Founga Hono Fakahaaʻi ʻe he Kau ʻOvasia ʻo e Ako Tohi ʻa e Fakatahaʻangá ʻa e Mahuʻingaʻia Fakafoʻituituí

¹ Ko e Ako Tohi ʻa e Fakatahaʻangá ʻoku faʻufaʻu ia ke ʻai ke “malava ke fai ha tokanga fakafoʻituitui lahi ange ki he tupu fakalaumālie ʻa e tokotaha taki taha. . . . Ko ha fakahaaʻi eni ʻo e ʻaloʻofa mo e tokanga ʻofa ʻa Sihova ki hono kakaí.” (om-E p. 75; Ai. 40:11) ʻOku fakahoko ʻe he ʻovasia ʻo e ako tohí ha ngafa tefito ʻi hono ʻomai ʻa e tokanga fakafoʻituitui ko iá.

² ʻI he Ako Tohí: Koeʻuhi ʻoku fakataumuʻa ke tauhi ke tokosiʻi ʻa e ngaahi kulupu ako tohí, ʻoku malava ai ʻa e ʻovasia ako tohí ke ne ʻiloʻi lelei ʻa e ngaahi mēmipa ʻo ʻene kulupú. (Pal. 27:23) ʻOku faʻa ʻi ai ʻa e ngaahi faingamālie ke feohi ai ki muʻa pe ʻi he hili ʻa e akó ʻi he uike taki taha. ʻI he lele ʻa e māhiná, te ne lava nai ai ke talanoa mo e meimei tokotaha kotoa ʻi he kulupú. ʻOku tokoniʻi ʻe he meʻá ni ʻa e ngaahi mēmipa ʻo e ako tohí ke nau ongoʻi fiemālie ai ʻi he fakaofiofi kiate ia ʻi heʻenau fehangahangai mo e ngaahi ʻahiʻahí pe fiemaʻu ʻa e fakalototoʻá.​—Ai. 32:2.

³ ʻOku feinga ʻa e ʻovasia ʻo e ako tohí ke fakalototoʻaʻi ʻa e tokotaha kotoa ʻi he kulupú ke kau he lolotonga ʻa e akó. Ko e founga ʻe taha ʻokú ne fai ai ení ko hono fai ʻo e akó ʻi ha founga anga-lelei mo anga-ʻofa. (1 Tes. 2:​7, 8) ʻOkú ne kumi ki ha ngaahi founga ke fakakau ai ʻa e tokotaha kotoa ʻi he lāuleá, ʻo kau ai ʻa e faʻahinga iiki angé. Kapau ʻoku tailiili ha niʻihi fekauʻaki mo e talí, te ne fai nai ha tokoni fakafoʻituitui ʻaki hono fokotuʻutuʻu ki muʻa kia kinautolu ke nau lau ha konga Tohitapu pe ke tali ʻi ha palakalafi pau. Pe te ne fakahaaʻi nai kia kinautolu ʻa e founga ke tali ai ʻi he lea pē ʻanautolú.

⁴ Kapau ko e tokoni ʻo e ʻovasia ako tohí ko ha sevāniti fakafaifekau, ʻoku fokotuʻutuʻu ʻa e ʻovasiá kiate ia ke ne fai ʻa e akó tuʻo taha ʻi he māhina ʻe ua kotoa pē. ʻOku fakaʻatā ai heni ʻa e ʻovasiá ke ne vakai ki he tokotaha tokoní pea fai ha ngaahi fokotuʻu ʻaonga. Ko ha fokotuʻutuʻu lelei moʻoni ia ke tokoniʻi ʻa e fanga tokouá ke nau fakalakalaka ʻi heʻenau pōtoʻi fakafaiakó!​—Tai. 1:9.

⁵ ʻI he Malaʻe Fakafaifekaú: Ko e taha ʻo e ngaahi fatongia tefito ʻo e ʻovasia ako tohí ko e takimuʻa ʻi he ngāue fakaʻevangelioó. (Nom. 27:​16, 17) ʻOkú ne fai ʻa e ngaahi fokotuʻutuʻu ʻaonga ki he faifakamoʻoni fakakulupú pea feinga ke tokoniʻi ʻa e tokotaha kotoa ʻi he kulupú ke nau maʻu ʻa e fiefia ʻi heʻenau ngāue fakafaifekaú. (Ef. 4:​11, 12) Ke lavaʻi eni, ʻokú ne ʻai ko ha taumuʻa ia ke ngāue mo e mēmipa taki taha ʻo e kulupú. ʻOkú ne toe ngāue mo e ʻovasia ngāué ke fokotuʻutuʻu ki he faʻahinga te nau saiʻia ke fakalakalaka ʻa e tafaʻaki ʻe niʻihi ʻo ʻenau ngāue fakafaifekaú ke nau maʻu ha tokoni mei ha tokotaha malanga taukei ange.

⁶ Ko ha Tauhi Anga-ʻOfa: ʻOku mahuʻingaʻia ʻa e ʻovasia ako tohí ʻi he faʻahinga ʻoku nau malava ke kau siʻisiʻi pē ʻi he ngāue fakamalangá koeʻuhi ko honau ngaahi tuʻungá. ʻOkú ne fakapapauʻi ko e faʻahinga ʻoku mātuʻaki ʻi he tuʻunga fakangatangata koeʻuhi ko e taʻumotuʻá, pe koeʻuhi ko e toka mohengá, pea mo e faʻahinga ʻoku nau fakangatangata fakataimi koeʻuhi ko e puke lahi pe laveá, ʻoku nau lāuʻilo ki he fokotuʻutuʻu ʻoku fakaʻatā ai kinautolu ke līpooti ʻenau taimi malaʻe ngāué ʻi he tuʻunga ko e miniti ʻe 15 kapau ʻoku ʻikai te nau malava ke līpooti ha houa kakato lolotonga ʻa e māhina ʻe tahá. (ʻOku fakapapauʻi ʻe he Kōmiti Ngāue ʻa e Fakatahaʻangá ʻa e faʻahinga ʻoku taau ki he fokotuʻutuʻu ko ení.) ʻOkú ne toe mahuʻingaʻia ʻi he faʻahinga ʻoku vaheʻi ki he kulupú ʻa ia ʻoku ʻikai nai te nau longomoʻuí, ʻo feinga ke tokoniʻi kinautolu ke nau toe ngāue fakataha mo e fakatahaʻangá.​—Luke 15:​4-7.

⁷ He houngaʻia ē ko kitautolu ʻi he tokanga anga-ʻofa ʻoku fakahaaʻi ʻe he kau ʻovasia ako tohí! Ko e tokanga fakafoʻituitui ʻoku nau ʻomaí ʻoku tokoni ia “ke tau aʻusia kotoa pe ʻa e tui taha . . . , ke aʻusia ʻa e fua, ko e lahi ʻo e kakato ʻa Kalaisi.”—Ef. 4:13.