Taimi-Tēpile Fakafāmilí—Ko e Ako Fakafāmilí
1 Ko e meʻaʻofa lahi taha ʻe lava ke ke vahevahe ki hoʻo fānaú ʻi ho tuʻunga ko ha mātuʻa Kalisitiané ko hoʻo ʻofa kia Sihová. Ko ha feituʻu mahuʻinga ʻe lava ke fakahoko ai ení ko “hoʻo nofo ʻi ho fale” ki he ako Tohi Tapu fakafāmili fakauiké. (Teu. 6:5-7) Tatau ai pē pe ʻokú ke maʻu ha hoa ʻoku tui, nofo ʻi ha ʻapi ʻoku māvahevahe fakalotu, pe ko ha mātuʻa taʻehoa, ʻe lava ke ke tokoniʻi hoʻo fānaú ke nau ʻunuʻunu ofi kiate koe pea kia Sihova ʻaki hono fai ha ako fakafāmili tuʻumaʻu.
2 Ko Hono Kamataʻí: Ko e ʻuluaki sitepú ko hono fokotuʻu ʻa e tōʻonga ʻo e ako ko ha fāmilí. Kapau ʻoku ʻikai te ke fakapapauʻi ʻa e taimi ke fai ai ʻa e akó, ko e hā ʻoku ʻikai ke ke lāulea ai ki ai ʻi he tuʻunga fakafāmilí? (Pal. 15:22) Kapau ʻokú ke maʻu ha fānau iiki ange, te ke saiʻia nai ke fai ha fanga kiʻi ako nounou kehekehe ʻi he kotoa ʻo e uiké. Fakapapauʻi ko e hā ʻa e taimi-tēpile ʻoku feʻunga taha ki ho fāmilí. Fokotuʻu ha taimi pau ki he akó ʻi hoʻo taimi-tēpile fakafāmilí, pea fakapapauʻi ke pipiki ki ai.
3 Ko e hā nai te mou akó? Ko e niʻihi ʻoku nau teuteu ʻa e lēsoni ʻe lāulea ki ai ʻi he Ako Tohi hoko ʻa e Fakatahaʻangá pe ko e Ako Taua Leʻo. Ko e niʻihi ia ʻoku nau lāulea ki he fakamatala kuo faʻufaʻu tefito maʻá e toʻutupú. Naʻe pehē ʻe ha tamai ʻa ha foha mo ha ʻofefine kei siʻi: “Ko e meʻa ʻe taha ʻokú ne ʻai ʻemau akó ke hoko ko ha meʻa mahuʻinga ki he ongo tamaikí ʻi he uiké ko ʻemau fakatātaaʻi ko ia ʻa e ngaahi konga mei he Ko ʻEku Tohi ʻo e Ngaahi Talanoa Faka-Tohitapú. Ko e loloto ʻo e maongo ki he ʻatamaí pea mo e mahino ʻoku maʻu mei aí ʻoku mahuʻinga mamaʻo ange ia ʻi he lahi ʻo e ngaahi palakalafi ʻoku mau ʻosikí.”
4 Ako ʻi he Uike Taki Taha: Ko e ako fakafāmilí ʻoku totonu ke fai ia ʻi ha founga tuʻumaʻu pea ke fakatuʻotuʻa fiefia ki ai ʻa e ngaahi mēmipa kotoa ʻo e fāmilí. ʻE fakaʻatā nai ha feʻunuʻaki ki he ʻaho mo e taimi ʻoku ngāue ai ki he ngaahi tuʻunga taʻeʻamanekiná. ʻE toe ʻi ai nai ʻa e ngaahi taimi ʻe fiemaʻu ai ʻa e fengaʻunuʻaki ʻi he meʻa fekauʻaki mo e kaveinga ʻoku fai ki ai ʻa e lāuleá. Ka ko ha faʻahinga fengaʻunuʻaki pē ʻo e fiemaʻú ʻoku totonu ke ʻoua te ne fakatupunga ai ha fakahohaʻa lōloa mei ha taimi-tēpile ako fakafāmili kuo ʻosi fokotuʻú. ʻI ha fāmili ʻe taha, ʻoku fakamatala ai ʻa e ʻofefiné: “Kapau ko e taimi ki heʻemau akó ʻe pau ke liliu, ʻoku fakapipiki maʻu pē ʻe he tangataʻeikí ʻa e taimi foʻoú ʻi he matapā ʻo e ʻaisí, koeʻuhí ke mau ʻilo kotoa ʻa e taimi ʻe fai aí.” He fakaongoongoleleiʻi moʻoni ē ko e ngaahi feinga pehē ke tauhi maʻu ha ako fakafāmili tuʻumaʻú! ʻI hoʻo hokohoko atu hono ʻohake hoʻo fānaú “ʻi he akonaki mo e fakatonutonu-fakaʻatamai ʻa Sihová,” ʻokú ke fakahāhā ai hoʻo ʻofa fakatouʻosi kia kinautolu pea ki heʻetau Tamai fakahēvaní.—Ef. 6:4, NW.