Langa Takai ʻa Hoʻo Moʻuí ʻi he Ngāue ʻa Sihová
1 Naʻe fakatatau ʻe Sīsū ʻene kau fanongó ki he ongo langa ʻe toko ua. Naʻe langa ʻe he tokotaha ʻa ʻene founga moʻuí ʻi he maka tefito ko e talangofua kia Kalaisí pea naʻá ne malava ke matuʻuaki ʻa e ngaahi afā ʻo e fakafepakí mo e mamahí. Ko e tokotaha ʻe tahá naʻá ne langa ʻi he ʻoneʻone ko e talangataʻa siokitá pea naʻe ʻikai lava ke ne matuʻuaki ʻa e taimi naʻe hoko mai ai ʻa e faingataʻá. (Mt. 7:24-27) ʻI he moʻui he fakaʻosiʻosi ʻo e fokotuʻutuʻu ko eni ʻo e ngaahi meʻá, ʻoku tau aʻusia ai ʻa e ngaahi afā lahi ʻo e fakafilí. ʻI he tafatafaʻaki langí ko e ngaahi konga ʻao fakapōpōʻuli ʻo e mamahi lahí ʻoku fakatahataha vave ʻaupito. Te tau kātaki ʻo aʻu ki he ngataʻangá ʻo taʻetoeleʻeia ʻetau tuí? (Mt. 24:3, 13, 21) ʻOku makatuʻunga ʻa e meʻa lahi ʻi he founga ʻo ʻetau langa ʻetau moʻuí he taimi ní. Ko ia ai, ʻoku fiemaʻu fakavavevave ke tau ʻeke hifo kiate kitautolu, ‘ʻOku ou langa tefito ʻeku moʻui faka-Kalisitiané ʻo takatakai ʻi he ngāue talangofua ki he ʻOtuá?’
2 Ko e hā hono ʻuhinga ʻo e pehē ke langa takai ʻetau moʻuí ʻi he ngāue ʻa Sihová? ʻOku ʻuhingá ko hono ʻai ʻa Sihova ko e tefito ia ʻo ʻetau moʻuí. ʻOku kau ki ai ʻa e hangataha ki he Puleʻangá ko ʻetau tokanga tefitó ia. ʻOku kau ki ai ʻa e talangofua ki he ʻOtuá ʻi heʻetau ngaahi ngāue kotoa pē ʻi heʻetau moʻui fakaʻahó. ʻOku fiemaʻu ki ai ʻa e loto-ʻaufuatō ʻi heʻetau ako ʻa e Tohitapú fakafoʻituitui, fakafāmili, mo e fakaefakatahaʻanga pea ʻi heʻetau ngāue fakamalangá, ʻo ʻai ʻa e ngaahi meʻá ni ko ʻetau ngaahi meʻa muʻomuʻá ia. (Koh. 12:13; Mt. 6:33) ʻI ha ʻalunga talangofua peheé ʻoku iku ia ki ha tui tuʻu-fefeka, ʻa ia ʻe ʻikai holofa ʻi he fehangahangai mo ha ngaahi afā pē ʻo e fakafilí ʻe tō mai nai.
3 Ko ha meʻa fakafiefia ia ke sio ki he laui miliona ʻo e kakaí ʻoku nau langa loto-falala ʻenau moʻuí mo ʻenau ʻamanaki ki he kahaʻú ʻo takai ʻi he ngāue ki he ʻOtuá, ʻo hangē ko ia naʻe fai ʻe Sīsuú. (Sione 4:34) ʻOku nau pipiki ki ha taimi-tēpile tuʻumaʻu ʻo e ngaahi ngāue fakateokalatí pea fiefia ʻi he olá ko ha ngaahi tāpuaki mahuʻinga. Naʻe fakamatala ha faʻē ʻe taha ki he founga ʻo ʻene ʻohake lavameʻa mo hono husepānití ʻa hona ongo foha ʻe toko ua ke tauhi ʻa Sihová: “Naʻá ma fakafonuʻaki ʻemau moʻuí ʻa e moʻoní—ʻo ʻalu ki he ngaahi fakataha-lahi kotoa, teuteu ki he ngaahi fakatahá mo maʻu ia, pea ʻai ʻa e ngāue fakamalangá ko ha konga tuʻumaʻu ia ʻo ʻemau moʻuí.” Naʻe tānaki mai ki ai ʻa hono husepānití: “Ko e moʻoní ʻoku ʻikai ko ha konga ia ʻo ʻemau moʻuí, ko ʻemau moʻuí ia. ʻOku kau takatakai mai ki ai ʻa e meʻa kehe kotoa pē.” Kuó ke fokotuʻu tatau ʻa e ngāue ʻa Sihová ko e meʻa muʻomuʻa taupotu ia ʻi hoʻo moʻuí?
