Ko e Tomuʻa Teuteú ʻOkú Ne ʻOmai ʻa e Fiefia
1 Ko e kau ki he ngāue fakamalangá ʻokú ne ʻomai kiate kitautolu ʻa e fiefia lahi. (Sāme 89:15, 16) Ko e moʻoni, ko e teuteú ko ha ʻelemēniti tefito ia ʻi he malava ke hokosia kakato ʻa e fiefia ko iá. Ko e lelei ange ʻo ʻetau teuteú, ko e lahi ange ia ʻo ʻetau lavameʻá, pea ko e lahi ange ʻetau lavameʻá, ko e lahi ange ia ʻo ʻetau fiefiá.
2 Ngāueʻaki ʻa e Ngaahi Meʻangāue Kuo Tokonaki Maí: Kamataʻaki hoʻo teuteú ʻaki hono lau mo sivisiviʻi ʻa e fakamatala ʻi he ʻEtau Ngāue Fakafaifekau ʻo e Puleʻanga. ʻOku faʻa tokonaki mai ai ʻa e ngaahi tuʻuaki ʻosi fokotuʻutuʻu lelei ʻa ia ʻoku faʻufaʻu ia ke tokoniʻi koe ke faingofua pea ola lelei ʻa hoʻo ʻoatu ʻa e pōpoaki ʻo e Puleʻangá. Te ke maʻu ai ʻa e ngaahi fakatātā ʻo e founga ke ikuʻi ai ʻa e ngaahi fakafepaki anga-mahení. ʻOku ʻomai ai ʻa e ngaahi fakakaukau pau ki he founga ke fai ai ha toe ʻaʻahi ola lelei, mo e taumuʻa ke kamata ha ako Tohitapu. ʻOkú ke maʻu ʻa e tauʻatāina ke liliu ʻa e ngaahi fokotuʻu ko ʻení ki he poini ʻa ia ʻokú ke ongoʻi fiemālie ʻi hono ngāueʻaki kinautolú. Tānaki atu ki he meʻá ni, ʻokú ke maʻu ʻa e kiʻi tohi Founga ke Kamata mo Hoko Atu ʻa e Fetalanoaʻaki Fakatohitapú, ʻa ia ʻokú ne ʻomai ha ngaahi lea kamata kehekehe lahi pea pehē foki ki he ngaahi tali ki he ngaahi taʻofiʻanga ʻo e fetalanoaʻakí, ʻo tokoni ia kiate koe ke ke hoko ʻo ola lelei ange ʻi he ngaahi tuʻunga lahi ʻokú ke fetaulaki mo iá.
3 Vakaiʻi ʻa e tohi te ke tuʻuakí, pea fili ha poini fakamānako mahuʻinga ʻe taha pe ua ʻe lava ke ke fakahā ki he tokotaha-ʻapí. Ko ha ongoongo fakatupunga fakakaukau naʻá ke fanongo pe lau fekauʻaki mo ia te ne ʻoatu nai kiate koe ha faingamālie ke kamata ha fetalanoaʻaki. Tomuʻa fakakaukauʻi ha ngaahi fakafepaki anga-maheni ʻoku ngalingali te ke fetaulaki mo ia, pea fai ha ngaahi fakakaukau ki he founga nai te ke taliʻakí. ʻAhiʻahiʻi leva ʻi ha ngaahi miniti siʻi ʻa e meʻa te ke leaʻaki ʻi he matapaá.
4 Kau ki he Fakataha Ngāue Kotoa Pē: Fanongo tokanga he lolotonga ʻo e Fakataha Ngāué ʻi he taimi ʻoku fetalanoaʻaki ai, fakamanatu, pea fakahāhā ʻa e ngaahi fokotuʻu ʻi he ʻEtau Ngāue Fakafaifekau ʻo e Puleʻanga. Fakatokangaʻi ʻa e ngaahi fakakaukau ʻokú ke ongoʻi ʻe lava ke fakakau atu ki hoʻo tuʻuakí. Fakamanatuʻi ha niʻihi ʻo e ngaahi tuʻunga kuó ke faʻa fetaulaki mo ia ʻi he ngāue fakafaifekaú, pea fakakaukau fekauʻaki mo e ngaahi founga ʻa ia te ke lava ke faifakamoʻoni ola lelei ange aí. Talanoa fekauʻaki mo e ngaahi meʻá ni mo e kau malanga kehé ki muʻa, pea mo e hili ʻa e fakatahá.
5 ʻOku lava ke ke fakapapauʻi kapau ʻokú ke “teu ki he ngaue lelei kotoa pe,” ʻe fakapaleʻiʻaki koe ʻa e fiefia lahi ange mo e lavameʻa ʻi hono tokoniʻi ʻa e niʻihi kehé ke nau maʻu ʻa e hala ki he moʻuí.—2 Tim. 2:21.