ʻOku Tau Malangaʻi ʻa e Ongoongo Leleí
1 Ko ha monū fakaofo ē ʻoku tau maʻu ke hoko ko e kau ʻave ʻo e “ogoogo fiefia oe gaahi mea lelei!” (Loma 10:15, PM) ʻOku tau maʻu ha pōpoaki fakaivifoʻou ke vahevahe ki he kakai ʻoku ʻātakaiʻi ʻe he moveuveú mo e mole ʻa e ʻamanakí. ʻE lava fēfē ke tau tokoniʻi kinautolu ke nau ʻilo ʻoku tau tuʻuaki atu ʻa e “ongoongo lelei ʻo e meʻa ʻoku lelei ange?”—Ai. 52:7, NW.
2 Teuteu ha Pōpoaki Pau: Ko ʻetau ngaahi fetalanoaʻaki ʻi he ngāue fakafaifekaú ʻe ʻi ai hono ola lelei kapau te tau fakahangataha ki he ngaahi meʻa leleí. Ko ia ai, ʻi hono teuteu ʻetau tuʻuakí pea fakamanatu ʻa e tohi te tau tuʻuakí, ʻoku fiemaʻu ke tau fakaeʻa ha ngaahi tafaʻaki pau ʻo e pōpoakí. ʻI hono ʻoatu ʻetau ʻamanaki makatuʻunga ʻi he Tohitapú ʻaki ʻa e tuipaú mo e loto-māfaná, ʻe lava ke tau ʻamanekina ai ha ngaahi ola fakalototoʻa.—Pal. 25:11.
3 Neongo ʻoku tau kaungāmamahi ʻi he taimi ʻoku fakahaaʻi mai ai ʻe he kakaí ʻa e founga ʻoku uesia ai kinautolu ʻe he ngaahi tuʻunga kovi ʻo e māmaní, ʻoku totonu ke tau tala ange kiate kinautolu ko e fakaleleiʻanga moʻoni ki he ngaahi palopalema ʻa e tangatá, ko e Puleʻanga ʻo e ʻOtuá. Naʻa mo e taimi ʻoku fakamatalaʻi ai ʻa e hoko mai ʻo e “aho oe houhau” ʻo Sihová, ʻoku tau fiemaʻu ke fakahaaʻi ange ʻa e founga ʻoku ʻuhinga moʻoni ai ʻeni ko e “ogoogolelei ki he agamalu.” (Ai. 61:1, 2, PM) ʻOku lava ke tau toe fakapapauʻi ange ki heʻetau kau fanongó ko e meʻa kotoa pē ʻoku fai ʻe Sihová ʻe faifai pē ʻo ne ʻomai ʻa e fiefia lahi taha pea mo e ola lelei taha ʻe ala lavá.
4 ʻOatu ʻa e Moʻoní ʻAki ʻa e Fiefia Moʻoni: ʻI he taimi ʻoku fakatokangaʻi ai ʻe he kakaí ʻetau fofonga fiefia mo e tuipau ʻi he tō ʻo hotau leʻó, ʻoku nau vave ange ai ke fanongo. Kapau te tau tapua atu ha fakakaukau fakatuʻamelie, ʻe ʻiloʻi ai ʻe heʻetau kau fanongó ʻoku tau “fiefia i he amanaki.” (Loma 12:12, PM) Ko ia, ʻoku nau hehema ange nai ai ke tali ʻa e ongoongo leleí. Ko hono moʻoní, ʻoku tau maʻu maʻu pē ʻa e ʻuhinga lelei ke fakahā ha fakakaukau pau, mo fakafiefia ʻi he tafaʻaki kotoa pē ʻo ʻetau ngāue fakafaifekaú.
5 ʻI he tuʻunga ko e kau faifekau ʻo e ongoongo leleí, ʻoku tau fai ʻa e meʻa lahi mamaʻo ange ia ʻi hono fakamatalá pē. ʻOku ʻoatu ʻe heʻetau malangá ha ʻamanaki papau ʻo ha moʻui lelei ange he taimí ni pea pehē ki he kahaʻú. (1 Tim. 4:8) ʻI heʻetau lea ki he tokotaha taki taha, ko ʻetau fakakaukau paú ʻe tapua atu ia ʻi he meʻa ʻoku tau leaʻakí pea te ne tokoniʻi ʻa e kakaí ke nau tali ʻa e ongoongo leleí. ʻI hono fai ha tokanga ki he meʻa ʻoku tau leaʻakí pea mo e founga ʻoku tau leaʻaki iá, tau fakaʻaiʻai ʻa e faʻahinga loto-totonú ke nau koloaʻaki ʻa e ongoongo lelei fakafiefia ko ia ʻoku tau malangaʻí!