Ko e Hā Te Ke Leaʻaki ki ha Mosilemi?
1 Kuó ke hokosia ha faifakamoʻoni ki ha Mosilemi? Kapau ko ia, ngalingali kuó ke ako ʻoku maʻu ʻe he kau Mosilemí ha tui loto-māfana ki he ʻOtuá. Kae kehe, ʻoku nau ʻilo siʻisiʻi fekauʻaki mo e Palataisi ka hoko mai ki he māmaní hangē ko ia naʻe tomuʻa tala ʻe he kau palōfita ʻa Sihová, pea te tau saiʻia ke vahevahe ʻa e ʻamanaki ko iá mo kinautolu. (1 Tim. 2:3, 4) Ko e fakamatala hoko haké ʻoku totonu ke ne tokoniʻi koe ke ke fai ha fakamoʻoni lelei.
2 ʻOku tui ʻa e kau Mosilemí kia ʻAla, pe ʻOtuá, pea ʻoku nau tui ko Mahōmetí ko e palōfita ʻa e ʻOtuá. Ko ʻenau tohi māʻoniʻoní ko e Kōlaní, pea ko ʻenau lotú ʻoku ui ko e ʻIsilamí, ʻa ia ʻoku ʻuhingá ko e “anganofo.” ʻOku fakahā ʻe he Kōlaní ko e loí pea mo e lotu ki he ngaahi ʻaitolí ʻoku hala, ʻa ia ʻoku taha pē ʻa e ʻOtuá, pea ko iá ʻoku ʻikai ko ha konga ʻo ha Tolu-Tahaʻi-ʻOtua. ʻIkai ko ia pē, ʻokú ne akoʻi ʻa e taʻefaʻamate ʻa e soulú, afi ʻo helí, pea mo ha palataisi fakahēvani. ʻOku tali ʻe he kau Mosilemí ʻa e Tohitapú ko e Folofola ʻa e ʻOtuá ka ʻoku nau tui kuo ʻosi liliu ia, lolotonga iá ko e Kōlaní, ʻoku kei ʻi hono muʻaki leá, kuo tauhi ia ke haohaoa.
3 ʻAi ke Anga-Fakakaumeʻa, Fakapotopoto, mo ʻIloʻilo: ʻI he fetalanoaʻaki mo ha Mosilemi, ʻai ke anga-fakakaumeʻa mo fakapotopoto. (Pal. 25:15) Manatuʻi ko e ngaahi tui ʻa e Mosilemí kuo ʻosi fokotuʻu maʻu pea ko e lahi taha ʻo kinautolú kuo akoʻi maʻuloto. Ko ia ai, ko e fakaʻuhinga ʻi he ngaahi akonaki fakalotú pea fakamoʻoniʻi kiate kinautolu ʻa e meʻa ʻoku finangalo ki ai ʻa e ʻOtuá kuo ʻikai hoko ia ko ha konga ʻo ʻenau fakalakalaka fakalaumālié. (Loma 12:2) Ke tokoniʻi ʻa e kau Mosilemí, ʻoku mātuʻaki mahuʻinga ʻa e anga-kātakí mo e mahinoʻí.—1 Kol. 9:19-23.
4 Fakaʻehiʻehi mei hono ngāueʻaki ʻa e ngaahi kupuʻi lea ʻe fakafehokotaki ai koe ʻe ha tokotaha Mosilemi mo e Puleʻanga-Haʻa-Kalisitiané. ʻAi ke mahino ʻoku ʻikai ko ha konga koe ʻo e lotu Katoliká pe Palotisaní, ʻokú ke kehe pē koe. Lave ki he Tohitapú ko e Tohi ʻa e ʻOtuá. Koeʻuhi ʻoku maʻu ʻe he kau Mosilemí ʻa e fehiʻa ki he foʻi lea ko e “ʻAlo ʻo e ʻOtua,” ʻoku faʻa lelei tahá ke ʻoua ʻe ngāueʻaki ia pe ke fetalanoaʻaki ki he kaveinga ko ʻení kae ʻoua kuo fai ha fakalakalaka fakalaumālie. Kae kehe, te ke lava ʻo lea fekauʻaki mo Sīsū, ʻo lave kiate ia ko ha palōfita pe talafekau. Fakaʻehiʻehi mei he fakakikihí. Kapau ʻokú ke fakatokangaʻi ʻoku kamata ke hā mai ha ʻita, mavahe anga-fakaʻapaʻapa leva koe.
5 ʻOku lelei tahá ke lea ki ha tokotaha pē kae ʻikai ki ha kulupu. ʻOku faʻa lelei ange ki he kakai fefiné ke fakamoʻoni ki he kakai fefine, pea ko e kakai tangatá, ki he kakai tangata. ʻOku hā mahino, ʻoku ʻi ai ʻa e ngaahi tuʻunga kehe mei heni, ka ʻoku totonu ke ngāueʻaki ʻa e fakafuofua leleí. ʻIkai ko ia pē, ko e kau Mosilemi tokolahi ʻoku nau ongongofua fekauʻaki mo e meʻa ʻoku nau fakakaukau ki ai ʻoku taʻetaau ʻi he vala mo e teuteu ʻa e kakai fefiné. ʻOku fiemaʻu ki he fanga tuofāfiné ke nau tokanga ʻi he fekauʻaki mo e meʻá ni.—1 Kol. 10:31-33.