4 Palani ha Taimi-Tēpile Fakauike Ala Ngāueʻi: ʻOku tokoniʻi kitautolu ʻe he kautaha ʻa Sihová ke muimui ʻi ha founga tuʻumaʻu fakalaumālie ʻaki hono fokotuʻutuʻu ʻa e fakataha ʻe nima ʻi he uiké. Ko e kau Kalisitiane ʻoku nau langa takai ʻenau moʻuí ʻi he lotu ʻa Sihová ʻoku nau fokotuʻutuʻu ʻenau ngaahi meʻa fakaemāmaní mo fakafāmilí ʻi ha founga ke nau maʻu ai ʻa e ngaahi fakataha mātuʻaki mahuʻinga kotoa ko ení. ʻOku ʻikai te nau fakaʻatā ʻa e ngaahi meʻa ʻoku mahuʻinga siʻi angé ke ne uesia ʻenau maʻu tuʻumaʻu iá.—Fili. 1:10; Hep. 10:25.
5 ʻOku ʻiloʻi ʻe he kau Kalisitiane matuʻotuʻá ʻoku hangē pē ko ia ʻoku mahuʻinga ke maʻu ha ngaahi houa kai tuʻumaʻu ʻi he ngaahi taimi pau ʻi he ʻaho taki taha, ʻoku pehē pē ʻa e mātuʻaki mahuʻinga ke ʻai ha taimi-tēpile papau ki he ako fakafoʻituituí mo fakafāmilí, ʻo kau ai ʻa e teuteu ki he ngaahi fakatahá. (Mt. 4:4) ʻE lava ke ke tuku mavahe ha taimi ʻo ʻikai siʻi hifo he miniti ʻe 15 pe 20 ʻi he ʻaho taki taha ki he ako fakafoʻituituí? Ko e kií ko e ʻikai ke tuku ʻa e ngaahi meʻa kehé ke ne kaihaʻasi ʻa e taimi kuo tuku mavahe ki he akó. ʻAi ia ke hoko ko ha tōʻonga ʻaonga. ʻE fiemaʻu nai ki he meʻá ni ʻa e tuʻu hake pongipongia ange ʻi he pongipongi taki taha ʻi he taimi ʻokú ke tuʻu hake ai he taimi ní. Ko e kau mēmipa ʻe toko 17,000 ʻo e fāmili Pēteli ʻi māmani lahí ʻoku nau tuʻu pongipongia hake he pongipongí ke fai ai ʻa e lāulea ʻi he konga tohi fakaʻahó. Ko e moʻoni, ko e tuʻu pongipongia haké ʻoku fiemaʻu ki ai ʻa e ʻalu ʻo mohe ʻi ha houa lelei ʻi he poʻulí koeʻuhi ke kamata ʻa e ʻaho hono hokó ʻi ha tuʻunga mālohi mo mālōlō lelei.
