Founga ʻo e Lamalama ke Ngāueʻaki ʻa e Faingamālié

¹ Ko hono lahi ʻo e meʻa ke fai ʻi he ngāue ʻa Sihová ʻoku ʻai ai kitautolu ke femoʻuekina! (1 Kol. 15:58) ʻOku tau ʻiloʻi ʻa e fiemaʻu ke ako fakafoʻituituí pea mo e fakafāmilí, ke lau fakaʻaho ʻa e Tohitapú, ke teuteu pea mo kau ki he ngaahi fakataha ʻa e fakatahaʻangá, pea ke kau maʻu pē ʻi he ngāue fakamalangá. Ko e kau ʻovasiá ʻoku nau maʻu ʻa e ngaahi fatongia fakatauhisipi, pea ʻoku nau tokanga ki he ngaahi fatongia kehe ʻi he fakatahaʻangá. ʻOku maʻu ʻe he niʻihi ʻa e ngaahi fatongia fakafāmili mafatukituki pe ko ha ngaahi ngafa kehekehe ki he niʻihi kehé. Ke fai fakalelei ʻa e meʻa kotoa pē, ʻoku fiemaʻu ki he tokotaha kotoa pē ʻa e mafamafatatau pea mo e fokotuʻutuʻu maau fakafoʻituitui lelei.

² Fokotuʻu ha Ngaahi Taumuʻa: Ko e lavameʻa ʻi he ‘lamalama ke ngaueʻaki ʻa e taimi faingamalié kiate kitautolú’ ʻoku fakatuʻunga ia ʻi heʻetau ʻiloʻiló mo e fakakaukau leleí. (ʻEf. 5:​15, 16) Kuo pau ke tau fakapapauʻi pe ko e hā “ʻa e ngaahi meʻa ʻoku lelei lahi” pea ʻai kinautolu ke taupotu ʻi heʻetau lisi ʻo e ngaahi meʻa muʻomuʻá. (Fili. 1:​10) Naʻe fakamatalaʻi ʻe ha ongo meʻa mali ʻa e tuʻunga fakateokalati hona falé ʻi he founga ko ʻení: “ʻOkú ma fakafonuʻaki ʻema moʻuí ʻa e moʻoní . . . ʻOku ʻikai ko e konga ʻo ʻema moʻuí ʻa e moʻoní, ka ko ʻema moʻuí ia. ʻOku toki tānaki mai ki ai ʻa e ngaahi meʻa kehé kotoa.” ʻOku fiemaʻu ke fakamuʻomuʻa ʻa e lotu mo e ngāue kia Sihová ʻi he moʻui ʻa ha taha.

³ ʻIlo ʻa e Ngaahi Meʻa Fakamole Taimí: ʻOku ʻi ai ʻa e houa ʻe 168 ʻi he uiké, pea ʻoku fiemaʻu ke tau ngāueʻaki fakapotopoto ʻa hotau taimi ʻoku ala maʻú. Ke maʻu ha taimi feʻunga ki he ngaahi ngāue fakateokalatí, ʻoku fiemaʻu ke tau ʻilo fakapapau pea fakasiʻisiʻi ʻa e fakamoleki ʻo e taimí. Naʻe fakahā ʻe he savea ʻe taha ko e ʻavalisi ʻo e kakai lahi ʻi he ʻIunaite Seteté ʻoku nau fakamoleki ʻo laka hake ʻi he houa ʻe 30 ʻi he uike ʻi he mamata TV! Ki ha niʻihi kehe, ʻoku fakamoleki ʻa e taimi lahi ʻi he lau ʻo e ngaahi tohi fakamāmaní. ʻOku fakatokangaʻi nai ʻe ha niʻihi ʻoku nau līʻoa ʻa e ngaahi taimi taʻefakangatangata ki he ngaahi ngāue fakasōsialé, ngaahi vaʻingá, fakafiefiá, pe ki ha faʻahinga ngāue fakakomipiuta kehe. ʻOku fiemaʻu nai ke tau sivisiviʻi ʻetau taimi-tēpile fakaʻahó ke sio ai ki he founga ʻe lava ke tau ngāueʻaki lelei ange hotau taimí. ʻOku fiemaʻu ʻa e potó ka tau fokotuʻu ha fakangatangata ki he lahi ʻo e taimi ʻoku tau fakaʻatā ki he ngaahi ngāue ʻoku ʻikai ke fiemaʻú.

⁴ Fakatupulekina ha Taimi-Tēpile Lelei: Pe ko e hā pē hotau ngaahi tuʻunga fakafoʻituituí, ko kitautolu taki taha ʻe lava ke tau lamalama ha taimi ke tuli ai ki he ngaahi meʻa fakalaumālié. Ko e niʻihi kuo nau ʻiloʻi ko e kamata pongipongia ange ʻi he ʻaho taki taha ʻoku tokoni ia kiate kinautolu ke fakahoko ha meʻa lahi ange. Kapau ʻoku tau fakamoleki ha taimi lahi ʻi he fononga ki he ngāué pe tatali ki he niʻihi kehé, te tau ngāueʻaki nai ha niʻihi ʻo e taimi ko iá ke lau Tohitapu, teuteu ki he ngaahi fakatahá, pe fanongo ki he fakamatala ʻoku ʻomai ʻe he Sōsaietí ʻi he ngaahi kāseté. ʻE maʻu ʻe he ngaahi fāmilí ʻa e ʻaonga lahi ʻi hono vaheʻi ha taimi tuʻumaʻu mo pau ke ako fakataha ai. Kapau ko e mēmipa taki taha ʻi he fāmilí ʻoku nau vave mai ki he ako fakafāmilí, ʻe maʻu ai ʻa e ʻaonga ʻe he tokotaha kotoa pē ʻi he ʻikai mole noa ʻa e taimí.

⁵ ʻI he hili atu ʻa e ʻaho taki taha, ʻoku totonu ke tau hoko ʻo tokanga fakamātoato lahi ange he ʻoku “fakanounou ʻa e kuonga.” (1 Kol. 7:​29) Ko ʻetau moʻuí ʻoku fakatuʻunga ia ʻi he founga ʻo ʻetau ngāueʻaki ʻa e taimi mahuʻinga ʻoku toé. ʻE tāpuakiʻi kitautolu kapau ʻoku tau lamalama ke ngāueʻaki ʻa e taimi faingamālié koeʻuhi ke tau lava ai ʻo ʻai ke muʻomuʻa ʻa e ngaahi meʻa mahuʻinga ʻo e Puleʻangá!​—Mt. 6:​33.