ʻOkú Ke Teu Hiki?

ʻI he tali ʻio ki he fehuʻi ko iá, ʻoku ʻi ai ʻa e ngaahi meʻa lahi ʻoku fiemaʻu kiate koe mo e niʻihi kehé ke tomuʻa fai. ʻI he muimui ki he ngaahi sitepu tefito ʻoku hā ʻi laló, ʻe vave leva hoʻo kau papau ʻi hoʻo fakatahaʻanga foʻoú.

(1) ʻI hoʻo ʻiloʻi pē ʻa e feituʻu te ke ʻalu ki aí, ʻe malava nai ke maʻu ʻe he sekelitali ʻo hoʻo fakatahaʻanga lolotongá ʻa e tuʻasila ʻo e Fale Fakatahaʻanga ʻo hoʻo fakatahaʻanga foʻoú. ʻI he aʻu ki he feituʻu ko iá, kumi leva ki he holó pea fakapapauʻi ʻa e ngaahi taimi ʻo e fakataha ʻa e fakatahaʻangá. Kapau ko e fakatahaʻanga ʻe taha pe lahi hake ʻoku nau ngāueʻaki ʻa e Fale Fakatahaʻangá, kole ki he kau mātuʻá ke nau tala atu kiate koe, pe ko fē ʻa e vāhenga-ngāue fakatahaʻanga ʻokú ke ʻi aí. ʻOua ʻe toe toloi ʻa hoʻo maʻu ʻa e ngaahi fakatahá pea mo e ʻai ke maheni mo e kau mātuʻa fakalotofonuá.

(2) Ko e ongo sekelitali ʻo hoʻo fakatahaʻanga lolotongá pea mo hoʻo fakatahaʻanga foʻoú fakatouʻosi te na fengāueʻaki ʻi hono feʻaveʻaki ʻo e ngaahi kaati Congregation’s Publisher Record kiate koe pea mo ho fāmilí. ʻE toe fakafolau atu foki ha tohi fakafeʻiloaki ki he kau mātuʻa ʻo hoʻo fakatahaʻanga foʻoú. (Sio ki he Puha Fehuʻi ʻo ʻEtau Ngāue Fakafaifekau ʻo e Puleʻanga ʻo Fepueli 1991.) Ko e Kōmiti Ngāue ʻa e Fakatahaʻanga ʻi aí ʻoku totonu ke ne fakahā ki he tokotaha faiako ako tohi feʻungamālié fekauʻaki mo hoʻo aʻu atú koeʻuhi ke ne malava ʻo fetuʻutaki atu kiate koe pea tokoniʻi koe ke ke ʻiloʻi hoʻo kulupu ako tohi foʻoú.​—Loma 15:7.

(3) Ko e kau malanga kotoa pē ʻi hoʻo fakatahaʻanga foʻoú ʻoku nau maʻu ʻa e tafaʻaki fakafiefia ke fai​—ʻa ia ko ʻenau fakamaheni atu kiate koe pea ʻai koe ke ke ongoʻi ʻoku talitali lelei koe. (Fakafehoanaki mo 3 Sione 8.) Ko ia ai, ʻoku ʻuhinga ʻení kuo pau ke ke ʻi he ngaahi fakatahá koeʻuhi ke ke malava ai ʻo fiefia ʻi he fefakalototoʻaʻaki mo e felangahakeʻaki mo e fanga tokouá mo e fanga tuofāfiné.

(4) ʻOku totonu ke ʻoua te ke toe tatali kae ʻoua ke kakato ʻa e ngāue kotoa pē fekauʻaki mo hoʻo hikí ki muʻa ke ke kau ki he ngāue fakafaifekaú fakataha mo hoʻo fakatahaʻanga foʻoú. ʻI hoʻo fakamuʻomuʻa ʻa e ngaahi meʻa mahuʻinga ʻo e Puleʻangá, ʻe toki hoko atu ʻa e tokanga ia ki he ngaahi meʻa kehé, pea te ke ongoʻi fiemālie ange ʻi ho ʻātakai foʻoú. (Mt. 6:33) ʻI hoʻo maau ʻi ho ʻapi foʻoú, te ke saiʻia nai ke fakaafeʻi ha niʻihi mei he fakatahaʻangá ke ʻaʻahi atu ʻo toe lelei ange ai ʻa e femaheniʻakí.​—Loma 12:13e.

Ko e hikí ko ha ngāue lahi. Kae kehe, ʻi hono fai ʻe he tokotaha kotoa pē ʻoku kau ki aí ʻa e meʻa kuo fokotuʻu atú, ʻe ʻikai ai ke ʻi ai ha holomui fakalaumālie. ʻE maongo lelei ki he tokotaha kotoa pē ʻoku kau ki aí ʻa ʻetau feʻofaʻaki fakatokoua faka-Kalisitiané.