ʻOkú Ke Maʻu ʻa e Laumālie ʻo e Feilaulauʻi-Kitá?

¹ ʻI he houngaʻia ki he meʻa naʻe fakahoko taʻesiokita ʻe Sīsū Kalaisi ki he faʻahinga ʻo e tangatá, ʻoku totonu ke ne ueʻi kotoa kitautolu ke tau ngāueʻaki ʻetau ngaahi malavá, iví, mo e mālohí ʻi ha founga feilaulauʻi-kita. ʻOku kōlenga mai ʻa e ngaahi Konga Tohitapú: “Ke mou ʻatu ʻa e ngaahi sino ʻomoutolu ko e feilaulau, ke moʻui, ke tapu ki he ʻOtua, ke fakahōifua kiate ia—ko e fakaloto e ʻo hoʻomou fai e lotu.” (Loma 12:1) ʻE tokoniʻi koe ʻe he sivisiviʻi-kita ʻi he taimi ki he taimí ke ke sio ai pe ʻokú ke fakahā ʻa e faʻahinga laumālie ko iá ʻo kakato ʻo fakatatau ki hono fakaʻatā koe ʻe ho ngaahi tuʻunga fakafoʻituituí.

² ʻI he Tulimui ki he ʻIlo ʻo e Tohitapú: Kuó ke vaheʻi ha taimi ki he lau Tohitapu fakafoʻituituí mo e akó ʻi ha founga tuʻumaʻu? ʻOkú ke piki ki he taimi-tēpile ko iá? Ko hoʻo founga-tuʻumaʻú ia ke teuteu lelei ki he ngaahi fakataha ʻa e fakatahaʻangá? Kapau ko ha ʻuluʻifāmili koe, ʻokú ʻi ai haʻo ako Tohitapu tuʻumaʻu mo ho fāmilí? Ko hono fai ʻa e ngaahi meʻá ni ʻoku fiemaʻu nai ai ke feilaulauʻi ʻa e taimi ʻoku fakamoleki ʻi he sio televīsoné pe ʻi he komipiutá pe ʻi ha ngaahi ngāue kehe. Kae kehe, ko ha feilaulau siʻisiʻi ē ke fai, ʻi hono ʻiloʻi ko e taimi ko ia ʻoku fakamoleki ki he Folofola ʻa e ʻOtuá ʻe tokoni ia ke ne taki atu koe ki he moʻui taʻengatá!​—Sione 17:3.

³ ʻI Hono Akoʻi ʻo Hoʻo Fānaú: Ko e taimi lelei taha ke kamata ako ai ki ha ʻalunga ʻo e feilaulauʻi-kitá ko e kei īkí. Akoʻi hoʻo fānaú ko e lolotonga ʻoku ʻi ai ha taimi ki he vaʻingá, kuo pau foki ke toe ʻi ai ha taimi ki he ngāué mo e ngaahi ngāue fakateokalatí. (Ef. 6:4) ʻOange kiate kinautolu ha ngāue ʻaonga ʻe niʻihi ke nau fai takai ʻi he ʻapí. Fokotuʻu ha taimi-tēpile tuʻumaʻu ke kau fakataha ai mo kinautolu ki he ngāue fakafaifekaú. Fakaivimālohiʻi hoʻo fakahinohinó ʻaki hoʻo faʻifaʻitakiʻanga lelei pē ʻaʻaú.

⁴ ʻI he Ngaahi Ngāue Fakaefakatahaʻangá: ʻOku fakakoloaʻi ha fakatahaʻanga ʻi he taimi ʻoku fai loto-lelei ai ʻe he tokotaha kotoa pē ʻi aí ha ngaahi feilaulau ke fakahokoʻaki ha ngaahi meʻa maʻá e lelei fakalūkufuá. (Hep. 13:16) ʻOku malava kiate koe ke ke fakamoleki ʻa e taimi lahi ange ʻi he ngāue malangaʻi ʻo e Puleʻangá mo e ngaohi-ākongá? Te ke lava ʻo pole ke tokoni ki he mahamahakí mo e taʻumotuʻá, mahalo pē ko hono tokoniʻi kinautolu ʻaki hono ʻave ki he ngaahi fakatahá?

⁵ Ki muʻa ke fakahoko ʻa e feilaulauʻi lahi taha ʻo ʻene moʻui fakaetangatá, naʻe akonakiʻi ʻe Sīsū ʻene kau ākongá ke fakahangataha honau matá ki he ngaahi meʻa ʻo e Puleʻangá, ʻo ʻai ʻa e meʻa kehe kotoa pē ʻi he moʻuí ke fika ua. (Mt. 6:33) Ko e tulimui ki ha laumālie pehē ʻo e feilaulauʻi-kitá te ne ʻomai ai kiate kitautolu ʻa e fiefia lahi ange ʻi heʻetau hokohoko atu ʻi hono tauhi ʻa Sihova ʻaki ʻa e fiefiá.