Aʻu ki he Loto ʻo Hoʻo Tokotaha Akó
1 Ki muʻa ke hāʻele hake ki hēvaní, naʻe tala ange ʻe Sīsū ki heʻene kau ākongá ke akoʻi ʻa e niʻihi kehé ke nau “tauhi” ʻa e ngaahi meʻa kotoa naʻá ne fekau maí. (Mt. 28:19, 20) Kapau ʻoku teu ke “tauhi” ʻe ha taha ʻa e ngaahi fekau ʻa Kalaisí, kuo pau ke aʻu ʻa e fakamatalá ki hono lotó. (Sāme 119:112) ʻE lava fēfē ke ke ueʻi ʻa e loto ʻo ha taha ʻokú ke ako Tohitapu mo ia?
2 Lotu ki he Tataki ʻa Sihová: Ko e ngaohi-ākongá ko e ngāue ia ʻa e ʻOtuá. Ko ʻene tāpuakí, kae ʻikai ko ʻetau ngaahi malavá, ʻoku fiemaʻu ki he lavameʻá. (Ng. 16:14; 1 Kol. 3:7) Ko ia, ʻoku mātuʻaki fiemaʻu ke lotu ki he tokoni ʻa Sihová ʻi hono akoʻi ki he niʻihi kehé ʻa e moʻoní.—Ai. 50:4.
3 ʻIloʻilo ki he Meʻa ʻOku Tui Ki Ai ʻa e Tokotaha Akó: Ko hono ʻilo ʻa e meʻa ʻoku tui ki ai ʻa e kakaí pea mo e ʻuhinga ʻoku nau tui ai ki aí ʻe lava ke ne ʻomai kiate kitautolu ʻa e vavanga ki he meʻa te tau leaʻaki ke aʻu ki honau lotó. Ko e hā ʻoku ʻilo ai ʻe ha tokotaha ako ha akonaki pau ʻoku fakamānako? Ko e hā naʻá ne fakatuipauʻi ia ke ne malava ai ʻo tui ki aí? ʻE lava ʻe he ʻilo peheé ke ne tokoniʻi kitautolu ke tau lea ʻi he ʻiloʻilo.—Ng. 17:22, 23.
4 Langa Hake ha Fetalanoaʻaki Moʻoni mo Fakatohitapu: Kuo pau ke mahino ʻa e moʻoní ki he tokotaha akó. (Ng. 17:24-31) ʻOku fiemaʻu ke tau ʻoatu ha ʻuhinga lelei ki heʻetau ʻamanakí. (1 Pita 3:15) Kae kehe, fai maʻu pē ia ʻi ha tōʻonga anga-ʻofa mo faʻa kātaki.
5 Fakaivimālohiʻi Ia ʻAki ha Ngaahi Talanoa Fakatātā: ʻOku ʻikai ke ngata pē ʻi hono ʻai ʻe he ngaahi talanoa fakatātaá ke faingofua ange ke mahino ki he tokotaha akó ka ʻe toe ueʻi ai ʻene ongoʻí. ʻOku ueʻi ʻe he ngaahi fakatātaá honau ʻatamaí mo e lotó fakatouʻosi. Naʻe faʻa ngāueʻaki kinautolu ʻe Sīsū. (Mk. 4:33, 34) Ko ia ai, ke hoko ʻo ola leleí, kuo pau ke feʻungamālie ʻa e talanoa fakatātā ʻoku ngāueʻakí mo e poini ʻoku fai ki ai ʻa e fetalanoaʻakí, pea ʻoku totonu ke felāveʻi ia mo e moʻui ʻa e tokotaha akó.
6 Fakahā ʻa e ʻAonga ʻo Hono Tali ʻa e Moʻoní: ʻOku fiemaʻu ʻe he kakaí ke nau ʻilo ʻa e ʻaonga ʻo hono ngāueʻaki ʻa e meʻa ʻoku nau akó. Tokoniʻi hoʻo tokotaha akó ke ne sio ki he fakapotopoto ʻo e ngaahi lea ʻa Paula ʻi he 2 Timote 3:14-17.
7 ʻOua ʻe loto-siʻi ʻo kapau heʻikai ke tali ʻe ha niʻihi ʻa hoʻo faiakó. ʻOku ʻikai ke ongongofua ʻa e ngaahi loto kotoa pē. (Mt. 13:15) Kae kehe, ʻoku hoko nai ha faʻahinga tāutaha ko e kau tui. (Ng. 17:32-34) ʻOfa ke tokoniʻi ʻe hoʻo ngaahi feinga ke aʻu ki he lotó mo e ongoongo leleí ha tokolahi ange ke nau tali pea “tauhi” ʻa e ngaahi meʻa naʻe fekau mai ʻe Sīsuú.