Kole ha Tokoni
1 Ko e ngaahi lea fakamānavaʻi “faingataʻa ke fekuki mo iá” ʻokú ne fakamatalaʻi feʻungamālie hotau ngaahi taimi faingataʻá. (2 Tim. 3:1, NW) Ko ia, ko e hā ʻoku malava ke ke fai ʻi he taimi ʻokú ke fetaulaki ai mo e ngaahi pole fakalaumālie faingataʻa ʻa ia ʻokú ke ongoʻi taʻemateuteu nai ke fehangahangai mo ia?
2 ʻOkú ke loto-lelei ke talanoa ki ha mēmipa matuʻotuʻa fakalaumālie ʻo e fakatahaʻangá? ʻOku toumoua nai ʻa e niʻihi ke fai pehē koeʻuhi ko e ongoʻi mā, ʻo ʻikai fiemaʻu ke fakakavenga, pe veiveiua pe ʻe malava moʻoni ke tokoni ha taha. Ko e moʻoni, ʻoku totonu ke tau feinga ke tokanga ki hotau ngaahi fatongia fakafoʻituituí ʻi he lelei taha te tau malavá, ka ʻoku totonu ke tau ongoʻi tauʻatāina maʻu pē ke kumi tokoni ʻi he ngaahi meʻa ʻoku kaunga ki heʻetau lelei fakalaumālié.—Kal. 6:2, 5.
3 Feituʻu ke Kamata Aí: Te ke fiemaʻu nai ke ke lea ki hoʻo faiako ako tohí pea kole ange pe ʻe malava ke ke ngāue mo ia ʻi he ngāue fakamalangá. ʻE ʻoatu ai heni kiate koe ha faingamālie ke ke tala ange ai kiate ia fekauʻaki mo hoʻo holi ke tupulekina fakalaumālié. Kapau ko ha sevāniti fakafaifekau ia, ʻai ke ne ʻilo ki hoʻo fiemaʻu ha tokoni fakalaumālié pea te ne kole ki he kau mātuʻá ke tokoniʻi koe. Pe ko hoʻo lea nai ki ha taha pē ʻo e kau mātuʻá fekauʻaki mo e ngaahi meʻa ʻokú ke tokanga ki aí.
4 Ko e hā ʻa e faʻahinga tokoni ʻokú ke fiemaʻú? Kuo ʻi ai ha meʻa kuó ne fakasiʻisiʻia hoʻo faivelengá? Ko ha mātuʻa taʻemali koe ʻokú ke feinga ke tauhi maʻu hoʻo fānaú ke nau nofo ofi ki he fakatahaʻangá? Ko ha tokotaha taʻumotuʻa koe ʻokú ke fiemaʻu ha tokoni? Pe ʻoku fakalotosiʻiʻi nai koe ʻe ha palopalema? Ko ʻetau feangainga mo hotau ngaahi taimi faingataʻá ʻe faingataʻa nai—ka ʻoku ʻikai ke taʻemalava. ʻOku malava ke ʻi ai ha tokoni.
5 Founga ʻOku Tokoni Ai ʻa e Kau Tangata Matuʻotuʻá: ʻOku tokanga moʻoni ʻa e kau mātuʻá. Te nau fanongo ki hoʻo ngaahi fakakaukaú. Kapau ʻoku fehangahangai ʻa e kau malanga kehé mo ha ngaahi fakafaingataʻaʻiaʻanga meimei tatau, ko e kau mātuʻá te nau fai ha tokanga ki he meʻá ni, ʻi heʻenau tauhi mo akoʻi ʻa e fakatahaʻangá. ʻI he tuʻunga ko e “faʻifaʻitakiʻanga ki he fanga sipi,” ʻoku nau mateuteu maʻu pē ke ngāue fakataha mo koe ʻi he fiefia. (1 Pita 5:3) ʻI he fanongo ki he fanga tokoua taukei ko ʻení ʻi heʻenau fakaʻuhingaʻi ʻa e ngaahi tefitoʻi moʻoni ʻi he Tohitapú ʻoku malava ke fakaleleiʻi ai hoʻo ngāue fakafaifekaú pea tokoniʻi koe ʻi hoʻo moʻui fakafoʻituituí.—2 Tim. 3:16, 17.
6 Kuo foaki mai ʻe Sīsū kiate kitautolu ʻa e “ngaahi meʻaʻofa ʻi he kau tangatá” tokolahi. (Ef. 4:8, NW, lalo.) ʻOku ʻuhinga ʻení ko e kau mātuʻá ko homou tokoni. ʻOku nau faingamālie ke tokoni atu kiate koe. Ko hono olá, ko kinautolú “ʻoku ʻamoutolu.” (1 Kol. 3:21-23) Ko ia, ʻi he ʻikai ke holomuí, lea tauʻatāina. Kole ki he tokoni ʻokú ke fiemaʻú.