Ko e Folofola Fakaekikite ʻa e ʻOtuá ʻE Hoko Moʻoni Kotoa!
1 Kuo mahuʻingaʻia maʻu pē ʻa e Kau Fakamoʻoni ʻa Sihová ʻi he kikite ʻa e Tohitapú. Ko ia naʻa tau fiefia ʻi hono ʻilo ko e kaveinga ʻo e fakataha-lahi fakavahe ʻo e taʻu ní ko e “Folofola Fakaekikite ʻa e ʻOtuá.” Naʻa tau loto-vēkeveke ke ʻilo ʻa e meʻa naʻe tuku tauhi ʻe Sihova maʻatautolu ʻi he tuʻunga ko e “mea kai i hono taimi totonu.” (Mt. 24:45, PM) Naʻe ʻikai te ne fakasivaʻi ʻetau ʻamanakí.
2 Ngaahi Konga Lalahi ʻo e Fakataha-Lahí: Ko e malanga he tefitoʻi fakakaukaú ʻi he Falaité, ko e “Tokanga ki he Folofola Fakaekikite ʻa e ʻOtuá,” naʻe kau ai ha lāulea fakamaama ki he fakamatala ʻo e fakasinokehé. (Mt. 17:1-9) Naʻe fakamamafaʻi mai ai ko e taimi ní ʻoku tau ʻi he hūʻanga ki he taimi lelei tahá koeʻuhí ʻoku tau fuʻu ofi ʻaupito ki he taimi ʻo e ngataʻangá, fakataha mo e fokotuʻutuʻu foʻoú ʻi muʻa pē ai! Ko ha founga mahuʻinga ʻa ia ʻoku fiemaʻu ai kiate kitautolu ke tau tokanga ki he Folofola ʻa e ʻOtuá ko hono lau maʻu pē ia. Ko e malanga fakakongokonga, “Fiefia ʻi Hono Lau ʻa e Folofola ʻa e ʻOtuá” naʻe tokonaki mai ai ʻa e ngaahi fokotuʻu ʻaonga ki hono ʻai ʻetau lau Tohitapú ke ʻaonga mo fakafiefia ange.
3 ʻI he efiafi Tokonakí naʻa tau fakamanatu ai ʻa e ngaahi ʻuhinga ʻoku totonu ai ke tau tuipau ʻoku tau moʻui ʻi he ngaahi ʻaho fakaʻosí. ʻOku lava ke ke manatuʻi kotoa ʻa e ngaahi meʻá ni? Ko e pongipongi Sāpaté, naʻe hoko ai ʻo moʻui ʻa e kikite ʻa Hapakuké ʻi heʻetau ako ʻo ʻilo ko hotau taimí ʻoku faitatau vāofi mo hono taimí pea ʻoku vavé ni ke hoko mai ʻa e ngaahi meʻa mahuʻinga ʻi he taimi ʻe fakaʻauha ai ʻe Sihova ʻa e fulikivanú kae fakahaofi ʻa e māʻoniʻoní. Naʻá ke maʻu ʻa e ʻuhinga ʻo e tulama faka-Tohitapu fekauʻaki mo Sēkope mo ʻĪsoá? Kuo pau ke tau tulimui longomoʻui ki he ngaahi tāpuaki meia Sihová, ʻo talitekeʻi ʻa e laumālie ʻo e loto-noá mo e taʻetokangá.
4 Ko ha Tohi Foʻou Mātuʻaki Mahuʻinga: He fiefia ē ka ko kitautolu ke maʻu ʻa e tohi foʻou, Pay Attention to Daniel’s Prophecy! ʻOku ʻikai ha veiveiua kuó ke ʻosi kamata ke lau ʻa e tohi fakamānako ko ʻení. Naʻe fakahā ʻe he tokotaha malanga naʻá ne tukuange mai iá: “Tuku kehe ha ngaahi fakamatala siʻisiʻi ʻe niʻihi, ko e kotoa ʻo e ngaahi kikite ʻi he tohi Tanielá kuo ʻosi fakahoko.” ʻIkai ʻoku fakamamafaʻi ai ʻa e fakavavevave ʻo hotau taimí?
5 Kuo fakaivimālohiʻi lahi ʻe he polokalama ʻo e fakataha-lahí ʻetau tuipau ko e kotoa ʻo e ngaahi talaʻofa ʻa e ʻOtuá ʻoku teʻeki ke fakahokó ʻe hoko moʻoni. ʻOku ueʻi ai kitautolu ke tau hanganaki fakahā atu ki he niʻihi kehé ʻa e folofola fakaekikite ʻa e ʻOtuá!