Faʻifaʻitaki ki Hotau ʻOtua Fiefia ko Sihová
1 ʻOku fiemaʻu moʻoni ʻe Sihova ʻa e kakaí ke nau fiefia. ʻOku hanga ʻe heʻene Folofolá ʻo fakafonu kitautolu ʻaki ʻa e fakatuʻamelie ki he ngaahi tāpuaki fakaofo ʻokú ne tuku tauhi maʻá e faʻahinga ʻo e tangatá. (Ai. 65:21-25) ʻOku totonu ke hā mahino ki he niʻihi kehé ʻoku tau maʻu ʻa e fiefiá ʻi hono vahevahe atu kiate kinautolu ʻa e “Kosipeli ʻo e langilangi ʻo e ʻOtua Mohu Monuʻia” pe fiefiá. (1 Tim. 1:11) Ko e founga ʻo ʻetau talanoa fekauʻaki mo e pōpoaki ʻo e Puleʻangá ʻoku totonu ke tapua atu ai ʻetau ʻofa ki he moʻoní pea mo ʻetau mahuʻingaʻia moʻoni ʻi he kakai ʻoku tau lea ki aí.—Loma 1:14-16.
2 Ko hono moʻoní, ʻe lava ke faingataʻa ʻi he taimi ʻe niʻihi ke tauhi maʻu ha loto-fiefia. ʻI he ngaahi feituʻu ngāue ʻe niʻihi, ʻoku tau maʻu ai ha kakai tokosiʻi ʻoku nau tali lelei ʻa e pōpoaki ʻo e Puleʻangá. ʻOku ʻi ai nai ʻa e ngaahi ʻaho te tau fehangahangai ai mo e ngaahi tuʻunga faingataʻa ʻi heʻetau moʻuí tonu. Ke tauhi maʻu ha loto-fiefiá, ʻoku totonu ke tau fakakaukau ki he lahi ʻo e fiemaʻu ʻe he kakai ʻi hotau feituʻu ngāué ke nau fanongo pea mahinoʻi ʻa e ongoongo lelei ʻo e Puleʻangá ʻoku tau malangaʻí. (Loma 10:13, 14, 17) ʻI he fakakaukauloto atu ki he meʻá ni ʻe tokoniʻi ai kitautolu ke tau hokohoko fiefia atu ʻa hono ʻai ke ʻiloa ʻa e ngaahi tokonaki anga-ʻofa ʻa Sihova ki he fakamoʻuí.
3 Tokangataha ki he Ngaahi Meʻa ʻOku Leleí: ʻOku toe fiemaʻu ke tau tokanga ki he meʻa ʻoku tau leaʻakí. Neongo te tau kamataʻaki nai ha fetalanoaʻaki ʻo lave ki ha palopalema pe ko ha ngaahi ongoongo ʻa ia ʻoku ʻi he fakakaukau ʻa e kakaí, ʻoku totonu ke tau fakaʻehiʻehi mei he nōfoʻi ʻa ia ʻoku ʻikai fiemaʻu, ʻi he ngaahi meʻa ʻoku ʻikai ke leleí. Ko ʻetau ngāué ko hono “omi ae ogoogolelei oe lelei.” (Ai. 52:7, PM; Loma 10:15) Ko e ongoongo lelei ko ʻení ko ha pōpoaki ia ʻoku makatuʻunga ʻi he ngaahi talaʻofa ʻa e ʻOtuá ki ha kahaʻu fiefia. (2 Pita 3:13) ʻI he fakakaukau ki he meʻá ni, ngāueʻaki ʻa e ngaahi Konga Tohi Tapú ke “haʻihaʻi ʻa e kakai ʻoku loto mafesi.” (Ai. 61:1, 2) ʻE tokoniʻi ai heni ʻa kitautolu taki taha ke tau tauhi maʻu ha loto-fiefia pea mo ha ʻulungāanga lelei.
4 ʻE fakatokangaʻi moʻoni ʻe he kakaí ʻetau loto-fiefia he kau ki he ngāue fakamalangá. Ko ia ai, ʻofa ke tau tapua atu maʻu pē ʻa e ʻulungāanga ʻa hotau ʻOtua fiefia ko Sihová, ʻi heʻetau vahevahe atu ʻa e ongoongo lelei ʻo e Puleʻangá ki he kakai ʻi hotau feituʻu ngāué.