6 Kapau ko ha ʻuluʻifāmili koe, ʻai ke ke muʻomuʻa ʻi hono palani mo hono fokotuʻutuʻu ʻa e taimi-tēpile ngāue fakateokalati ʻa ho fāmilí. ʻOku lau fakataha ʻe he ngaahi fāmili ʻe niʻihi ʻa e Tohitapú, ko e Yearbook, pe ko ha toe tohi ʻe taha ʻi heʻenau mālōlō he hili ʻa e kai efiafí. Ko e ngaahi mātuʻa tokolahi ko ia kuo nau sio ki heʻenau fānaú ʻoku nau tupu hake ʻo hoko ko e kau Kalisitiane mālohi fakalaumālié ʻoku nau pehē ko e meʻa tefito ʻe taha ʻoku tānaki atu ki heʻenau lavameʻá ko e angaʻaki ʻe he fāmilí ʻa hono tuku mavahe ha efiafi ʻi he uike taki taha ʻa ia ʻoku nau fiefia fakataha ai ʻi ha taimi fakatupu langa hake. Ko e tamai pehē ʻe taha naʻá ne pehē: “ʻOku ou ongoʻi ko e tupulaki fakalaumālie ʻo ʻema fānaú ko e tupu lahi ia mei heʻemau ako fakafāmili tuʻumaʻu ʻi he pō Pulelulú, naʻe kamata ʻi he taʻu nai ʻe 30 kuohilí.” Ko e kotoa ʻo ʻene fānau ʻe toko tolú naʻa nau papitaiso ʻi ha taʻu siʻi, pea ki mui ai naʻe hū kotoa ʻa e toko tolú ki he ngāue fakafaifekau taimi-kakató. ʻI he tānaki atu ki he ako fakafāmilí, ko e ngaahi tuʻuaki ki he ngāue fakamalangá pe ngaahi konga ʻi he fakatahá ʻe lava ke ʻahiʻahiʻi ia, pea ʻoku lava ke fai ʻa e fiefia fakataha ʻi he ngaahi ngāue fakatupu moʻui lelei kehe.
7 ʻI hoʻo taimi-tēpile fakauiké, kuó ke ‘lamalama faingamalie’ ki hono malangaʻi ʻo e Puleʻangá? (Kol. 4:5) Ko e tokolahi taha ʻo kitautolú ʻoku tau moʻui femoʻuekina, ʻo maʻu ʻa e ngaahi fatongia fakafāmili mo fakaefakatahaʻanga ke tokangaʻi. Kapau ʻoku ʻikai te tau fai ha ngaahi fokotuʻutuʻu papau ke kau ai ʻi he ngāue fakamalangá mo fakafaiakó ʻi he uike taki taha, ʻe mātuʻaki faingofua leva ki he ngaahi meʻa kehé ke nau fakafihiaʻi ʻa e ngāue mātuʻaki mahuʻinga ko ení. Ko e tokotaha ʻoku ʻaʻana ha fuʻu faama pulu lahi naʻá ne pehē: “ʻI he 1944 nai naʻá ku ʻiloʻi ai ko e founga pē ʻe taha te u kau ai ʻi he ngāué ko hono fakataimitēpileʻi ha ʻaho pau ki ai. Aʻu mai ki he ʻahó ni ʻoku ou kei tuku pē ha ʻaho ʻe taha ʻi he lolotonga ʻo e uiké ki he ngāué.” ʻOku ʻiloʻi ʻe ha tokotaha mātuʻa Kalisitiane ʻe taha ko hono maʻu ha taimi-tēpile papau ki he faifakamoʻoní ʻokú ne ʻai ai ia ke ne fakaʻavalisi ki ha houa ʻe 15 ʻi he māhina ʻi he ngāue fakamalangá. Kapau ʻoku ʻi ai haʻane pisinisi fakaemāmani ʻi he Tokonakí, ʻokú ne fakataimitēpileʻi ia ki he hili ʻa ʻene ngāue fakamalanga pongipongí. Te ke lava mo ho fāmilí ʻo fakataimitēpileʻi ʻo ʻikai siʻi hifo ʻi he ʻaho ʻe taha ʻi he uike kotoa pē ki he ngāue fakamalangá, ʻo ʻai eni ko e konga ia ʻo hoʻomou founga fakalaumālie ki he moʻuí?—Fili. 3:16.
