Tokanga ki he Ngaahi Ngāue Fakaofo ʻa e ʻOtuá
1 ʻI he ngaahi ʻaho fisifisimuʻa ʻe tolu, naʻa tau fakatahataha ai ki he Fakataha-Lahi Fakavahe “Kau Fai ki he Folofola ʻa e ʻOtuá.” Naʻe toʻo ai ʻetau tokangá mei he ngaahi loto-moʻua he ʻaho kotoa pē ki he moʻuí kae fakahangataha ki he ngaahi ngāue fakaofo ʻa Sihová. Naʻe faʻufaʻu ʻa e polokalamá ke fakatupulekina ʻetau tui ki he ʻOtuá pea mo ʻene Folofolá, ke fakaivimālohiʻi hotau vahaʻangatae mo iá, pea ke ʻai ke mālohi ʻetau faivelenga ʻi he ngāue fakafaifekaú. ʻOku anga-fēfē ʻetau maʻu ʻa e ʻaonga mei he ngaahi meʻa naʻe akoʻi mai kiate kitautolú?—Sione 13:17.
2 Talangofua ʻa e Ngaahi Fāmilí ki he Folofola ʻa e ʻOtuá: Ko e malanga fakakongokonga ko e “Talangofua ki he Folofola ʻa e ʻOtuá” naʻá ne tokoniʻi kitautolu ke tau sivisiviʻi ʻa e tuʻunga fakalaumālie ʻo hotau ngaahi fāmilí. ʻOku manako ʻa e fānaú ke ako. Ko ia ai, naʻe fakalototoʻaʻi ʻa e ngaahi mātuʻa anga-fakaʻotuá ke nau ʻai ʻa e ako Tohitapu fakafāmilí ko e makatuʻunga ia ki hono langa hake ha fāmili mālohi fakalaumālié. ʻOku fetalanoaʻaki ʻa e ngaahi ʻuluʻi fāmilí mo ʻenau fānau īkí ʻi he polosiua foʻou ko e ʻE Lava Ke Ke Hoko ko e Kaumeʻa ʻo e ʻOtuá! ʻE tokoniʻi ai heni kinautolu ke nau fakatupulekina ha vahaʻangatae fiefia mo malu mo Sihova. Ngaahi mātuʻa, akoʻi hoʻomou fānaú ki he founga ke nau tokanga ai ki he ngaahi ongoʻi ʻa e ʻOtuá. Fakahaaʻi ʻa hoʻo ʻofa tonu kiate ia mo ʻene ngaahi ngāué. (Sāme 103:2) Ngāue fakataha ke fokotuʻu pea maʻu ha ngaahi taumuʻa fakalaumālie pea ke hoko ʻo kau kakato ʻi he ngāue kia Sihová.
3 ʻOku Fakamaamaʻi ʻe he Folofola ʻa e ʻOtuá Hotau Halá: Naʻa tau fiefia ke maʻu ʻa e tohi foʻou ko e Isaiah’s Prophecy—Light for All Mankind I. Ko e hā hono lahi kuo aʻu ki ai ʻa hoʻo lau ʻa e ʻuluaki voliume ko ʻení? ʻOku tomuʻa tala ʻe he tohi ʻAiseá ʻa e ngaahi fakamaau fakalilifu ki he ngaahi puleʻanga anga taʻefakaʻotuá pea pehē ki he ngaahi tāpuaki lāngilangiʻia ʻo e Puleʻangá ki he kakai ʻa e ʻOtuá. (Ai. 34:2; 35:10) ʻOkú ne langa hake ʻa e tui mo e falala pau kia Sihová pea ki heʻene founga ʻo hono fai ʻo ha ngaahi meʻa.—Ai. 12:2-5.
4 ʻI hono tomuʻa lau ʻa e Isaiah’s Prophecy I, ʻoku lava ke ke ongoʻi ai ʻa e founga naʻe tauhi maʻu ai ʻe ʻAisea ʻene anga-tonu kia Sihová he lolotonga ʻo e ʻātakai fulikivanu naʻe takatakai kiate iá. ʻI he taimi naʻe fakaaʻu atu ai ha fakaafe ke ne hoko ko e talafekau ʻa e ʻOtuá, naʻe tali ʻe ʻAisea: “Ko au eni, fekau au.” (Ai. 6:9 [6:8, PM]) Ko e fakalaulauloto ki heʻene laumālie loto-leleí ʻe fakalototoʻaʻi ai koe ke ke hanganaki malangaʻi ʻa e ongoongo leleí, ʻo kau kakato ʻi he “fakamoʻoni ki he kotoa ʻo e ngaahi puleʻangá.”—Mt. 24:14, NW.
5 Ko ʻetau tokanga ki he ngaahi ngāue ʻa Sihová ʻe fakahīkihikiʻi ai hono tuʻunga-lahí. Ko ia, koloaʻaki ʻa e monū ʻo e hoko ko e kau fai ki he folofola ʻa e ʻOtuá!