Founga ke Teuteu Ai ha Tuʻuaki Makasini
1. Ko e hā ʻoku lelei ange ai ke teuteu haʻate tuʻuaki makasini kae ʻikai ko hono ako maʻuloto pē ha sīpinga tuʻuaki ʻoku ʻomai ʻi he ʻEtau Ngāue Fakafaifekau ʻo e Puleʻanga?
1 Te ke fifili nai, ‘Ko e hā ke tau toe teuteu ai ha ngaahi tuʻuaki makasini, he ʻoku ʻasi pē ia ʻi he ʻīsiu taki taha ʻo ʻEtau Ngāue Fakafaifekau ʻo e Puleʻanga?’ Neongo ʻoku tokoni ki he tokolahi ʻa e ngaahi sīpinga tuʻuaki ko ʻení, ʻoku kei fiemaʻu pē ʻa e teuteu fakafoʻituituí. ʻE ola lelei ha tuʻuaki ʻe taha ʻi ha feituʻu ʻe taha ka ʻe ʻikai ke ola lelei nai ia ʻi ha feituʻu kehe. Ko ia ai, ʻoku ʻikai ko ha meʻa pau ia ke tau tuʻuaki ʻa e ngaahi makasiní ʻo fakatatau pē ki hono fakalea ʻoku ʻomai ʻi he ngaahi sīpinga tuʻuakí. Neongo kapau te tau fili ke ngāueʻaki ha sīpinga tuʻuaki ʻoku ʻomai, ʻoku lelei tahá ke tau fakamatalaʻi ʻa e ngaahi fakakaukaú ʻi heʻetau lea pē ʻa kitautolu.
2. Ko e hā ʻoku kau ki hono fakapapauʻi ʻa e kupu te ke fakaʻaliʻalí?
2 Fili ha Kupu: ʻI hano ʻuluaki lau ʻa e makasiní, fili ha kupu ʻoku feʻungamālie ki ho feituʻú pea ʻoku fakamānako kia koé. Ko hoʻo tuipau mo loto-māfana ʻi hono fakaʻaliʻali ʻa e kupú ʻe ueʻi nai ai ʻa e tokotaha-ʻapí ke ne fie lau ia. Neongo te ke fakaʻaliʻali nai ha kupu ʻe fakamānako ki he kakai tokolahi taha ʻi he feituʻu fakalotofonuá, ʻai ke ke toe ʻiloʻi lelei ʻa e ngaahi kupu kehe ʻi he makasiní. ʻE lava ai heni ke ke feliliuaki hoʻo tuʻuakí kapau te ke fetaulaki mo ha taha ʻoku mahuʻingaʻia ange nai ia ʻi ha kaveinga kehe.
3. Ko e hā ʻa e faʻahinga lea kamata te ke ngāueʻaki ʻe maʻu ai ha ola lelei?
3 ʻEke ha Fehuʻi: Ko hono hokó, teuteu fakalelei hoʻo lea kamatá. ʻOku mahuʻinga ʻa hoʻo lea kamatá. ʻE ʻaonga nai ke ʻeke ha fehuʻi fakatupunga fakakaukau ki he tokotaha-ʻapí ke langaʻi ʻa ʻene mahuʻingaʻia ʻi he kupu kuó ke fili ke fakaʻaliʻalí. ʻOku faʻa ola lelei ange ʻa e ngaahi fehuʻi ke ʻiloʻi ai ʻene fakakaukaú. Fakaʻehiʻehi mei hano ʻeke ha fehuʻi ʻe ʻai nai ai ke ongoʻi mā ʻa e tokotaha-ʻapí pe fakatupunga fakakikihi.
4. Ko e hā ʻa e ngaahi ʻaonga ʻo hono lau ki he tokotaha-ʻapí ha konga Tohi Tapu kapau ʻoku faingamālie?
4 Lau ha Konga Tohi Tapu: Ko hono fakaʻosí, fili ha konga Tohi Tapu ke ke lau kapau ʻoku faingamālie ʻa e tokotaha-ʻapí, ko ha konga Tohi Tapu nai ʻoku ʻasi ʻi he kupu te ke fakaʻaliʻalí. Ko hono lau ha konga Tohi Tapu ʻe lava ke sio ai ʻa e tokotaha-ʻapí ko ʻetau pōpoakí ʻoku maʻu ʻi he Folofola ʻa e ʻOtuá. (1 Tes. 2:13) ʻE toe ʻoatu ʻe he konga Tohi Tapú ha fakamoʻoni kiate ia neongo kapau heʻikai te ne tali ʻa e makasiní. ʻOku faʻa langaʻi ʻe he niʻihi ʻa e mahuʻingaʻia ʻa e tokotaha-ʻapí ʻaki hono lau ha konga Tohi Tapu ki muʻa ke ʻeke ha fehuʻi pau. Te ke kamataʻaki nai ʻa hoʻo pehē, “ʻOku ou fie ʻilo ki he anga hoʻo fakakaukau ki he meʻa ʻoku hā ʻi he veesi Tohi Tapu ko ʻení.” Hili iá te ke taki leva ʻa e tokanga ʻa e tokotahá ki ha poini feʻungamālie ʻi he makasiní pea fai ha fakamatala nounou ke toe langaʻi lahi ange ai ʻa ʻene mahuʻingaʻiá ki muʻa peá ke toki ʻoange ia.
5. Ko e hā ʻa e ngaahi fakahinohino tefito ʻoku totonu ke ke manatuʻi ʻi hoʻo teuteu ha tuʻuaki makasini?
5 ʻOku ʻikai ha lao fefeka fekauʻaki mo e meʻa ke leaʻaki ʻi hono tuʻuaki ʻa e ngaahi makasiní. Ko hono fakalūkufuá, ʻoku lelei tahá ke tauhi ke mahinongofua mo nounou ʻa hoʻo tuʻuakí. Ngāueʻaki ha tuʻuaki ʻokú ke ongoʻi fiemālie aí pea ʻoku maʻu ai ha ola leleí. Hangataha ki he mahuʻinga ʻo e makasiní, pea loto-māfana. Kapau te ke mateuteu lelei, ʻe ola lelei ange ai ʻa hoʻo tufaki ʻa e Taua Leʻo mo e ʻĀ Hake! ki he faʻahinga ʻoku “hehema totonu ki he moʻui taʻengatá.”—Ng. 13:48, NW.