ʻOkú Ke Fakahoko Fakaʻāuliliki Hoʻo Ngāue Fakafaifekaú?
1 ʻI he tohi ʻa Ngāué, ʻoku tala mai ai kiate kitautolu naʻe fakahoko ʻe he kau ākonga ʻa Sīsuú ʻenau ngāue fakafaifekaú ʻaki hono fai ha “fakamoʻoni fakaʻāuliliki” ki he kakaí. (Ng. 2:40, NW; 8:25; 28:23) Ko e taumuʻa tofu pē ia ʻa e ʻapositolo ko Paulá. (Ng. 20:24) ʻIkai ko hoʻo taumuʻá ia ʻi he tuʻunga ko ha faifekau ʻo e ongoongo leleí? ʻE lava fēfē ke ke fakahoko ʻeni?
2 Teuteu Hoʻo Tuʻuakí: Ke fakapapauʻi ʻokú ke fai ha fakamoʻoni lelei ʻi he ngāue fakafaifekaú, ʻoku mahuʻinga ʻa e teuteú. ʻOku tautefito ʻene moʻoni ʻení ʻi he taimi ʻoku tuʻuaki atu ai ʻa e ngaahi makasiní, koeʻuhi ʻoku toutou liliu maʻu pē ʻa e kaveingá. Ke tokoni ki hono teuteuʻi lelei ange kitautolú, ʻoku ʻomai ai ʻe he ʻīsiu ko ʻeni ʻo ʻEtau Ngāue Fakafaifekau ʻo e Puleʻanga ha tafaʻaki foʻou—ko e kōlomu ʻi he toʻohemá, ʻa ia ʻoku fakahokohoko ai ʻa e ngaahi sīpinga tuʻuaki ki he ngaahi makasini Taua Leʻo mo e ʻĀ Hake! Ko ha kaveinga taimi-totonu te ne tohoakiʻi ha kakai tokolahi ʻe fakaeʻa ia ʻi he ʻīsiu taki taha. ʻE anga-fēfē nai haʻo fakatupulekina ʻa e ngaahi tuʻuaki nounou ko ení?
3 Fili ha fokotuʻu ʻokú ke ongoʻi ʻe ola lelei taha ʻi ho feituʻu ngāué. Lau fakalelei ʻa e kupu ʻoku ʻomaí, pea fakatokangaʻi ʻa e ngaahi poini pau ʻoku ngalingali te ne langaʻi ʻa e mahuʻingaʻiá. Kumi ha konga Tohitapu ʻoku lave ki ai ʻi he makasiní ʻa ē ʻoku feʻungamālie mo e fakamatalá pea ʻe malava nai ke ke lau ki he tokotaha-ʻapí. Tānaki atu ki ai ha fakamulituku nounou ke fakalototoʻaʻi ʻa e tokotaha fanongó ke ne lau ʻa e makasiní pea mo ha fakamatala nounou, kapau ʻoku feʻungamālie ʻa ia ʻe fai nai ai ʻe he tokotaha-ʻapí ha tokoni ki he ngāue ʻa e Kau Fakamoʻoni ʻa Sihová ʻi māmani lahí. ʻAhiʻahiʻi leva hoʻo tuʻuakí.
4 Palani ke Ngāueʻaki ʻa e Tohitapú: ʻI ha teuteu lelei, ʻe lava ke fakakau maʻu pē ha konga Tohitapu ʻi hoʻo tuʻuakí. Ko e fakatātaá, ʻoku maʻu ʻe he kau malanga taukei ʻi he ngaahi feituʻu lahi ʻa e lavameʻá ʻi heʻenau toʻotoʻo atu ʻa e Tohitapú ki he matapaá, ʻo fakafeʻiloaki ki he tokotaha-ʻapí, pea pehē:
◼ “ʻOku mau ʻeke ki he kakaí pe ʻoku nau tui ki he meʻá ni . . . ” Lau ʻa e Senesi 1:1, pea ʻeke ange leva: “ʻOkú ke loto-tatau mo e fakamatala ko iá?” Kapau ʻoku loto ki ai ʻa e tokotahá, tala ange leva: “ʻOku pehē pē mo au. Kae kehe, ʻokú ke fakakaukau kapau ko e ʻOtuá naʻá ne fakatupu ʻa e meʻa kotoa pē, ʻokú ne toe kaunga ki he tuʻunga fulikivanú?” ʻI he hili ʻa hono fakamālōʻiaʻi ʻa e tali ʻa e tokotahá, lau ʻa e Koheleti 7:29. Fakaava ʻa e tohi ʻIlo ki he peesi 71, pea lau ʻa e palakalafi 2. Fakalototoʻaʻi ʻa e tokotahá ke ne lau ʻa e tohí.
5 Toe Foki ki he Mahuʻingaʻia Kotoa Pē: ʻE ʻikai lava ke ke fakahoko kakato hoʻo ngāue fakafaifekaú kapau ʻoku ʻikai te ke toe foki ki he mahuʻingaʻia naʻe maʻú. ʻI he taimi ʻokú ke fai ai ha fetalanoaʻaki lelei, tatau ai pē pe ʻokú ke tuku ha ngaahi makasini pe tohi kehe, hikiʻi ʻa e hingoa mo e tuʻasila ʻo e tokotahá. Feinga tōtōivi ke fakatupulekina ʻa e mahuʻingaʻia ʻa e tokotahá ʻaki hono fai vave ha toe foki. Ko hono moʻoní, tuʻuaki ha ako Tohitapu.
6 Naʻe ʻilo ʻe he kau ākonga ʻo e ʻuluaki senitulí naʻe fekauʻi kinautolu ʻe Sīsū ke “fai ha fakamoʻoni fakaʻāuliliki.” (Ng. 10:42, NW) ʻOku kaunga kiate kitautolu ʻa e fekau tatau tofu pē ko iá, he ko e founga pē ia ʻe taha te tau malava ai ke ngaohi-ākongá. (Mt. 28:19, 20) Tau fai ʻetau lelei tahá ke fakahoko fakaʻāuliliki ʻetau ngāue fakafaifekaú.—2 Tim. 4:5.