“Ke Ulo Atu Hoʻomou Māma”
1 Ko e māmani ʻoku takatakai kiate kitautolú ʻoku ʻi he fakapoʻuli fakaeʻulungaanga mo fakalaumālie. ʻOku fakaeʻa ʻe he maama ʻo e moʻoní ʻa e “ngaahi ngaue taʻefua” ʻo e fakapoʻulí koeʻuhí kae lava ke fakaʻehiʻehi mei he ngaahi maka tūkiaʻanga fakatupu mate ko ʻení. Fakatatau ki ai, naʻe enginaki ai ʻa e ʻapositolo ko Paulá ki he kau Kalisitiané: “Mou laka ʻo tāu mo e fanau ʻa maama.”—Ef. 5:8, 11.
2 “Ko e fua ʻo e maama” ʻoku faikehekehe ʻaupito ia mo e fakapōpōʻuli ʻa e māmaní. (Ef. 5:9) Ke fakatupulekina ʻa e fua ko ʻení ʻoku fiemaʻu ke tau hoko ko e ngaahi faʻifaʻitakiʻanga tuʻu-ki-muʻa ʻi he moʻui faka-Kalisitiané, ʻa e faʻahinga kakai ʻoku hōifua ki ai ʻa Sīsuú. Kuo pau foki ke tau toe fakahāhā ʻa e ngaahi ʻulungaanga ko ia hangē ko e ʻaufuatō, loto-totonu, mo e loto-māfana fekauʻaki mo e moʻoní. ʻOku fiemaʻu ke fakahāhā ʻa e fua ko ʻení ʻi heʻetau moʻui he ʻaho kotoa pē pea ʻi heʻetau ngāue fakafaifekaú.
3 Ulo Atu ʻi he Faingamālie Kotoa Pē: Naʻe tala ʻe Sīsū ki heʻene kau ākongá: “Ke ulo atu hoʻomou māma ke hā ki he kakai.” (Mt. 5:16) ʻI he faʻifaʻitaki kia Sīsuú, ʻoku tau tapua atu ai ʻa e maama ʻa Sihová ʻaki ʻa e malanga fekauʻaki mo e Puleʻanga ʻo e ʻOtuá pea mo ʻene ngaahi taumuʻá. ʻOku tau ulo atu ʻi he tuʻunga ko e ngaahi maamaʻanga ʻi he taimi ʻoku tau ʻaʻahi ai ki he ngaahi ʻapi ʻo e kakaí pea ʻi he taimi ʻoku tau fakamafola atu ai ʻa e moʻoní ʻi he ngāueʻangá, ʻi he ʻapiakó, ʻi he lotolotonga ʻo hotau ngaahi kaungāʻapí, pe ʻi ha feituʻu pē ʻoku tau maʻu ai ha faingamālié.—Fili. 2:15.
4 Naʻe pehē ʻe Sīsū ʻe fehiʻa ha niʻihi ki he māmá. (Sione 3:20) Ko ia ʻoku ʻikai te tau loto-siʻi ʻi he taimi ʻoku fakafisi ai ʻa e tokolahi ke fakaʻatā ʻa e “huluʻia ʻe he ulo mei he Kosipeli ʻo e langilangi ʻo Kalaisi” ke ulo atu kiate kinautolú. (2 Kol. 4:4) ʻOku ʻafioʻi ʻe Sihova ʻa e loto ʻo e faʻahinga ʻo e tangatá pea ʻoku ʻikai te ne fiemaʻu ha faʻahinga ʻoku nau tōʻonga taʻemāʻoniʻoni ʻi he lotolotonga ʻo ʻene kakaí.
5 ʻI heʻetau muimui ki he ngaahi ʻalunga ʻo Sihová pea maʻu ʻa e maama fakalaumālié, ʻoku lava ke tau tapua atu ia ki he niʻihi kehé. Kapau ʻoku nau ʻilo fakafou ʻi hotau ʻulungāngá ʻoku tau “maʻu ʻa e maama ʻo e moʻui,” ʻe ueʻi leva ai mo kinautolu foki ke nau fai ha ngaahi liliu ʻoku fiemaʻú koeʻuhi ka nau hoko ko e kau tapua atu ʻo e māmá.—Sione 8:12.
6 ʻI hono tuku ke ulo atu ʻetau māmá, ʻoku tau ʻomai ai ʻa e fakahīkihiki ki hotau Tokotaha-Fakatupú pea tokoniʻi ai ʻa e faʻahinga loto-totonú ke nau ʻilo ia pea maʻu ʻa e ʻamanaki ʻo e moʻui taʻengatá. (1 Pita 2:12) Koeʻuhi ʻoku tau maʻu ʻa e māmá, ʻai ke tau ngāueʻaki ia ke tataki mai ʻaki ʻa e niʻihi kehé mei he fakapoʻuli fakalaumālié pea nau fakahoko ʻa e ngaahi ngāue ʻoku kau ki he māmá.