Ko e Ngaahi Fakatahá ʻOku ʻAonga Ia ki he Kau Talavoú
1 Naʻe fakahā ʻe ha taʻahine taʻu hongofulu tupu: “ʻOku ou fakakaukau ʻi he taimi ʻe niʻihi, ko e kau talavoú ʻoku nau maʻu ʻa e taimi faingataʻa lahi taha ʻi he moʻuí. ʻOku tau nofo takatakai ʻi he kakai ʻoku nau fai ʻa e feʻauakí, maʻu ʻa e faitoʻo kona tapú, mo e inu ʻolokaholó.” ʻOku pehē ʻa e anga ʻo hoʻomou ongoʻí? Kapau ko ia, ko e hā ʻoku mou fakakaukau te ne tokoniʻi kimoutolu ke mou tauʻi ʻa e ngaahi tākiekina kovi ko ʻení? ʻOku fiemaʻu kiate kimoutolu ʻa e tui, ko e tui mālohi ki he totonu ʻo e ngaahi founga ʻa Sihová, he ʻi he ʻikai iá ‘ʻoku ʻikai momoʻi lava haʻamou fakahōifua ia.’ (Hep. 11:6) Ko hono maʻu ʻa e ngaahi fakataha ʻa e fakatahaʻangá te ne tokoniʻi kimoutolu ke fakaivimālohiʻi hoʻomou tuipaú mo e fakapapau faka-Kalisitiané ke fakaʻehiʻehi mei he meʻa ʻoku koví.
2 ʻOku Lahi ʻa e Meʻa ke ʻOatu ʻe he Ngaahi Fakatahá Maʻa Kimoutolú: Ko e hā ʻokú ne ʻai ha meʻakai ifo mo ha ngaahi kaungāmeʻa ofi ke fakafiefiá? ʻIkai ko hono fakatahaʻi ʻo e meʻakai leleí mo e ngaahi kaungāmeʻa leleí ʻi ha ʻatimosifia fakafiemālie? Sai, ʻoku ʻomai ʻe heʻetau ngaahi fakatahá ʻa e meʻa lelei ʻoku hokosia tatau, ka ʻi ha ʻuhinga fakalaumālie.
3 Ko e ngaahi meʻa ʻoku lāulea ki ai ʻi he ngaahi fakatahá ʻoku fakatupu langa hake, ʻi ha ngaahi tuʻunga mei he ngaahi meʻa fekauʻaki mo e palopalema fakaʻaho ʻo e moʻuí ki he ngaahi ako fekauʻaki mo e ngaahi kikite faka-Tohitapu fakamānakó. ʻOku ʻomai ai ʻa e fakahinohino ʻaonga, ʻokú ne akoʻi kimoutolu ki he founga ke mou moʻui ai ʻi he founga lelei taha ʻo e moʻuí pea ke fekuki ai mo e ngaahi pole te mou fehangahangai mo iá. Ko e ngaahi feohi ʻoku maʻu ʻi he ngaahi fakatahá ko e lelei tahá ia ʻi ha feituʻu pē, pea ko e ʻatimosifia fakalaumālié ʻoku lelei ia mo malu. (Sāme 133:1) ʻOku ʻikai ha ofo ʻi he pehē ʻe ha finemui ʻe taha: “ʻOku ou ʻalu ki he akó ʻi he kotoa ʻo e ʻahó, pea ʻoku fakaongosiaʻi ai au. Ka ko e ngaahi fakatahá ʻoku nau hangē ha feituʻu laumaʻuiʻui ʻi he toafá, ʻa ia ʻoku fakaivifoʻouʻi ai au ke u fekuki mo e ʻaho ako hono hoko maí.” Naʻe pehē ʻe ha tokotaha: “Naʻá ku ʻiloʻi ko e feohi vāofi mo e niʻihi kehe ʻoku ʻofa kia Sihová ʻokú ne tokoniʻi ai au ke u nofo ofi kiate Ia.”
4 ʻI he kau ki he Ako Fakafaifekau Fakateokalatí, ʻoku mou ako ai ke fakatahatahaʻi ʻa e fakamatala faka-Tohitapú, ʻo faʻu ia ki ha foʻi malanga, pea ʻoatu leva ia ʻi ha founga fetalanoaʻaki ki ha kau fanongo ʻi he Fale Fakatahaʻangá. Fakaʻuta atu ki he ʻaonga ʻo e ako ke faiako pōtoʻiʻaki ʻa e ngaahi moʻoni fakahaofi-moʻui ʻi he Folofola ʻa e ʻOtuá! Ko fē ha toe feituʻu ʻe lava ke maʻu ai ʻe he kau talavoú ha ako mahuʻinga pehē?
5 Founga ke Maʻu Ai ʻa e ʻAonga Lahi Taha mei he Ngaahi Fakatahá: Ke maʻu ʻa e ʻaonga lahi taha mei he ngaahi fakatahá, ʻoku ʻi ai ʻa e ngaahi meʻa mātuʻaki mahuʻinga ʻe tolu ʻoku kau ki ai. Ko e ngaahi meʻá ni ko e teuteu, kau ki ai, pea ngāueʻaki.
