Ngāuefakapotopotoʻaki Ho Taimí
1 Ko ʻetau holi ko ia ke fakahōifuaʻi ʻa Sihová ʻoku ueʻi ai kitautolu ke fakatefito ʻetau moʻuí ʻi he ngaahi ngāue fakalaumālié. ʻOku fakahinohinoʻi kitautolu ʻe Heʻene Folofolá ke tau “fuofua kumi ae buleaga” pea ke “fakapapauʻi ʻa e ngaahi meʻa mahuʻinga lahi angé.” (Mt. 6:33, PM; Fili. 1:10, NW) ʻE lava fēfē ke tau fakatau mai ʻa e taimi ki he ngaahi meʻa ʻo e Puleʻangá pea tauhi ke fika ua ʻa e ngaahi meʻa ʻoku mahuʻinga siʻisiʻí?—Ef. 5:15-17.
2 Fakamuʻomuʻa ʻa e Ngaahi Ngāue ʻo e Puleʻangá: Fakataimitēpileʻi ho taimí ke ʻoua ʻe fakamoleki noa ʻi he ngaahi meʻa ʻoku ʻikai fiemaʻu paú. Ko e niʻihi ʻoku nau kamata he māhina taki taha ʻaki hono fakataimitēpileʻi ʻa e ngaahi taimi pau ʻi heʻenau tohi māhiná ki he malaʻe fakafaifekaú. Pea ʻoku nau fakapapauʻi leva ke ʻoua ʻe fakaʻatā ʻa e ngaahi meʻa kehé ke ne taʻofi ʻa e ngaahi palani ko iá. ʻE lava ke tau fai ʻa e meʻa tatau ke fakatau mai ʻa e taimi ki he ngaahi fakatahá, ako fakafoʻituituí mo e ngaahi fakataha-lahí. ʻOku maʻu ʻe he tokolahi ha taimi-tēpile fakaʻaho ʻa ia ʻoku kamataʻaki pe fakaʻosiʻaki ʻa e lau Tohi Tapu. Vaheʻi ha taimi pau ki he ngāue mahuʻinga taki taha, pea ʻoua ʻe fakaʻatā ʻa e ngaahi meʻa kehé ke ne taʻofi noa ia.—Koh. 3:1; 1 Kol. 14:40.
3 Fakangatangata ʻa e Ngāueʻaki ʻo e Māmaní: ʻI he ngaahi fonua ʻe niʻihi, ʻoku maʻungofua ai ʻa e sipotí, fakafiefiá, vaʻingá, meʻa fakaemanakó mo e ngaahi ngāue kehé. Ko e tokolahi ʻoku nau fakamoleki ʻa e taimi lahi ʻaupito ʻi he mamata he televīsoné pe ʻi hono ngāueʻaki ʻa e komipiutá. Kae kehe, ko e hoko ʻo fakafemoʻuekinaʻi kita ʻi he ngaahi ngāue ʻo e taimi ʻataá mo e ngaahi naunau foʻou ʻoku tuʻuaki mai ʻe he māmani ko ení, ʻe taki taʻealataʻofi atu ai ki he loto-mamahi. (1 Sione 2:15-17) Ko ia ai, ʻoku fakaʻaiʻai kitautolu ʻe he Tohi Tapú ke ʻoua te tau feinga ke ʻosiki ʻa e māmaní. (1 Kol. 7:31) Fakafou ʻi he talangofua ki he faleʻi fakapotopoto ko iá, ʻe lava ai ke ke fakahaaʻi kia Sihova ʻoku muʻomuʻa ʻa ʻene lotú ʻi hoʻo moʻuí.—Mt. 6:19-21.
4 Ko e taimi ʻoku toe ki he fokotuʻutuʻu lolotonga ko ení ʻoku vavé ni ke ngata. Ko e faʻahinga ko ia ʻoku nau fakamuʻomuʻa ʻa e ngaahi meʻa ʻo e Puleʻangá te nau fiefia pea te nau maʻu ʻa e hōifua ʻa e ʻOtuá. (Pal. 8:32-35; Sem. 1:25) Ko ia ai, fakatauange te tau ngāuefakapotopotoʻaki ʻa e koloa mahuʻinga ko ení, ʻa hotau taimí.