ʻE Lava Ke Ke Fai ha Tokoni?
1 Naʻe enginakiʻi ʻe he ʻapositolo ko Paulá ʻa e ngaahi mēmipa ʻo e fakatahaʻangá ke “tatau ʻa e fetokangaʻaki ʻa e ngaahi kupu.” (1 Kol. 12:25) Ko ia, ʻoku totonu ke tau fefakahāʻaki ha mahuʻingaʻia fakafoʻituitui pea ke tau loto-lelei ke fai ha tokoni anga-ʻofa ʻi he taimi ʻoku fiemaʻu aí. Hangē ko ha fakatātā ʻe taha, ko e ngaahi tuofāfine fakalaumālie ʻe niʻihi ʻi hotau lotolotongá ʻoku nau tauhi hake ʻenau fānaú tokotaha pē ʻi he moʻoní. Ko e ngaahi tuofāfine ko ʻení ʻoku nau fua ʻa e kavenga kakato ʻo e fatongiá ʻi hono akoʻi fakalaumālie ʻo ʻenau fānaú. Ko hono moʻoní, ʻoku taau mo kinautolu ʻetau fakalototoʻa anga-ʻofá pea mo e tokoni ʻaongá “ʻo fakatatau ki heʻenau ngaahi fiemaʻú.” (Loma 12:13a, NW) ʻE lava ke ke fai ha tokoni kiate kinautolu?
2 Ngaahi Founga Te Ke Tokoni Nai Aí: Ko hono fai ha tokoni fakameʻalele ki he ngaahi fakatahá mo e ngaahi ʻasemipīlií ki he faʻahinga kuo pau ke nau fakafalala ki he meʻalele uta pāsesé ʻa ia ʻe hoko nai ia ko ha maluʻanga fakaepaʻanga ki he fāmili ko iá. Ko hono tokoniʻi ha faʻē ʻi hono tokangaʻi ʻo ʻene fānau īkí ʻi he ngaahi fakatahá ʻoku ʻuhingá nai ia ke ne malava ʻo maʻu ʻa e ʻaonga kakato lahi ange mei he polokalamá. ʻI he tuʻunga tatau, ko hono fai ha tokoni kiate ia ʻi he taimi ʻokú ne ʻave ai ʻene fānaú ʻi he ngāue fakamalangá ʻe tokonaki nai ai kiate ia ha fakafiemālie. Ko hono fakahāhā ha mahuʻingaʻia moʻoni ʻi he fānaú—ʻo anga-fakakaumeʻa kiate kinautolú—ʻe lava ke ne fai ha tākiekina lahi ange ki heʻetau kau talavoú ʻi ha founga pau. ʻI he taimi ki he taimi, ko hono fakaafeʻi ha fāmili ʻo ha mātuʻa taʻemali ke kau ki hoʻo ako fakafāmilí ʻe tokonaki mai ai ha tokoni fakaivifoʻou fakalaumālie.
3 Ke Fakapotopoto: ʻOku totonu ke tau tokanga ke ʻoua te tau fakamālohiʻi ʻetau tokoní ki ha taha ʻoku ʻikai te ne ongoʻi ʻoku fiemaʻu ia ki ai. Pea ʻoku ʻikai foki te tau fiemaʻu ke kaunoaʻia ʻi ha ngaahi meʻa fakafāmili ʻa ha taha he lolotonga ʻo hono fai ʻa e tokoni ʻoku fiemaʻú. Ko e moʻoni, ko e fanga tuofāfine mo e ngaahi hoa malí te nau ʻi ha tuʻunga lelei taha ke fai ha tokoni ki ha tuofefine ʻoku ʻi ai haʻane fiemaʻu.
4 ʻOku fakalototoʻaʻi atu ʻa e kau Kalisitiane kotoa pē ke nau “muimui ki he ʻalunga ʻo e anga-talitali kakaí” ʻiate kinautolu. (Loma 12:13e, NW) Ko hono fai ha tokoni ki hotau fanga tokoua mo e fanga tuofāfine fakalaumālié ko e taha ia ʻo e ngaahi founga lahi ʻoku tau fakahā ai ʻa e ʻofa faka-Kalaisi ʻoku tau maʻu ʻiate kitautolú.—Sione 13:35.