Ko e Hā ʻOkú Ke Fakamuʻomuʻá?
1 ʻE fēfē ʻa hoʻo tali ʻa e fehuʻi ko iá? Ko hono moʻoní, ko kitautolu kotoa ʻoku tau saiʻia ke fakamuʻomuʻa ʻa e ngaahi meʻa ʻo e Puleʻangá. (Mt. 6:33) Ka te tau ʻeke hifo nai kia kitautolu, ‘ʻOku fakahaaʻi ʻe he ngaahi fili ʻoku ou faí ʻoku ou pehē?’ ʻOku fakalototoʻaʻi kitautolu ʻe he Tohi Tapú: “ʻEke fakamoʻoni meiate kimoutolu.” (2 Kol. 13:5) ʻE lava fēfē ke tau ʻeke fakamoʻoni hifo kia kitautolu pe ʻoku tau fakamuʻomuʻa ʻa e Puleʻangá?
2 Ko Hotau Taimí: ʻE lava ke tau ʻuluaki sivisiviʻi ʻa e founga ʻoku tau ngāueʻaki ai hotau taimí. (Ef. 5:15, 16) Ko e hā hono lahi ʻo e taimi ʻoku fakamoleki ʻi he uike taki taha he feohi fakasōsialé, mamata televīsoné, ngāueʻaki ʻo e ʻInitanetí, pe ko e tuli ki he vaʻingá? Kapau te tau hikiʻi hifo ʻa e lahi ʻo e taimi ʻoku tau fakamoleki ʻi he ngaahi meʻa peheé pea fakahoa ia mo e lahi ʻo e taimi ʻoku tau ngāueʻaki ki he ngaahi ngāue fakalaumālié, te tau ʻohovale nai. ʻOku tau fakamoleki ha houa lahi ʻi he ngāue ʻovataimí kae ʻikai fakakaukau ki he ngāue toputapú koeʻuhí pē ko ha taumuʻa ke tuʻumālie? Kuo tuʻo fiha ʻetau liʻaki ʻa e ngaahi fakatahá pe ngāue fakafaifekaú koeʻuhí ko ha mālōlō ʻeveʻeva ʻi he fakaʻosinga ʻo e uiké?
3 Fokotuʻu ʻa e Ngaahi Meʻa Muʻomuʻá: Ko e tokolahi taha ʻo kitautolú ʻoku ʻikai ke tau maʻu ha taimi feʻunga ke fai ai ʻa e meʻa ʻoku tau saiʻia ke faí. Ko ia, ke fakamuʻomuʻa ʻa e ngaahi meʻa ʻo e Puleʻangá, ʻoku fiemaʻu ke tau fakamahuʻingaʻi ʻetau ngaahi meʻa muʻomuʻá pea fakataimitēpileʻi leva ʻa e taimi ki he “ngaahi meʻa ʻoku lelei lahi.” (Fili. 1:10) ʻOku kau ki ai ʻa e ako ʻo e Folofola ʻa e ʻOtuá, kau ki he ngāue fakafaifekaú, tokanga ki hoto fāmilí pea maʻu mo e ngaahi fakataha faka-Kalisitiané. (Sāme 1:1, 2; Loma 10:13, 14; 1 Tim. 5:8; Hep. 10:24, 25) Ko e ngaahi ngāue kehé, hangē ko e fakamālohisino feʻungá mo e fakafiefia leleí ʻoku ʻaonga. (Mk. 6:31; 1 Tim. 4:8) Ka ko e ngaahi meʻa ko ʻeni ʻoku ʻikai ke fuʻu mahuʻingá kuo pau ke ʻi hono tuʻunga totonú pē.
4 Naʻe feinga ha tokoua kei talavou ke fakamuʻomuʻa ʻa e ngaahi meʻa ʻo e Puleʻangá ʻaki ʻene kau ki he ngāue fakafaifekau taimi-kakató kae ʻikai ko e tuli ki ha ako māʻolunga ange ʻi he teuteu atu ki ha ngāue fakamāmani. Naʻá ne ako ha lea foʻou peá ne hiki ʻo ngāue ʻi he feituʻu naʻe lahi ange ai ʻa e fiemaʻú. Naʻá ne pehē: “ʻOku ou maʻu ha taimi lelei heni. ʻOku fakafiefia ʻaupito ʻa e ngāue fakafaifekaú! ʻOku ou fakaʻamu pē ʻe fai ʻe he toʻutupu kotoa pē ʻa e meʻa hangē ko ʻení pea maʻu mo e fiefia ʻoku ou hokosiá. ʻOku ʻikai ha toe meʻa ʻe lelei ange ka ko e tauhi kia Sihova ʻaki ʻa e meʻa kotoa ʻoku tau maʻú.” ʻIo, ko hono fakamuʻomuʻa ʻa e Puleʻangá ʻoku fakapaleʻi ai kitautolu, ka ko e toe mahuʻinga angé, ʻoku fakahōifuaʻi ai ʻa ʻetau Tamai fakahēvaní, ʻa Sihova.—Hep. 6:10.