Hanganaki Malanga!
1 Ko e finangalo ia ʻo e ʻOtuá “ke maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.” (1 Tim. 2:4) ʻI he ʻuhinga ko ʻení, kuó ne ʻomai ai kiate kitautolu ʻa e ngāue ke malangaʻi ʻa e ongoongo leleí. (Mt. 24:14) Kapau ʻoku tau mahinoʻi ʻa e ʻuhinga ʻoku totonu ai ke tau hanganaki malangá, ko ha faʻahinga fakalotosiʻi pē pe fakahohaʻa ʻe ngali hoko te tau fetaulaki mo ia ʻe ʻikai ke ne taʻofi kitautolu.
2 Ko e Hā ke Kītaki Aí? ʻOku lahi ʻa e ngaahi fakahohaʻa ʻi he māmaní ʻokú ne fakatupunga ʻa e kakaí ke nau fakangaloʻi pe ke nau fakamaʻamaʻaʻi ʻa e meʻa ʻoku tau tala atu kiate kinautolú. Ko ia, kuo pau ke tau hanganaki fakamanatu kiate kinautolu ʻa e pōpoaki ʻa e ʻOtuá ki he fakamoʻuí. (Mt. 24:38, 39) Tānaki atu ki aí, ko e ngaahi tuʻunga ʻi he moʻui ʻa e kakaí ʻoku liliu maʻu pē. Naʻa mo e ngaahi tuʻunga ʻi he māmaní ʻoku lava ke liliu fakafokifā pē ʻi ha pō. (1 Kol. 7:31) Ko ʻapongipongi, uike hoko maí, pe māhina hoko maí, ko e kakai ʻoku tau malanga ki aí te nau fehangahangai nai mo e ngaahi palopalema pe ngaahi loto-moʻua foʻou ʻa ia te ne fakatupunga ai kinautolu ke nau fai ha fakakaukau fakamātoato ki he ongoongo lelei ʻoku tau ʻoatu kiate kinautolú. ʻIkai ʻokú ke fakamālōʻia ʻi he kītaki ʻa e tokotaha Fakamoʻoni naʻá ne ʻoatu kiate koe ʻa e moʻoní?
3 Ke Faʻifaʻitaki ki he Meesi ʻa e ʻOtuá: Kuo fakaʻatā anga-kātaki ʻe Sihova ha taimi ke fakalaka atu ki muʻa ke ne fakahoko ʻa e fakamaau ki he kau fulikivanú. Fakafou ʻiate kitautolu ʻokú ne hokohoko atu ʻene kōlenga ki he faʻahinga loto-totonú ke nau tafoki ange kiate ia ka nau moʻui. (2 Pita 3:9) Te tau hoko ʻo halaia ʻi he totó ʻo kapau heʻikai te tau hanganaki fanongonongo atu ʻa e pōpoaki faimeesi ʻa e ʻOtuá ki he kakaí pea fakatokanga kiate kinautolu ʻo fekauʻaki mo e fakahoko fakamaau ʻa e ʻOtuá ʻoku tuʻunuku ki he faʻahinga kotoa ʻoku ʻikai te nau tafoki mei heʻenau ngaahi founga koví. (Isi. 33:1-11) Neongo ko ʻetau malangá ʻoku ʻikai talitali lelei maʻu pē, kuo pau ke ʻoua ʻaupito te tau holomui mei hono fai ʻa e feinga kotoa pē ke tokoniʻi ʻa e faʻahinga loto-moʻoní ke nau houngaʻia ʻi he meesi lahi ʻa e ʻOtuá.—Ng. 20:26, 27; Loma 12:11.
4 Ke Fakahāhā ʻEtau ʻOfá: Ko Sihova ko e ʻOtuá ia, fakafou ʻia Sīsū Kalaisi, naʻá ne fekauʻi ke malangaʻi ʻa e ongoongo leleí ʻi he kotoa ʻo e foʻi māmaní. (Mt. 28:19, 20) Naʻa mo e taimi ʻoku fakafisi ai ʻa e kakaí ke fanongó, ʻoku tau maʻu ha faingamālie ke fakahā ʻetau ʻofá mo ʻetau līʻoa ki he ʻOtuá ʻaki ʻetau kītaki ʻi hono fai ʻa e meʻa ʻoku totonú.—1 Sione 5:3.
5 ʻOfa ke tau fakapapauʻi ke hanganaki malanga! ʻAi ke tau fai pehē ʻi he faivelenga lolotonga ʻoku teʻeki ai ke hoko mai ʻa e “ʻaho fai fakamoʻui” ʻo Sihová.—2 Kol. 6:2.