Ko e Hā ʻe Lava Ke Ne Tokoniʻi Kitautolu Ke Tau Tuʻumaʻu ʻi he Tuí?
1 Talu ʻetau kamata feohi mo e kautaha ʻa Sihová, mo e fakamoʻoniʻi ʻa e hoko ʻa ʻetau fakalakalaka fakalaumālié ko ha matavai ia ʻo e fiefiá kiate kitautolu! Ka, ke tuʻumaʻu ʻo ‘aka, langa hake, mo kaukaua ʻi he lotú,’ ʻoku fiemaʻu ke hokohoko atu ʻa e tupulaki fakalaumālié. (Kol. 2:6, 7) Lolotonga ko e tokolahi taha kuo nau lakalakaimonū fakalaumālie, kuo ʻauhia mamaʻo atu ʻa e niʻihi koeʻuhi ko e ʻikai ke “tuʻuʻaki ʻa e tui.” (1 Kol. 16:13) ʻOku lava ke tau taʻofi ʻeni mei haʻane hoko mai kiate kitautolu. ʻO anga-fēfē?
2 Ngāue Fakalaumālie Tuʻumaʻu: Fokotuʻu ha taimi-tēpile fakalaumālie lelei ʻi loto ʻi he kautaha ʻa Sihová. ʻOku tokangaʻi lahi heni ʻa ʻetau ngaahi fiemaʻu fakalaumālié. Ko e ngaahi fakataha ʻa e fakatahaʻangá, ngaahi ʻasemipilií, mo e ngaahi fakataha-lahí ʻoku nau fakaʻaiʻai kitautolu ke tupu mo tuʻumaʻu fakalaumālie lahi ange, kapau ʻoku tau mau tuʻumaʻu kinautolu ke utu ʻa hono ngaahi olá. (Hep. 10:24, 25) Ko e founga tuʻumaʻu ʻo hono lau ʻa e Tohitapú, ko e ngaahi makasini Taua Leʻo mo e Awake!, pea mo e ngaahi tohi ko ia ʻoku nau fakamatalaʻi ʻa e ngaahi meʻakai ʻo e Folofola ʻa e ʻOtuá te ne fakatupunga hotau ngaahi aka fakalaumālié ke tupu ʻo loloto mo mālohi. (Hep. 5:14) Ko hono fokotuʻu ha ngaahi taumuʻa fakalaumālie fakafoʻituitui pea ngāue tōtōivi ke aʻusia kinautolú te ne toe ʻomai ai ʻa e ngaahi ʻaonga tuʻuloa.—Fili. 3:16.
3 Tokoni mei he Faʻahinga Matuʻotuʻá: Kumi ke fano atu ʻi he feohi mo e faʻahinga matuʻotuʻa fakalaumālie ʻi he fakatahaʻangá. ʻAi ke ʻiloʻi ʻa e kau mātuʻá, ʻi honau tuʻunga ko e faʻahinga tefito ʻoku lava ke nau fakaivimālohiʻi kitautolu. (1 Tes. 2:11, 12) Talitali lelei ha ngaahi akonaki pe ha ngaahi fokotuʻu te nau ʻomai nai. (Ef. 4:11-16) ʻOku toe mahuʻingaʻia ʻa e kau sevāniti fakafaifekaú ʻi hono tokoniʻi ʻa e niʻihi kehé ke nau tuʻumaʻu ʻi he tuí, ko ia ai hanga ki he fanga tokoua ko ʻení ki ha fakalototoʻa.
4 ʻOku fiemaʻu kiate koe ha tokoni ʻi he ngāue fakafaifekaú? Lea ki he kau mātuʻá, pea kole ha tokoni. Mahalo pē ʻe lava ke fakakau koe ʻi he polokalama Tokoniʻi ʻe he Kau Tāimuʻá ʻa e Niʻihi Kehé. Ko ha tokotaha papitaiso foʻou koe? Ko hono ako ʻa e tohi ko e Our Ministry pea ngāueʻaki ʻa e meʻa ʻoku ʻi aí te ne fakaʻaiʻai ʻa e fakalakalaka atu ki he matuʻotuʻa fakalaumālié. Ko ha mātuʻa tauhi fānau koe? Hokohoko atu ʻa hoʻomou fakaivimālohiʻi ʻa e tuʻunga fakalaumālie ʻo hoʻomou fānaú.—Ef. 6:4.
5 ʻI he hoko ʻo faiaka mo tuʻumaʻu ʻi he tuí, te tau fiefia ai ʻi he vahaʻangatae melino mo Sihova mo e feohi māfana mo hotau fanga tokouá. ʻOku malava ai heni kiate kitautolu ke tau matuʻuaki ʻa e ngaahi ʻohofi ʻa Sētané, pea fakaivimālohiʻi ʻetau ʻamanaki ki ha kahaʻu taʻengatá.—1 Pita 5:9, 10.