Founga ke Maʻu Ai ʻa e Fiefia Lahi Ange mei he Ngaahi Fakatahá

¹ ʻOku mātuʻaki mahuʻinga ʻa e ngaahi fakatahá ki heʻetau moʻui lelei fakalaumālié. Ko e fiefia ʻoku tau maʻu meiate kinautolú ʻoku lave fakahangatonu ia ki he meʻa naʻa tau fai ki muʻa, lolotonga, mo e hili ʻa e ngaahi fakatahá. ʻE lava fēfē ke tau tokoniʻi kitautolu mo e niʻihi kehé ke tauhi maʻu ʻa e fiefia ʻi hono maʻu ʻa e ngaahi fakatahá ʻi ha tuʻunga māʻolunga?

² Ki Muʻa ʻi he Ngaahi Fakatahá: Ko e teuteú ʻokú ne ʻomai ha ola fakahangatonu ki he fiefia ʻoku tau maʻu mei he ngaahi fakatahá. ʻI he taimi ʻoku tau teuteu lelei aí, ʻoku tau hehema lahi ange ai ke tokanga pea mo kau ki ai. Tānaki atu ki aí, ko ha konga pē ki he fakatahá ʻoku tau maʻu ʻoku totonu ke tau teuteu lelei mo e ngaahi taumuʻa ke ʻoatu ʻa e fakamatalá ke totonu ʻo fakatatau ki he ngaahi fakahinohinó pea mo hono maʻu mai ʻa e mahuʻingaʻia ʻa e kau fanongó. ʻOku totonu ke tau ʻahiʻahiʻi fakalelei. ʻI he taimi ʻoku tau tokoni ai ki he longomoʻui mo e langa hake ʻo e ngaahi fakatahá ke ʻaonga ki he tokotaha kotoa pē, ko ʻetau laka ki muʻa fakafoʻituituí ʻe hoko ia ʻo hā mahino pea te tau maʻu ai ʻa e fiefia lahi ange.​—1 Tim. 4:​15, 16.

³ ʻI he Lolotonga ʻo e Ngaahi Fakatahá: Ko hono fai ha tali ʻi he ngaahi fakatahá ʻe lava ke tokoni ia kiate kitautolu ke tau fiefia ange ai ʻiate kinautolu. Ko e ngaahi konga ʻoku fiemaʻu ke kau ki ai ʻa e kau fanongó ʻoku totonu ke vakai ki ai ko ha ngaahi konga fakafoʻituitui ia ki he tokotaha kotoa pē ʻi he fakatahaʻangá. Ko e ngaahi tali ʻoku nounou pea ki he poiní ʻoku faʻa tautautefito ʻene ola lelei tahá. Ko hono fakahaaʻi nounou ha ngaahi meʻa naʻe hokosia fakatupu langa hake ʻe lava ke fakalototoʻa mo fakaivimoʻui ʻaupito, pea ʻoku totonu ke tau tokanga ke fakakau kinautolu ʻo kapau ʻoku feʻungamālie. (Pal. 15:23; Ng. 15:3) ʻI hono fai ha konga ʻi he fakatahá, ʻoku totonu ke lea ʻi he loto-māfana mo e tuipau, ʻai ia ke mahuʻingamālie, moʻoni, pea ʻaonga.

⁴ ʻI he Hili ʻa e Ngaahi Fakatahá: Ko hono vahevahe mo e niʻihi kehé ha lea anga-ʻofa, fakafeʻiloaki anga-fakakaumeʻa, pea mo ha ngaahi poini tefito naʻe lāulea ki ai ʻi he ngaahi fakatahá ʻe ʻaonga ia kiate kitautolu kotoa. Ko hono fakahaaʻi ʻetau fiefia ʻi he sio ki he kau talavoú, ko e taʻumotuʻá, mo e faʻahinga foʻou ʻoku kau ki aí ʻokú ne fakalolotoʻi ai ʻa e ʻofa ʻa e fetokouaʻakí. ʻI he ʻikai ke fakaangaʻi ʻa e niʻihi naʻa nau liʻaki nai ʻa e ngaahi fakatahá, ʻoku totonu ke tau vahevahe mo kinautolu ʻetau fiefiá mei hono maʻu iá, ʻo fakalototoʻaʻi kinautolu ke nau maʻu ia.​—Hep. 10:​24, 25.

⁵ ʻAi ke ʻoua te tau fakamavaheʻi kitautolu mei he tokonaki mahuʻinga ko ʻeni ki hono fai ʻo e fefakalototoʻaʻakí. (Loma 1:​11, 12) ʻI he tokoni loto-tōnunga ʻaki ʻa e feinga fakamātoato kotoa pē, te tau tauhi maʻu kotoa ai ʻa e fiefia ʻi hono maʻu ʻa e ngaahi fakataha faka-Kalisitiané.