Tauhi ʻa e Taimi Mālōloó ʻi Hono Tuʻunga Totonú
1 ʻI he ngaahi ʻaho faingataʻa ko ʻení ko kitautolu kotoa ʻoku tau fiemaʻu ha liliu ʻi he anga ʻo ʻetau laká ʻi he taimi ki he taimi. Ko ha taimi pau ʻo e fakafiefiá ʻoku totonu. Kae kehe, ko e fuʻu lahi ʻo e taimi ʻoku fakamoleki ʻi he mālōloó, fakafiefiá mo e feohí ʻe lava ke ne fakamāmālieʻi ai ha taha ke ne fakamoleki ha taimi ʻoku faai ke siʻisiʻi ange ʻi he ngaahi ngāue fakalaumālié. Kuo pau ke tau tauhi ʻa e taimi mālōloó ʻi hono tuʻunga totonú. (Mt. 5:3) ʻE malava fēfē ʻeni? ʻAki ʻa e muimui ʻi he akonaki ʻoku maʻu ʻi he Efeso 5:15-17 (NW).
2 Fokotuʻu ha Ngaahi Fakangatangata: Naʻe tohi ʻa Paula ʻo pehē ʻoku taau ki he kau Kalisitiané ke nau “hanganaki tokanga” ki he founga ke fakapotopoto ai ʻa ʻenau moʻuiʻaki ʻenau moʻuí. Ko e fakanānaá mo e mapuleʻi-kitá ʻoku fiemaʻu ia ke fakangatangataʻaki ʻa e taimi mālōloó ki ha meʻa ʻoku fiemaʻu moʻoni. ʻOku lelei ke fai ha tokanga fakamātoato ki he founga ʻoku tau ngāueʻaki ai hotau taimi ʻataá. ʻOku totonu ke hoko nai ʻa e fakafiefiá ko ha taumuʻa ʻaonga kae ʻikai ko hano ʻai kitautolu ke tau ongoʻi kuo tau fakamoleki noaʻia hotau taimí pe ko hono ʻai kitautolu ke tau helaʻia. Kapau ʻoku tau ongoʻi taʻelavameʻa, ʻikai fiemālie pea mo ongoʻi halaia ʻi ha hili haʻatau kau ki ha ngāue, ʻoku fakahaaʻi ʻe he meʻá ni ʻoku fiemaʻu ke fai ha ngaahi feʻunuʻaki ʻi heʻetau ngāueʻaki ʻa e taimí.
3 Hoko ʻo Fakakaukau Lelei: Naʻe ʻomai ʻe Paula ʻa e akonaki ki hono “fakatau mai ʻa e taimi faingamālié” ki he ngaahi meʻa mahuʻinga lahi ange ʻo e moʻuí, ʻo ʻikai ke hoko ʻo “taʻefakakaukau lelei.” ʻOku ʻikai lava ke fakaʻatā ʻe he kau Kalisitiane fakatapuí ʻenau moʻuí ke fakatefito ʻi he taimi mālōloó. Neongo ko e mālōloó mo e fakafiemālié ʻe lava ke ne fakaivifoʻou fakaesino kitautolu, ko e matavai ʻo e mālohi fakalaumālié ko e ivi ngāue ʻo e ʻOtuá. (Ai. 40:29-31) ʻOku tau maʻu hono laumālié ʻo fakafou ʻi he ngaahi ngāue fakateokalatí—ko hono ako ʻa e Tohitapú, maʻu ʻa e ngaahi fakataha ʻa e fakatahaʻangá mo e kau ki he ngāue fakamalangá—ʻikai fakafou ʻi he fakafiefiá.
4 Fokotuʻu ʻa e Ngaahi Meʻa ke Fakamuʻomuʻá: Naʻe fakahinohino ʻe Paula ʻa e kau Kalisitiané ke “hokohoko atu ʻi hono ʻiloʻi ʻa e finangalo ʻo Sihová.” Naʻe akoʻi ʻe Sīsū ʻo pehē ʻoku totonu ke fakatefito ʻetau ngaahi ngāué ʻi he Puleʻanga ʻo e ʻOtuá ko e meʻa muʻomuʻa ia ʻi heʻetau moʻuí. (Mt. 6:33) ʻOku fiemaʻu ke tau ʻuluaki fai ʻa e ngaahi meʻa ʻe fakaʻatā ai kitautolu ke tau moʻuiʻaki ʻetau fakatapui kia Sihová. Hili iá, ʻe lava ke tauhi ʻa e taimi mālōloó ʻi hono tuʻunga totonú. ʻI hono fai iá, ʻe maʻu ai ha ola lelei pea te tau fiefia lahi ange ai.—Koh. 5:12.