6 Teuteu ki he Ngaahi Fakatahá: Vaheʻi ha taimi ʻi ha tuʻunga tuʻumaʻu ke teuteu ai ki he ngaahi fakatahá. ʻOua ʻe fakaʻatā ʻa e lēsoni fakaakó, ko ha ngāue konga-taimi, pe ngaahi fakafiefia longomoʻuí ke ne kaihaʻasia meiate kimoutolu ʻa e taimi ʻoku fiemaʻu ke mou fakamanatu ai ki muʻa ʻa e fakamatala ʻa ia ʻe fai ki ai ʻa e lāuleá ʻi he fakataha taki taha. ʻOku ʻaonga ke ʻi ai ha founga-tuʻumaʻu lelei. Ko e ʻuluakí pea mo muʻomuʻa tahá, hanganaki tauhi ʻa e taimi-tēpile lau Tohitapu fakauike ki he Ako Fakafaifekau Fakateokalatí. Ko ha miniti siʻi pē ʻi he ʻaho taki taha ʻoku fiemaʻu ai ke lau pea fakalaulauloto ki he ngaahi vahe kuo vaheʻi maí. Vaheʻi ha taimi ke teuteu ai ki he Ako Tohi ʻa e Fakatahaʻangá pea mo e Ako Taua Leʻo. ʻOku fai ʻeni ʻe ha niʻihi ʻi ha ʻaho ʻe taha pe ua ki muʻa ʻi he ongo fakataha ko iá. Ki he malava lahi tahá, fai ʻa e meʻa tatau ki he ongo konga ko ia kuo fakataimitēpileʻi ʻi he Fakataha Ngāue ʻo e uike taki taha.
7 Kau ʻIate Kinautolu: ʻOku pehē ʻe he Tohitapú ʻi heʻene taʻu 12, naʻe ʻiloʻi ai ʻa Sīsū ʻi he temipalé, ʻokú ne fanongo, ʻeke ʻa e ngaahi fehuʻi, pea fai mo e ngaahi tali. (Luke 2:46, 47) ʻI he ngaahi fakalea kehé, naʻá ne kau kakato ki ai. Te mou maʻu ʻa e ʻaonga lahi ange mei he ngaahi fakatahá ʻi he taimi ʻoku mou fai ai ha feinga ke kau ʻiate kinautolú.
8 ʻOku fiemaʻu ke mou longomoʻui ʻi he tokangataha ki he meʻa ʻoku akoʻi ʻi he ngaahi fakatahá. ʻI he taimi ʻe niʻihi, ko e fanongo ki ha malangá ʻoku faingataʻa ange ia ʻi hono fakahoko ha malangá. Ko e hā hono ʻuhingá? ʻOku takamilo holo nai homou ʻatamaí ʻi he taimi ʻoku lea ai ha taha kehe. ʻOku lava fēfē ke mou faitau mo e meʻá ni? ʻAki hono hiki ha ngaahi nouti. Hikiʻi hifo ha ngaahi poini mahuʻinga ʻa ia te mou fiemaʻu ke lave ki ai ʻamui ange. Ko hono hiki ha noutí te ne tokoniʻi kimoutolu ke hangataha homou ʻatamaí ki he polokalamá. ʻIkai ko ia pē, sio ki he ngaahi konga Tohitapú, pea muimui ʻi hono lau mai ʻe he tokotaha malangá ʻa e ngaahi konga tohi ko ʻení.
9 Tānaki atu ki ai, ʻai ia ko ha taumuʻa ke kau ʻi he lāulea ʻi he fehuʻi mo e tali taki taha ʻi he ngaahi fakatahá. Te mou maʻu ʻa e ʻaonga lahi angé kapau te mou fai ha fakakaukau tokanga ki he meʻa ʻoku mou loto ke leaʻakí. ʻOku pehē ʻe he Palovepi 15:28 (PM): “Oku fakakaukau e he loto oe maonioni ae lea te ne tali aki.”
10 Ngāueʻaki ʻa e Meʻa ʻOku Mou Akó: Ko e sitepu fakaʻosí ke fakapapauʻi ko e meʻa ʻoku mou akó ʻoku “ngāngāue ʻiate kimoutolu.” (1 Tes. 2:13) ʻI hoʻomou ngāueʻaki ʻa e ngaahi poini lelei ʻoku mou ako ʻi he fakataha taki taha, te mou ʻunuʻunu ofi ange ai kia Sihova ko e ʻOtuá. Te ne hoko ʻo moʻoni kiate kimoutolu, pea te mou hokosia ai ʻa e fiefia mo e fiemālie lahi ʻi hoʻomou “laka ʻi he moʻoni,” ʻo ʻai ia ko hoʻomou meʻa tonu.—3 Sione 4.
11 Fanga tokoua mo e tuofāfine kei talavou, ʻi hoʻomou teuteu maʻu pē ki he ngaahi fakatahá, ʻo kau ʻiate kinautolú, pea ngāueʻaki ʻa e meʻa kuo mou akó, te mou fiefia ai ʻi he ngaahi fakatahá ʻi he kakato tahá. ʻI he taimi tatau, ʻe lava ke mou maʻu ai ʻa e ʻaonga kotoa pē te mou ala maʻu meiate kinautolú. ʻE fakaivimālohiʻi ai hoʻomou tuí, ʻi hoʻomou fakapapauʻi ke moʻoni maʻu ai pē ki hoʻomou Tamai fakahēvaní, ʻa Sihova.—Sāme 145:18.