Ko e Ako Tohi ʻa e Fakatahaʻangá—ʻUhinga ʻOku Tau Fiemaʻu Ai Iá
1. Ko e hā ʻa e ngaahi muʻaki kamata ʻo e fokotuʻutuʻu Ako Tohi ʻa e Fakatahaʻangá?
1 ʻI he 1895, ko e ngaahi kulupu ako ʻa e Kau Ako Tohi Tapú, hangē ko ia naʻe uiʻaki ʻa e Kau Fakamoʻoni ʻa Sihová he taimi ko iá, naʻa nau hoko ai ʻo ʻiloa ko e Ngaahi Kulupu Mafoa ʻa e Ata ki he Ako Tohi Tapú. Naʻe ngāueʻaki ai ʻa e ngaahi voliume ʻo e Millennial Dawn ko e makatuʻunga ia ki he akó. Ki mui ai, naʻe ui ʻa e ngaahi kulupu ako ko ení ko e Ngaahi Kulupu Pēlea ki he Ako Tohi Tapú. (Ng. 17:11) Ko ha kiʻi kulupu tokosiʻi naʻa nau faʻa fakataha ʻi ha ʻapi fakatāutaha ʻi ha efiafi naʻe feʻungamālie ki he kulupú. Ko e ngaahi fakatahá ni ko e ngaahi fakamelomelo ia ʻo e Ako Tohi ʻa e Fakatahaʻangá.
2. ʻE lava fēfē ke tau tokoni ki “ha fefakalototoʻaʻaki” ʻi he ako tohí?
2 Fakalototoʻa mo e Tokoni: Koeʻuhi ko e ngaahi kulupu ako tohí ʻoku fakataumuʻá ke tauhi ia ke tokosiʻi, ʻoku ʻi ai ha faingamālie lahi ange ai ki he faʻahinga ʻoku kau ki aí ke nau fai hano fakahāhā ʻo ʻenau tuí. Ko e olá ko “ha fefakalototoʻaʻaki . . . , ʻa e tokotaha taki taha fakafou ʻi he tui ʻa e tokotaha ʻe tahá.”—Loma 1:12, NW.
3, 4. ʻOku anga-fēfē hono tokoniʻi kitautolu ʻe he fokotuʻutuʻu ako tohí ke fakahoko ʻetau ngāue fakafaifekaú?
3 Ko hono siofi ʻa e founga faiako ʻa e ʻovasia ako tohí ʻe lava ke ne tokoniʻi kitautolu ke tau “tofa totonu ʻa e folofola ʻo e moʻoni.” (2 Tim. 2:15) Fakatokangaʻi ʻa e founga ʻo ʻene fakamamafaʻi ʻa e makatuʻunga Fakatohitapu ʻo e fakamatalá. Kapau ʻe feʻungamālie ki he tohi ʻoku fai ki ai ʻa e lāuleá, te ne fakamamafaʻi nai ʻa e ngaahi poini tefitó fakafou ʻi ha fakamanatu fakaʻosi, ʻo ngāueʻaki ʻa e Tohi Tapú pē. Ko ʻene faʻifaʻitakiʻanga leleí ʻe lava ke ne tokoniʻi kitautolu ke fakaleleiʻi ʻetau faiako ʻi he ngāue fakafaifekau faka-Kalisitiané.—1 Kol. 10:34 (11:1, PM).
4 Tānaki atu ki hono fakahoko ʻa e lēsoni fakauiké, ko e ʻovasia ako tohí ʻoku takimuʻa ʻi he ngāue fakaʻevangelioó. ʻI he ngāue fāitaha mo e ʻovasia ngāué, ʻokú ne fai ʻa e ngaahi fokotuʻutuʻu ʻaonga ki he malaʻe ngāué. ʻOkú ne feinga ke tokoniʻi ʻa e tokotaha kotoa ʻi he kulupú ke fakahoko honau fatongia faka-Kalisitiane ke malangaʻi ʻa e ongoongo leleí pea ngaohi ākongá.—Mt. 28:19, 20; 1 Kol. 9:16.
5. Ko e hā ʻa e tokoni fakafoʻituitui ʻoku ala maʻu fakafou ʻi he ako tohí?
5 ʻOku tokanga ʻa e ʻovasia ako tohí ki he lelei fakalaumālie ʻa e tokotaha taki taha ʻi he kulupú. ʻOkú ne fakahāhā ʻa e tokanga ko ení ʻi he ngaahi fakataha ʻa e fakatahaʻangá pea ʻi heʻene ngāue fakataha mo e niʻihi kehé ʻi he malaʻe ngāué. ʻOkú ne toe ngāueʻaki foki ʻa e ngaahi taimi ʻokú ne ʻaʻahi ai ki he fanga tokouá ʻi honau ngaahi ʻapí ke vahevahe atu ai ha meʻaʻofa fakalaumālie. ʻOku totonu ke ongoʻi talitali lelei ʻe he tokotaha kotoa ʻa e fakaofiofi atu ki he ʻovasia ako tohí ki he tokoni fakalaumālié ʻi ha taimi pē ʻoku ʻi ai ai haʻanau fiemaʻú.—Ai. 32:1, 2.
6. (a) Kuo anga-fēfē hono fakaivimālohi ʻa hotau fanga tokoua ʻi he ngaahi fonua ʻe niʻihi ʻe he fakataha ʻi he fanga kiʻi kulupu tokosiʻi angé? (e) Kuo anga-fēfē hoʻo maʻu ʻaonga fakafoʻituitui mei he fokotuʻutuʻu ako tohí?
6 Fefakaivimālohiʻaki: ʻI he ngaahi fonua ko ia ʻoku taʻofi ai ʻa e ngāue ʻa e kakai ʻa e ʻOtuá, ʻoku faʻa fakataha ai ʻa e fanga tokouá ʻi he fanga kiʻi kulupu tokosiʻi ange. ʻOku manatu ʻa e tokoua ʻe taha: “Neongo naʻe tapui ʻa ʻemau ngaahi ngāue faka-Kalisitiané, ʻi he taimi pē naʻe ala lava aí naʻa mau fai ʻemau ngaahi fakataha fakakulupú ʻi he fanga kiʻi kulupu ʻi he vahaʻa ʻo e toko 10 ki he toko 15. Mei he ngaahi fakatahá naʻa mau maʻu ai ʻa e mālohi fakalaumālie, fakatouʻosi mei heʻemau ako Tohi Tapú pea mo ʻemau feohi ʻi he hili ʻa e akó. Naʻa mau fakafehoanaki ai ʻemau ngaahi meʻa naʻe hokosiá pea naʻe tokoniʻi ʻe he meʻá ni kimautolu ke ʻiloʻi ai ko kimautolu taki taha naʻa mau maʻu ʻa e fāinga tatau.” (1 Pita 5:9) ʻOfa ke tau fefakaivimālohiʻaki ʻi he founga tatau, ʻaki hono poupouʻi kakato ʻa e fokotuʻutuʻu Ako Tohi ʻa e Fakatahaʻangá.—Ef. 4:16.