Puha Fehuʻi

◼ ʻE lava nai ki he ongo mātuʻá fakatouʻosi ke na līpooti ʻa e taimi naʻe ngāueʻaki ki he ako fakafāmili tuʻumaʻú?

Neongo ʻoku maʻu ʻe he ngaahi tamaí ʻa e fatongia tefito ke ʻohake ʻenau fānaú ʻi he “akonaki mo e fakatonutonu-fakaʻatamai ʻa Sihová,” ko e ongo mātuʻá fakatouʻosi ʻokú na kau ʻi hono akoʻi ʻena fānaú. (Ef. 6:4, NW) ʻOku fakalototoʻaʻi ʻe he Tohi Tapú ʻa e fānaú: “Tama, fanongo ki he akonaki ʻa hoʻo tamai, pea ʻouae hiki mei he ngaahi tala ʻa hoʻo faʻe.” (Pal. 1:8) Ko e tafaʻaki mahuʻinga ʻe taha ʻo e akoʻi fakaemātuʻá ko e ako Tohi Tapu fakafāmilí.

ʻI he kuohilí, ko e mātuʻa pē ʻokú ne fakahoko ha ako fakafāmili mo e fānau teʻeki papitaisó te ne līpooti ʻa e taimí, neongo naʻe kau fakatouʻosi ʻa e ongo mātuʻá ʻi he fetalanoaʻakí. Kae kehe, kuo feʻunuʻaki eni. Kapau ko e lolotonga ʻa e ako fakafāmilí ʻoku kau fakataha ʻa e ongo mātuʻá ʻi hono akoʻi ʻa e fānaú, ʻe lava leva ke na lau fakatouʻosi ʻa e houa ʻe taha ʻo ʻoua ʻe toe laka hake ai ʻi he uike, ko ha ngāue fakamalanga. Ko e moʻoni, ʻoku anga-maheniʻaki ke fakamoleki ʻe he ngaahi mātuʻá ʻa e taimi lahi ange ʻi he houa ʻe tahá he uike ʻi hono akoʻi ʻenau fānaú. Ko hono akoʻi ʻa e fānaú ʻoku kau ki ai ʻa e feinga hokohoko mei he ongo mātuʻá fakatouʻosi. (Teu. 6:6-9) Kae kehe, ko e līpooti ngāue fakamalanga ki he māhiná ʻoku totonu ke tautefito ʻa e tapua mai ai ʻa e meʻa kuo fakahoko ʻi he malaʻe ngāué. Ko ia ai, ʻoku totonu ke lau ʻo ʻoua ʻe toe laka hake he houa ʻe tahá he uike, ʻo aʻu kapau ʻoku lōloa ange ʻa e akó ia ʻi he houa ʻe tahá, ʻoku fakahoko ʻo tuʻo lahi ange he tuʻo tahá he uike, pe ʻoku fakahoko ha ngaahi ako kehekehe mo e fānaú. Ko e mātuʻa pē ʻe taha te ne līpooti ʻa e ako Tohi Tapu fakafāmilí pea ko e toe ʻaʻahi pē ʻe taha ʻi he uike taki taha naʻe fakahoko ai ʻa e akó.