8 Sivisiviʻi Hoʻo Founga Tuʻumaʻu ʻi he Moʻuí: ʻOku ʻi ai ʻa e ngaahi meʻa ʻoku ngāue fakafepaki ki hono langa takai ʻetau moʻuí ʻi he ngāue ʻa Sihová. ʻE fakahohaʻasi nai ʻe ha ngaahi tuʻunga taʻeʻiloa ʻa ʻetau taimi-tēpile kuo ʻosi palani lelei ki he akó, ngaahi fakatahá, mo e ngāué. Pea ko hotau Filí, ʻa Sētane, te ne fai ʻa e meʻa kotoa te ne malavá ke ‘felei hotau halá’ pea mioʻi ʻetau ngaahi palaní. (1 Tes. 2:18; Ef. 6:12, 13) ʻOua ʻe fakaʻatā ʻa e ngaahi fakafaingataʻaʻiaʻanga ko ení ke ne fakalotosiʻi koe, ʻo ke foʻi ai. Fai ʻa e ngaahi fakatonutonu ʻoku fiemaʻú ke fakahoko ʻaki ʻa hoʻo taimi-tēpile ngāue fakateokalatí. ʻOku fiemaʻu ʻa e fakapapauʻi mo e kīvoi ke lavaʻi ai ʻa e meʻa ko ia ʻoku mahuʻinga moʻoní.
9 Kuo pau ke ʻoua naʻa tau fakaʻatā ʻa e ngaahi tākiekina fakamāmaní pea mo e tākiekina kovi ʻa hotau kakano angahalaʻiá ke ne ʻomai ʻa e ngaahi ngāue taʻefakalaumālie ʻe lava ke ne keina lahi ange hotau taimí mo ʻetau tokangá. ʻOku fiemaʻu ʻa e sivisiviʻi-kita, ʻo ngāueʻaki ʻa e ngaahi fehuʻi hangē ko e: ‘Kuo faifai pē ʻo ʻikai palanisi ʻa e ʻalunga ʻo ʻeku moʻuí pe fakahohaʻasi, hangē ko ia naʻe hokó? Kuo kamata ke u langa takai ʻeku moʻuí ʻi he ngaahi meʻa ʻi he māmani ko eni ʻa ia ʻe mole atú? (1 Sione 2:15-17) Ko e hā e lahi ʻo e taimi ʻoku ou fakamoleki ʻi he ngaahi ngāue fakafoʻituituí, folau ʻeveʻevá, ngaahi sipotí, pe ko e fakafiefia kehe—ʻo kau ki ai ʻa e sio televīsoné pe ʻi he sio takai holo pē ʻi he ʻInitanetí—ʻi hono fakahoa atu ki he taimi ʻoku fakamoleki ʻi he ngaahi ngāue fakalaumālié?’
10 Kapau ʻokú ke ongoʻi kuo hoko ʻo fihia ʻa hoʻo moʻuí ʻi he ngaahi ngāue ʻoku ʻikai ala fiemaʻu lahi ange, ko e hā e meʻa ke faí? Hangē pē ko e lotu ʻa Paula ke hoko ʻa hono fanga tokouá ʻo “toe fakatonutonu,” pe “ʻomai ki he tuʻunga totonú,” ko e hā ʻoku ʻikai kole tokoni ai kia Sihova ke te toe hoko ai ʻo tokanga tefito ki heʻene ngāué? (2 Kol. 13:9, 11, lalo, NW) Fakapapauʻi leva ke moʻui ʻo fakatatau ki hoʻo fakapapaú pea fai ʻa e ngaahi fakatonutonu ʻoku fiemaʻú. (1 Kol. 9:26, 27) ʻE tokoniʻi koe ʻe Sihova ke ke fakaʻehiʻehi mei he afe ki he toʻomataʻu, pe ki he toʻohema ʻo e ngāue talangofua kiate iá.—Fakafehoanaki mo Aisea 30:20, 21.
