“Ke Ulo Atu Hoʻomou Māma”
1. Ko e hā ʻoku tau maʻu ko e monū ia ke vahevahe atú?
1 Mei he mafoa ʻa e atá ki he mamalu ʻa e poʻulí, ko e fakaʻofoʻofa ʻo e maama ʻoku haá ʻoku ʻoatu ai ʻa e fakahīkihiki kia Sihova ko e ʻOtuá. Kae kehe, ko ha faʻahinga maama ia ʻe taha naʻe fakaafeʻi ʻe Sīsū ʻene kau ākongá ke nau maʻú—“ʻa e maama ʻo e moʻui.” (Sione 8:12) Ko hono maʻu ʻa e maama fakalaumālie ko ení ko ha monū makehe ia ʻoku kau ki ai ʻa e ngaahi fatongia mafatukituki. Naʻe fakahinohino ʻe Sīsū: “Ke ulo atu hoʻomou māma ke hā ki he kakai,” ke maʻu ʻaonga mei ai ʻa e niʻihi kehé. (Mt. 5:16) ʻI he lotolotonga ʻo e fakapoʻuli lōlō fakalaumālie ʻo e ʻaho ní, kuo pau ke vahevahe atu ʻa e maama ko ení, pea kuo teʻeki ha taimi ʻe lahi ange ai ʻa e fiemaʻú! Te tau lava fēfē, hangē ko Kalaisí, ʻo ʻai ke ulo atu ʻetau māmá?
2. Naʻe anga-fēfē hono fakahāhā ʻe Sīsū ʻa e mahuʻinga hono vahevahe atu ʻa e maama fakalaumālié?
2 Fakafou ʻi he Malanga: Naʻe ngāueʻaki ʻe Sīsū hono taimí, iví, mo ʻene koloá ke ʻai ʻa e maama ʻo e moʻoní ke ʻilo ʻe he kakai ʻi honau ngaahi ʻapí, ʻi he ngaahi malaʻe fakapuleʻangá, ʻi he ngaahi funga moʻungá—ʻi ha feituʻu pē ʻe lava ke maʻu ai kinautolú. Naʻá ne ʻiloʻi ʻa e mahuʻinga tuʻuloa ʻo hono tokonaki ʻa e maama fakalaumālie moʻoní. (Sione 12:46) Ke aʻu ki ha toe kakai tokolahi ange, naʻe teuʻi ʻe Sīsū ʻene kau ākongá ke nau hoko ko e “māma ʻo mamani.” (Mt. 5:14) Naʻa nau ʻai ʻenau māmá ke ulo atu ʻaki ʻa e failelei ki honau ngaahi kaungāʻapí pea ʻaki ʻa e vahevahe atu ʻa e ngaahi moʻoni fakalaumālié.
3. ʻE lava fēfē ke tau fakahāhā ʻa e houngaʻia moʻoni ki he maama ʻo e moʻoní?
3 ʻOku fakahoko fakamātoato ʻe he kakai ʻa e ʻOtuá ʻa e fatongia ke “laka ʻo tāu mo e fanau ʻa maama,” pea ʻoku nau malanga ʻi ha feituʻu pē ʻe lava ke maʻu ai ʻa e kakaí. (Ef. 5:8) Ko hono lau pē ʻa e Tohi Tapú pe ko ha ngaahi tohi faka-Kalisitiane kehe ʻi he ʻao ʻo e kakaí lolotonga ha mālōlō ʻa e ngāué pe akó, ʻe lava ke fakaava ai ha matapā ki ha fetalanoaʻaki Fakatohitapu. ʻI he foungá ni, naʻe kamata ai ʻe ha kiʻi tuofefine ha ako Tohi Tapu pea tuku ai ʻa e ngaahi tohi ʻi he toko 12 ʻo hono kaungākalasí!
4. Ko e hā ʻoku kau ai ʻa e tōʻonga alafaʻifaʻitakiʻangá ʻi he ‘ulo atu ʻetau māmá’?
4 Fakafou ʻi he Ngaahi Ngāue Lelei: Ke ulo atu ʻetau māmá ʻoku kau foki ki ai ʻetau fakafeangai pe tōʻonga fakaʻahó. (Ef. 5:9) ʻI he ngāueʻangá, ʻapiakó, pea ʻi he feituʻu kakai kehé, ko e tōʻonga faka-Kalisitiané ʻoku tekeutua ia ʻo fakatupunga ai ha ngaahi faingamālie ke vahevahe atu ai ʻa e ngaahi moʻoni Fakatohitapú. (1 Pita 2:12) Ko e fakatātaá, ko e ʻulungaanga lelei ʻo ha kiʻi tamasiʻi taʻu nima naʻe ueʻi ai ʻene faiakó ke telefoni ki heʻene ongo mātuʻá. Naʻá ne pehē, “Kuo teʻeki ʻaupito ke u sio ʻi ha kiʻi tamasiʻi ʻokú ne maʻu ha ongoʻi mālohi pehē fekauʻaki mo e tuʻunga fakamōlalé!” ʻIo, ko ʻetau ngāue fakafaifekaú mo e tōʻonga leleí ʻoku tohoaki mai ai ʻa e kakaí ki he “maama ʻo e moʻui” pea ʻoatu ai ʻa e fakahīkihiki ki hotau ʻOtuá.