Puha Fehuʻi
◼ ʻOku totonu ke līpooti ki he fakatahaʻangá ha ako Tohitapu fakafāmili?
Kapau ʻoku fai ʻe ha mātuʻa Kalisitiane ha ako Tohitapu fakafāmili pea ʻoku kau ki ai ha fānau teʻeki papitaiso, ʻe lava ke līpooti ʻe he mātuʻá ʻa e tuʻunga taupotu ko e houa ʻe taha he uike, toe ʻaʻahi ʻe taha he uike, mo e ako Tohitapu ʻi ʻapi ʻe taha he māhina. Ko e tuʻungá eni naʻa mo e laka hake ʻa e akó he houa ʻe tahá, pe fai ʻo lahi ange ia ʻi he tuʻo taha he uiké, pe fai tāutaha mo e fānaú.—Sio ki he tohi Our Ministry, p. 104.
Kapau ko e tokotaha kotoa he fāmilí ko e Kau Fakamoʻoni ʻosi papitaiso, ʻe ʻikai leva līpooti ʻa e taimí pe ko e akó ko ha ngāue fakamalanga (tuku kehe ka ʻoku kei ako ha kiʻi tama ʻa e tohi hono ua hili ʻene papitaisó). Ko hono ʻuhingá he ko e līpooti malaʻe ngāue ʻa e fakatahaʻangá ʻoku fakahaaʻi tefito ai ʻa e meʻa ʻoku fakahoko ʻi hono malangaʻi ʻa e ongoongo leleí mo e akoʻi ʻa e moʻoni faka-Tohitapú ki he faʻahinga ʻoku ʻikai ko e kau sevāniti fakatapui mo papitaiso ʻa Sihová. (Mt. 24:14; 28:19, 20) Kae kehe, ʻoku ʻikai ʻaupito fakasiʻisiʻi ʻe he meʻá ni ʻa e mahuʻinga ʻo hono fai ʻo ha ako tuʻumaʻu peheé.
Ko e fatongia ia ʻo e ngaahi mātuʻa Kalisitiané ke ako mo ʻenau fānaú. Ko e faʻahinga ʻoku nau fiemaʻu tokoni ki hono fokotuʻu pe fakaleleiʻi ʻenau ako fakafāmilí ʻe lava ke nau kole ki he kau mātuʻá ki ha tokoni. Kapau ʻoku fakapotopoto ʻi he ngaahi tuʻungá ke fai ʻe ha tokotaha malanga ʻe taha ha ako Tohitapu mo ha foha pe ʻofefine teʻeki papitaiso ʻo ha fāmili Kalisitiane ʻoku feohi mo e fakatahaʻangá, ʻoku totonu ke kumi faleʻi ki he ʻovasia tauhí pe ʻovasia ngāué. Kapau ʻoku tali ha ako pehē, ko e tokotaha te ne faí ʻe lava ke ne līpooti ia ʻo hangē tofu pē ko ʻene līpooti ha ako Tohitapu kehé.
Ko hono akoʻi ʻa e fānaú ki he ngaahi founga ʻa Sihová ʻoku kau ki ai ʻa e taimi mo e feinga lahi ange ʻi he meʻa ko ia ʻoku hā he līpooti malaʻe ngāué. (Teu. 6:6-9; Pal. 22:6) Ko e ngaahi mātuʻa Kalisitiané ʻoku taau ke fakaongoongoleleiʻi heʻenau fua honau fatongia mafatukituki ʻi hono ʻohake ʻenau fānaú “ʻi he akonaki mo e fakatonutonu-fakaʻatamai ʻa Sihová.”—Ef. 6:4, NW.