11 Nofoʻaki Femoʻuekina ʻi he Ngāue Fakafiefia ʻa e ʻOtuá: ʻOku mātuʻaki tuli ʻa e laui miliona ki he fiefiá ʻo toki ʻiloʻi hake pē ʻi he ofi ki he ngataʻanga ʻo e moʻuí, ko e ngaahi meʻa fakamatelie naʻa nau vēkeveke kumi ki aí kuo ʻikai te ne ʻomai kiate kinautolu ha fiefia tuʻuloa. Kuo hoko ia ko ha “kai matangi.” (Koh. 2:11) ʻI he tafaʻaki ʻe tahá, ʻi heʻetau tauhi ʻetau moʻuí ʻo fakatefito ʻia Sihová, ‘ʻo ʻai ia ʻi hotau ʻaó maʻu peé,’ ʻoku tau aʻusia ai ʻa e fiemālie lahi. (Sāme 16:8, 11) ʻOku peheé koeʻuhi ko Sihova ʻa e ʻuhinga tofu pē ki heʻetau ʻi aí. (Fkh. 4:11) Ka ne taʻeʻoua ia, ʻa e Faʻu-Taumuʻa Maʻongoʻongá, ʻoku taʻeʻuhinga ʻa e moʻuí ia. Ko hono tauhi ʻo Sihová ʻoku fakafonuʻaki ai ʻetau moʻuí ʻa e ngāue mahuʻinga mo mohu taumuʻa, ʻa ia ʻoku ʻaonga kiate kitautolu pea pehē ki he niʻihi kehé ʻi ha founga tuʻuloa, ʻio, ʻi ha founga taʻengata.
12 ʻOku mahuʻinga ke ʻoua ʻe hoko ʻo fakataʻetaʻetokanga pea mole ai ʻetau ongoʻi ʻa e fakavavevave fekauʻaki mo e ngataʻanga tuʻunuku mai ʻo e māmani ʻa Sētané. Ko ʻetau moʻui ʻi he ʻaho ki he ʻahó ʻoku tākiekina ia ʻe heʻetau vakai atu ki he kahaʻú. Ko e kakai ʻi he ʻaho ʻo Noá, ʻa ia naʻe ʻikai te nau tui ʻe ʻi ai ha lōmaki ʻi he kolopé, “naʻe ʻikai te nau ʻaloʻiloa,” ʻo fakatefito pē ʻenau moʻui fakaʻahó ʻi heʻenau ngaahi ngāue fakafoʻituituí—ʻi he kai, inu, mo e mali—kae ʻoua kuo hanga ʻe he lōmakí ʻo “ʻave kinautolu fulipe.” (Mt. 24:37-39) ʻI he ʻahó ni, ko e faʻahinga ko ia ʻoku nau fakatefito ʻenau moʻuí ʻi he māmani ko ení te nau sio ki he movete ʻenau ngaahi ʻamanaki ki he kahaʻú ʻi he fakaʻauha lahi taha ʻe faifai pea hokosia ʻe he tangatá, “ko e ʻaho ʻo Sihová.”—2 Pita 3:10-12, NW.
13 Hanganaki langa takai leva ʻa hoʻo moʻuí ʻi he ʻOtua moʻuí, ʻa Sihova, pea mo hono fai ʻo hono finangaló. ʻOku ʻikai ha fokotuʻutuʻu ʻe lava ke ke fai ʻi he moʻui ko ení ʻoku ʻi ai hano Tokotaha-Poupou falalaʻanga pehē ʻo hangē ko Sihová. ʻOku ʻikai lava ke ne loi—te ne moʻoni ʻi heʻene ngaahi talaʻofá. (Tai. 1:2) ʻOku ʻikai lava ke ne mate—ʻoku ʻikai ke mole ha meʻa ʻoku tukutauhi mai ʻia Sihova. (Hap. 1:12; 2 Tim. 1:12) Ko e moʻui talangofua mo e tui ʻoku tau langa he taimi ní ko e kamataʻanga pē ia ʻo ha moʻui ʻa ia ʻe tuʻuloa ʻo taʻengata ʻi he ngāue fakafiefia ʻa hotau ʻOtua fiefiá!—1 Tim. 1:11; 6:19.
[Fakamatala ʻi he peesi 3]
“Ko e moʻoní ʻoku ʻikai ko e konga ia ʻo ʻemau moʻuí, ko ʻemau moʻuí ia. ʻOku kau takatakai mai ki ai ʻa e meʻa kehe kotoa pē.”