nau loto-lelei nai ke liliu kapau ʻe ʻoatu ʻa e ngaahi tokoni mo e fakaueʻiloto totonú. (Mt. 9:​9-13) Naʻá ne feinga ke tokoniʻi tatau pē ʻa e maʻumeʻá mo e masivá fakatouʻosi. (Mt. 11:5; Mk. 10:​17-22) ʻOfa ke ʻoua te tau fakamāuʻi ʻa e kakai ʻoku tau fetaulaki ʻi he ngāue fakafaifekaú ʻi honau fōtunga hāmai ʻi tuʻá, ʻo fakakuihi ai kitautolu ki he meʻa ʻe hoko ko e tuʻunga lelei nai ia ʻo e lotó. (Mt. 7:1; Sione 7:24) Ko e hā ʻe lava ke ne tokoniʻi kitautolu ke tau faʻifaʻitaki ai ki he faʻifaʻitakiʻanga tuʻu-ki-muʻa ʻa Sīsuú?

⁴ Fakafou ʻi heʻetau ako ʻa e Tohitapú, kuo tau hoko ai ʻo houngaʻia ʻi hono maʻu ʻe he Folofola ʻa e ʻOtuá ʻa e mālohi ke liliu ʻa e fakakaukau, ʻulungaanga, mo e angaʻitangata ʻo ha taha. (Ef. 4:​22-24; Hep. 4:12) Ko ia ai, ʻoku totonu ke tau tauhi maʻu ha fakakaukau pau pea tuku ʻa e toengá ki he toʻukupu ʻo Sihová, ʻa e Tokotaha ʻokú ne ʻafioʻi ʻa e loto ʻo e faʻahinga ʻo e tangatá.​—1 Sam. 16:7; Ng. 10:​34, 35.

⁵ ʻOfa ke tokoni ʻa ʻetau vahevahe taʻefilifilimānako atu ʻa e ongoongo leleí ki he faʻahinga kotoa pē ʻo e kakaí, ʻo tatau ai pē pe ʻoku fēfē honau fōtunga hāmai ʻi tuʻá, ki he ngāue utu-taʻu lahi ʻi he ngaahi ʻaho fakaʻosi ko ʻení.​—1 Tim. 2:​3, 4.