Founga ke Fengāueʻaki Fakataha Ai ʻa e Ngaahi Mēmipa ʻo e Fāmilí ke Kau Kakato—ʻI he Ako Tohitapú
1 ʻOku tānaki mai ʻe he moʻoní ʻa e ʻuhinga moʻoni mo e taumuʻa ki he moʻui fakafāmilí, ka ko e lavameʻa ʻi he tauhi kia Sihová ʻoku ʻikai ke hokonoa mai pē. ʻOku fiemaʻu ʻa e taimi mo e feinga ke langa hake ha ʻapi mālohi fakalaumālie. ʻOku ʻi ai ʻa e fiemaʻu lahi ki he ngaahi mēmipa ʻo e fāmilí ke nau ngāue vāofi fakataha ʻi he feinga ko ʻení. Ko e kupu ʻuluaki ko ʻeni ʻi ha holongā konga ʻe tolú ʻe fakahangataha ia ki he founga ʻe lava ke fengāueʻaki ai ʻa e ngaahi fāmilí ʻi hono fakatupulekina ʻa e angaʻaki ʻo e ako leleí.
2 ʻAki Hono Lau ʻa e Tohitapú ʻi he ʻAho Kotoa Pē: ʻOku fakahā mai ʻe he Palovepi 24:5 ko e “tangata ʻilomeʻa ʻoku tokaʻi ai hono ivi.” Ko e ʻilo ʻoku maʻu mei hono lau maʻu pē ʻa e Folofola ʻa e ʻOtuá ʻokú ne ʻomai ai ki ha tokotaha ʻa e mālohi ʻi loto ʻoku fiemaʻu ke talitekeʻiʻaki ʻa e ngaahi ʻohofi ʻe Sētane ʻa hono tuʻunga fakalaumālié. (Sāme 1:1, 2) ʻOku mou lau fakaʻaho fakataha ʻa e Tohitapú ʻi he tuʻunga ko ha fāmili? ʻOku fakaeʻa mai ʻe he Akoʻanga Fakafaifekau Fakateokalatí ha “Fakalahi ʻo e Fakahokohoko ki he Lau Tohitapú” ki he uike taki taha ʻo e taʻú. Ko e muimui ki aí ʻoku fiemaʻu ai ʻa e taimi ʻo e fāmilí ʻo ʻikai toe siʻi hifo ʻi he miniti ʻe hongofulú ʻi he ʻaho taki taha. Filifili ha taimi faingamālie, hangē ko e kai pongipongí, hili ʻa e kai efiafí, pe ki muʻa ʻi he taimi mohé, ke lau ʻa e Tohitapú pea lāulea ki he konga tohi ʻo e ʻahó mei he Ko Hono Vakaiʻi ʻa e Tohitapú. ʻAi ʻeni ko ha konga ʻo e taimi-tēpile ʻa e fāmilí ʻi he ʻaho kotoa pē.
3 ʻAki ʻa e Ako Fakataha ʻi he Uike Taki Taha: Ko e ako Tohitapu fakafāmilí ʻoku totonu ke hoko ko e meʻa mahuʻinga ia ʻi he uiké ki ha fāmili. ʻOku moʻuaʻaki ʻe he mēmipa taki taha ke poupou ki ai ʻaki ʻenau kau tōtōivi ki he akó. ʻE fiemaʻu ki he ʻulu ʻo e fāmilí ke ne fakakaukau ki he ngaahi fiemaʻu ʻa e fāmilí ʻi hono fili ʻa e meʻa ke akó pea mo e ʻaho, taimi, pea mo e lōloa ʻo e akó. ʻAi ʻa e ako fakafāmilí ko e meʻa muʻomuʻa ia ʻi he taimi-tēpile ʻo e uiké. ʻOua te ke fakaʻatā ha ngaahi meʻa ʻoku mahuʻinga siʻisiʻi ke ne felei ia.—Fili. 1:10, 11.
4 Ko ha tamai ʻa ia naʻá ne faʻa tali ha telefoni fakapisinisi ʻi hono ʻapí naʻá ne toʻo ʻa e telefoní he lolotonga ʻo e ako fakafāmilí. Kapau naʻe haʻu ha kau kasitoma ki he falé, naʻe fakaafeʻi kinautolu ke kau ki he akó pe te nau tatali kae ʻoua kuo ʻosi. Naʻe fakapapauʻi ʻe he tamaí ʻe ʻikai ha meʻa te ne fakafeʻātungiaʻi ʻa e ako fakafāmilí. Naʻe ʻai ai heni ke maongo loloto ki heʻene fānaú, pea ko ʻene pisinisí, naʻe lelei ia.
5 He fakafiefia lahi ē ʻi he taimi ʻoku fengāueʻaki fakataha ai ʻa e ngaahi mēmipa ʻo e fāmilí ʻi he ngaahi ngāue fakalaumālié! Ko ʻetau feinga loto-tōnunga ke kau kakato ʻi he ako Tohitapu fakafāmilí te ne ʻomai ai ʻa e tāpuaki ʻa Sihová.—Sāme 1:3.