Hoko ko ha Tokotaha Ngāue Fiefia
1 Naʻe pehē ʻe Sīsū ko e lolotonga ʻo ʻene ʻi aí, ko e tokolahi tahá ʻe ‘ikai te nau amanaki,’ ʻo hangē pē ko e ʻaho ʻo Noá. (Mt. 24:37-39, PM) ʻOku ʻamanekina leva, ko e faʻahinga tokolahi ʻe ʻikai te nau fanongo ki he ongoongo lelei ʻo e Puleʻangá. Ko e hā ʻe lava ke ne tokoniʻi kitautolu ke tau tauhi maʻu ha laumālie fiefia ʻi heʻetau fakahoko ʻetau ngāue fakafaifekaú?—Sāme 100:2.
2 ʻUluakí, ʻoku fiemaʻu ke tau manatuʻi ko ʻetau pōpoakí fakatouʻosi mo ʻetau ngāue kuo vaheʻi mai ke malangá ʻoku mei he ʻOtuá. Ko ha ʻikai ke tali ia ʻi he ngāue fakafaifekaú, neongo ʻetau ngaahi feinga lelei tahá, ʻoku moʻoni ko hano talitekeʻi ia ʻo Sihova. Ko hono manatuʻi ko ʻetau loto-tōnunga ʻi he malangá ʻokú ne ʻomai ai ʻa ʻene hōifuá, ʻe tokoniʻi ai kitautolu ke tau tauhi maʻu ʻetau fiefiá mo ʻetau fiefialotó ʻi he tuʻunga ko e kau fai ki he folofola ʻa e ʻOtuá.—Sem. 1:25.
3 Uá, ʻoku kei ʻi ai ʻa e faʻahinga tāutaha te nau tali ʻa e ngaahi founga ʻa Sihova ki he fakamoʻuí. Neongo ko e tokolahi te nau loto-noa nai, ʻoku ʻi ai pē ʻa e faʻahinga hangē ha sipí ʻoku teʻeki ke fakatahatahaʻi, naʻa mo e taimí ni, ʻi he ʻuhouhonga ʻo e taimi ʻo e ngataʻangá. ʻOku fiemaʻu ke tau hanganaki malanga, ʻo ʻalu “ki ha kolo, pe ha vilisi” ke “ʻeke pe ko hai ha taha ʻoku tāu.”—Mt. 10:11-13.
4 Tauhi Maʻu ha Fakakaukau Pau: Ko e lēkooti kovi ʻo e lotu loí ʻokú ne fakapotoʻi ha niʻihi. Kuo “ongosia mo tukuhāusia” ʻa e niʻihi ʻi he fokotuʻutuʻu ko ʻeni ʻo e ngaahi meʻá. (Mt. 9:36) ʻOku lōmekina nai ʻa e tokolahi ʻi he siʻi ʻo e maʻu ngāué, tokangaʻi ʻo e moʻuileleí, mo e maluʻangá. Ko hono mahinoʻi ʻení te ne tokoniʻi kitautolu ke tau kītaki ʻi heʻetau ngāué. Feinga ke kamata ha ngaahi fetalanoaʻaki ʻa ē ʻoku fekauʻaki mo e ngaahi ʻīsiu ʻoku fakahohaʻa lahi taha ki he kakai ʻi hotau feituʻú. Tokoniʻi kinautolu ke nau sio ko e Puleʻanga ʻo e ʻOtuá ko e fakaleleiʻangá pē ia. Ngāueʻaki ʻa e ngaahi Konga Tohitapú mo e ngaahi poini tefito ʻi he ngaahi tohí ke aʻu ki honau lotó mo e ongoongo leleí.—Hep. 4:12.
5 Ko e kau fai fiefia ʻo e folofola ʻa e ʻOtuá ʻoku nau manatuʻi maʻu pē: “Ko e fiefia ʻi he ʻEiki ko [hotau] malohinga ia.” (Nehe. 8:10) ʻOku ʻikai fiemaʻu ke mole ʻetau fiefiá. “Kapau ʻoku tāu moʻoni ʻa e fale, ʻe toka ai hoʻomou tāpuaki; pea kapau ʻoku ʻikai tāu, pea ko hoʻomou tāpuaki ʻe foki mai.” (Mt. 10:13) ʻOku fakafoʻou ʻe Sihova ʻetau fiefiá mo e mālohí ʻi heʻetau kītaki ʻi he anga-kātaki ʻi heʻene ngāue toputapú, pea te ne tāpuakiʻi ʻetau loto-tōnungá.