6 Ngaahi Meʻa ke Talanoa ʻo Kau ki Aí: Lea hangatonu fekauʻaki mo e lahi ʻo e ʻOtuá pea mo ʻene ʻofá. ʻOua ʻe toumoua ke fakahā ko koé ko ha tokotaha tui moʻoni, ko e ʻOtuá ʻoku taha pē (ʻikai ko ha Tolu-Tahaʻi-ʻOtua), pea ʻoku hala ʻa e lotu ʻaitolí. Lea fekauʻaki mo e fulikivanu ʻi he māmaní he ʻahó ni—ʻa e ngaahi tau, taʻemanonga ʻa e kakaí, fetāufehiʻaʻaki fakamatakalí, pea mo e mālualoi ko ia ʻoku hā moʻoni ʻi he lotolotonga ʻo e kakai lotu tokolahi.
7 Ko e polosiua ko e The Guidance of God—Our Way to Paradise te ne ʻomai kiate koe ʻa e fakamaama lahi ange ki he ngaahi tuʻunga-lea ʻa ia te ke lava ke ngāueʻaki ke kamata ha ngaahi fetalanoaʻaki mo e kau Mosilemí. ʻOku faʻu ia ke fakamānako ki he kau Mosilemi ʻoku nau nofo ʻi ha ʻātakai ʻa ia te nau ongoʻi tauʻatāina nai ai ke ako ʻa e Tohitapú.
8 ʻI ha tuʻunga ko ha tuʻuaki, te ke leaʻaki nai:
◼ “ʻOku ou fai ha feinga makehe ke talanoa ai mo e kau Mosilemí. Kuó u lau fekauʻaki mo hoʻomou lotú peá u tui ʻoku ou tonu ʻi heʻeku pehē ko e kau Mosilemí ʻoku nau tui ki he ʻOtua moʻoni pē ʻe tahá pea ʻi he kotoa ʻo e kau palōfitá. [Tuku ke ne tali.] Te u saiʻia ke talanoa mo koe ʻo kau ki ha kikite ʻi muʻa ʻa ia naʻá ne tomuʻa tala ʻa e liliu ʻo e māmaní ki ha palataisí. ʻE lava ke u lau atu kiate koe ʻa e meʻa naʻe tohi ʻe he palōfitá? [Lau ʻa e Aisea 11:6-9.] ʻOku ʻai au ʻe he kikite ko ʻení ke u fakakaukau ki ha fakamatala mei he Kōlaní ʻa ia ʻoku maʻu ʻi he polosiua ko ʻení.” Huke ki he peesi 9 ʻi he polosiua Guidance of God, pea lau ʻa e fakamatala ʻi he tohi mata-lalahí ʻa ia ʻoku lave ki he faʻahinga faitotonú te nau maʻu ʻa e māmaní. Kapau ʻoku hā mai ha mahuʻingaʻia, hoko atu ʻa e fetalanoaʻakí ʻaki ʻa e fakamatala ʻo e palakalafi 7 ki he 9 ʻi he peesi hoko maí. Tuku ʻa e polosiuá, pea fokotuʻutuʻu ki ha toe ʻaʻahi.—Ki ha tuʻuaki ʻe taha, sio ki he ʻEtau Ngāue Fakafaifekau ʻo e Puleʻanga ʻo Fepueli 1998, peesi 6, palakalafi 27.
9 ʻI he tuʻuaki ki ha tokotaha ke fai ha lāulea ki he polosiua Guidance of God, ʻoku lelei tahá ke ui ia ko ha fetalanoaʻaki, ʻo ʻikai ko ha ako Tohitapu. ʻI hoʻomo fakaʻosi ʻa e polosiuá, ʻoku totonu ke mateuteu ʻa e tokotaha akó ke ako ʻa e polosiua Fiemaʻu pe ko e tohi ʻIlo. Ko e ngaahi tohi kehe kuo faʻu tautefito maʻá e kau Mosilemí ko e tuleki ko e How to Find the Road to Paradise pea mo e kiʻi tohi ko e The Time for True Submission to God.
10 ʻI he ʻilo ko ʻeni ʻo e ngaahi tui mo e ngaahi ongoʻi faka-ʻIsilamí, ʻoku lava ke tau ʻiloʻilo ai ʻi hono filifili ʻetau ngaahi tohi ko ia ke tuʻuaki ki he kau Mosilemí pea ʻi he founga ke tau faifakamoʻoni ai kiate kinautolú. ʻOfa ke hokohoko atu hono tāpuakiʻi ʻe Sihova ʻetau ngaahi feinga ke tokoni ki he kakai ʻo e matakali kehekehe kotoa pē ke nau ui ki hono huafá ka nau moʻui.—Ng. 2:21.