Tokanga ke Kumi ki he Kakai ʻOku Tuli ʻi Ho Feituʻu Ngāué

¹ ʻOku fakaaʻu mai ʻe Sihova ha fakaafe: “Haʻu. . . . ko ia oku loto ki ai, ke ne too taetotogi eia ae vai oe moui.” (Fkh. 22:​17, PM) Ko ha tokolahi fakautuutu ʻo e kakai tulí ʻoku nau ʻi he lotolotonga ʻo e faʻahinga ʻoku nau tali ʻa e ui ko ʻení. Ko hono olá, ʻi he lolotonga ʻo e taʻu ʻe 13 kuohilí, kuo fokotuʻu ai ʻi he vaʻa ʻi ʻIunaite Seteté ʻa e ngaahi fakatahaʻanga lea fakaʻilonga ʻe 27 mo e kulupu lea fakaʻilonga ʻe 43, pea kuo fokotuʻu foki ʻa e ngaahi kulupu lea fakaʻilonga lahi ʻi he ngaahi vaʻa kehé.

² Neongo ko e ngaahi fakatahaʻanga mo e ngaahi kulupu lea fakaʻilongá ʻoku fakahangataha kotoa ʻenau feinga malangá ki he fetuʻutaki mo e kakai tuli mo e kakai ʻikai ke fanongo lelei ʻi honau ngaahi feituʻu ngāue tefitó, ʻoku ʻi ai ʻa e faʻahinga pehē tokolahi ʻoku teʻeki ke ʻiloʻi kinautolu pea mo fai ha fakamoʻoni ki ai ʻi he ngaahi feituʻu kehé.

³ ʻE Lava Fēfē Ke Ke Tokoni? ʻI he lolotonga ʻo e ʻi he ngaahi feituʻu kakaí, kuó ke fakatokangaʻi ai ha kakai ʻoku nau ngāueʻaki ʻa e lea fakaʻilongá? ʻOkú ke ʻilo ha taha ʻi hoʻo ngāueʻangá pe ʻi ho ʻapiakó ʻoku ʻi ai ha mēmipa ʻi hono fāmilí ʻoku tuli? Tokanga ke kumi ki he faʻahinga ʻoku nau tulí ʻi hoʻo fai ʻa hoʻo ngaahi ngāue fakaʻahó. Ka ʻe lava fēfē ke ke fakapapauʻi te nau maʻu ha fakamoʻoni ʻo e Puleʻangá?

⁴ Ko Hono Fai ha Fakamoʻoni: Kapau ʻoku ʻi ai ha fakatahaʻanga pe kulupu lea fakaʻilonga ʻi ho feituʻú, fakahā kiate kinautolu ʻa e tuʻasila ʻo e tokotaha tulí. ʻOku fakalakalaka vave ange ʻa e kau tuli tokolahi ʻi hono ako ʻa e moʻoní ʻi he taimi ʻoku malava ai ke nau feohi mo ha Kau Fakamoʻoni tuli ʻi he ngaahi fakataha fakaefakatahaʻanga ʻoku fai ʻi he lea fakaʻilonga fakalotofonuá. ʻOku totonu ki he sekelitali ʻa hoʻo fakatahaʻangá ke ne ʻoatu ki he fakatahaʻanga pe kulupu lea fakaʻilongá ha fakamatala fekauʻaki mo e kakai tuli kotoa pē ʻi ho feituʻu ngāué.

⁵ Fēfē kapau ʻoku ʻikai ʻi ai ha taha ʻe ofi mai ke ne fai ha tokoni fakalaumālie ki he kakai tuli ʻi ho koló? ʻE lava fēfē nai ke ke tokoni? Ko e hā ʻoku ʻikai te ke fai ai ha toe ʻaʻahi pea talanoa ki ha mēmipa pē ʻi he ʻapí ʻoku fanongó? Te nau malava nai ke tokoni kiate koe ke fetuʻutaki mo e tokotaha tulí. Kapau ʻoku mahino ki he tokotahá ʻa e lea fakaʻilonga ʻoku ngāueʻaki ʻi ho fonuá, fekumi ki he hingoa fakaʻofisiale ʻo e lea fakaʻilonga ko iá pea fakahā ki he sekelitali ʻi hoʻo fakatahaʻangá. Te ne lava ke vakaiʻi ki he ʻōfisi vaʻá pe ʻoku ala maʻu ha ngaahi foʻi vitiō ʻi he lea fakaʻilonga ko iá. Kapau ko ia, ʻe lava ke ke tuʻuaki ange ke huluʻi ha foʻi vitiō lea fakaʻilonga ke langaʻi ai ʻa e mahuʻingaʻia ʻa e tokotaha tulí. Ko e kau malanga ʻe niʻihi kuo aʻu ʻo nau ako ʻa e lea fakaʻilonga fakalotofonuá koeʻuhi ke malava ke nau aʻu ola lelei ange ai ki he kau tulí. (Ng. 16:​9, 10) Ko e polosiua Fiemaʻu pea mo e tohi ʻIlo ʻoku ala maʻu ia ʻi he foʻi vitiō Lea Fakaʻilonga Faka-ʻAmeliká, pea ko e ngaahi foʻi vitiō peheé kuo faʻu ia ʻi he ngaahi lea fakaʻilonga ʻe niʻihi ʻoku ngāueʻaki ʻi he ngaahi fonua kehé. Ko hono fai ha ngaahi ako Tohitapu ʻo ngāueʻaki ʻa e ngaahi meʻangāue ko ʻení kuó ne ʻomai ʻa e ngaahi ola lelei lahi.

⁶ ʻI he tokanga ke kumi ʻa e kakai tuli ʻi ho feituʻú, ʻoku lava ai ke ke ʻoange kiate kinautolu ha faingamālie ke nau toʻo taʻetotongi ʻa e vai ʻo e moʻuí.—Mt. 10:11.