“Koe Lea Oku Gali mo Totonu Hono Lea Aki”
1 Ko ha pole kiate koe ʻa hono vahevahe atu ʻa e pōpoaki ʻo e moʻuí ki he niʻihi kehé? ʻOkú ke ongoʻi kuo pau ke ke leaʻaki ha meʻa ʻoku lolotó ke maongo ki hoʻo kau fanongó? ʻI he taimi naʻe fekauʻi atu ai ʻe Sīsū ʻene kau ākongá, naʻá ne tala ange kiate kinautolu: “ʻI hoʻomou ō, mou fanongonongo, ʻo pehē, Kuo ofi ʻa e Puleʻanga ʻo Hevani.” (Mt. 10:7) Ko e pōpoakí naʻe ʻikai fihi pea naʻe faingofua ke fevahevaheʻaki. ʻOku ʻikai toe kehe ia ʻi he ʻahó ni.
2 ʻOku faʻa fiemaʻu pē ha ngaahi lea siʻi ke kamataʻaki ha fetalanoaʻaki. ʻI he taimi naʻe fetaulaki ai ʻa Filipe mo e ʻiunoke ʻItiopeá, naʻá ne ʻeke ange kiate ia: “ʻOku ke ʻilo ʻa e ʻuhinga ʻo e meʻa ʻoku ke lau?” (Ng. 8:30) Ko ha fetalanoaʻaki ʻaonga ē naʻe maʻú mei he “lea oku gali mo totonu hono lea aki”!—Pal. 25:11, PM.
3 Te ke lava ʻo ngāueʻaki ha fakalea meimei tatau ʻi hoʻo ngāue fakafaifekaú. Anga-fēfē? ʻAki ʻa e ʻiloʻilo pea filifili ʻa e ngaahi lea ʻoku feʻungamālie mo e ngaahi tuʻungá. ʻEke ha fehuʻi, pea fanongo ki he talí.
4 Ngaahi Fehuʻi Tefito ʻe Niʻihi: Ke kamata ha fetalanoaʻaki, te ke ʻahiʻahiʻi nai ha taha ʻo e ngaahi fehuʻi ko ʻení:
◼ “ʻOkú ke ngāueʻaki ʻa e Lotu ʻa e ʻEikí (pe, ko ʻEmau Tamaí) ʻi hoʻo lotú?” (Mt. 6:9, 10) Lau ha konga, peá ke fakahā ange leva: “ʻOku ʻeke ʻe he kakai ʻe niʻihi, ‘Ko hai ʻa e huafa ʻo e ʻOtuá ʻa ē naʻe pehē ʻe Sīsū ke fakatāpuhāʻí (pe, fakamāʻoniʻoniʻí)?’ ʻOku ʻeke ʻe he niʻihi, ‘Ko e hā ʻa e Puleʻanga ko ia naʻe pehē ʻe Sīsū ʻoku totonu ke tau lotu ʻo kolé?’ Kuó ke maʻu ha ngaahi tali fakafiemālie ki he ngaahi fehuʻi ko ʻení?”
◼ “Kuó ke fifili nai: ‘Ko e hā ʻa e ʻuhinga ʻo e moʻuí?’” Fakahaaʻi ʻoku felāveʻi ia mo ha ʻiloʻi ʻo e ʻOtuá.—Koh. 12:13; Sione 17:3.
◼ “ʻOkú ke fakakaukau ʻe faifai ange pea fakaʻauha ʻosi ʻa e maté?” Ngāueʻaki ʻa e Aisea 25:8 mo e Fakahā 21:4 ke fai ha tali alafalalaʻanga.
◼ “ʻOku ʻi ai ha fakaleleiʻanga faingofua ki he maveuveu ʻi he māmaní?” Fakahaaʻi ʻoku akoʻi ʻe he ʻOtuá ʻa e “ʻofa ki ho kaungaʻapi.”—Mt. 22:39.
◼ “ʻE fakaʻauha hotau foʻi māmaní ʻi ha ʻaho ʻe ha fakatamaki fakaeʻuniveesi?” Vahevahe ʻa e talaʻofa faka-Tohitapu ko ia ko e foʻi māmaní ʻe tuʻumaʻu ʻo taʻengata.—Sāme 104:5.
5 ʻOatu ʻa e ongoongo leleí ʻi ha founga faingofua, mo hangatonu pea ʻi ha fakalea anga-ʻofa. ʻE tāpuekina ʻe Sihova hoʻo ngaahi feinga ke vahevahe atú naʻa “mo ha foʻi lea” ʻo e moʻoní ki he niʻihi kehé.