ʻOkú Ke Ngāueʻaki ʻa e Meʻa Naʻá Ke Ako ʻi he Fakataha-Lahi Fakavahe “Kau Faiako ʻo e Folofola ʻa e ʻOtuá”?
1 Ko ha taha pē naʻá ne maʻu ʻa e fakataha-lahi fakavahe ʻi he taʻu ní ʻoku malava ke ne sio ʻoku tokanga taha ʻa e kakai ʻa Sihová ki hono fakahoko honau ngafa ko e kau faiako ʻo e Folofola ʻa e ʻOtuá. (Mt. 28:19, 20) ʻI hoʻo foki ki ʻapí, ko e hā ha ngaahi poini pau ʻi he fakahinohinó naʻá ke fakapapauʻi ke ngāueʻaki ʻi hoʻo moʻuí tonu pea ʻi he ngāue fakamalangá?
2 Ko e Ngaahi Konga Tohitapu Fakamānavaʻí ʻOku ʻAonga Ia ki he Akonaki: Naʻe fakaeʻa ʻe he kaveinga ʻo e ʻuluaki ʻahó ʻa e 2 Timote 3:16. Naʻe fakahaaʻi ʻe he malanga he tefitoʻi fakakaukaú, ke hoko ʻo “Mateuteu Kakato ʻi he Tuʻunga ko e Kau Faiako ʻo e Folofola ʻa e ʻOtuá,” kuo pau ke tau fakamahuʻingaʻi māʻolunga ʻa e Folofola ʻa e ʻOtuá, ʻapasia ki ai ʻo māʻolunga ange ia ʻi ha faʻahinga fakakaukau fakaetangata pe talatukufakaholo pea ngāueʻaki tuʻumaʻu ia. Kuo pau foki ke tau lotu fakaʻaho ki he laumālie māʻoniʻoní ke ne tokoniʻi kitautolu ʻi heʻetau ngāue fakafaifekaú pea ngāue ke fakatupulekina ʻa hono fua tuʻu-ki-muʻa—ko e ʻofá. Pea kuo pau ke tau fakaʻatā ʻa e kautaha fakamāmani ʻa Sihová ke ne akoʻi kitautolu ʻi hotau tuʻunga ko e kau faifekaú ʻo fakafou ʻi he ngaahi fakataha kotoa ʻa e fakatahaʻangá.
3 Ko e malanga fakakongokonga he Falaité, “Akoʻi Kitautolu Lolotonga ʻEtau Akoʻi ʻa e Niʻihi Kehé,” naʻe fakamatalaʻi ai ʻo pehē kuo pau ke tau hoko ʻo alafaʻifaʻitakiʻanga ʻi he (1) pipiki ki he ngaahi lao ʻa e ʻOtuá ʻi he tafaʻaki kotoa ʻo e ʻulungaanga lelei faka-Kalisitiané, (2) tauhi maʻu ha tōʻonga ako tōtōivi pea (3) toʻo atu ʻa e ngaahi fakakaukau mo e ngaahi tuʻunga ʻo e lotó mo e ʻatamaí ʻa ē ʻe lava ke ngāueʻaki ʻe he Tēvoló. Ko hono hokó, naʻa tau ako ai ʻa e ngaahi founga ʻaonga ke maluʻiʻaki hotau ngaahi fāmilí mei he kovi fakamāmani ʻo e fakatātā fakalieliá. Naʻe fakaʻaiʻai ʻa e ngaahi mātuʻá ke nau fokotuʻu ʻa e faʻifaʻitakiʻanga ʻi he fakaʻehiʻehi naʻa mo ha kiʻi hila pē ki ha konga fakaefehokotaki fakasino pea ke nau tokangaʻi ʻa hono ngāueʻaki ʻe he fānaú ʻa e ʻInitanetí mo e mamata televīsoné. Ko fē ʻa e ngaahi poini mei he polokalama ʻo e ʻaho Falaité kuó ke kamata ke ngāueʻakí?
4 Ko e malanga fakaʻosi ʻo e ʻahó naʻá ne fakalahi ʻa ʻetau fakapapau ke koloaʻaki ʻa e maama ʻa Sihová, ke nofo ofi ki he kalasi pani loto-tōnunga ʻa e ʻOtuá pea ke tokoni ki he tupu ʻa e melino ʻo e kakai ʻa Sihová. Kuó ke ʻosi lau ʻa e tohi foʻou naʻe tukuange maí, ʻa e Isaiah’s Prophecy—Light for All Mankind II?
5 Taau Feʻunga ke Akoʻi ʻa e Niʻihi Kehé: Ko e konga tohi ʻo e kaveinga ki he ʻaho hono uá ko e 2 Timote 2:2. ʻI hoʻo fanongo ki he malanga fakakongokonga ʻo e pongipongi Tokonakí, naʻá ke fakatokangaʻi ʻa e ngaahi fokotuʻu ʻi he founga ke (1) kumi ai ʻa e faʻahinga tāú, (2) fakatupulekina ʻenau mahuʻingaʻiá pea (3) akoʻi kinautolu ke tauhi ʻa e meʻa kotoa naʻe fekauʻi ʻe Kalaisí? ʻOkú ke ngāueʻaki ʻa e meʻa naʻá ke akó—ke fakahā ki he faʻahinga ʻi he ngaahi ʻapí naʻa mo ha poini pē ʻe taha mei he ngaahi Konga Tohitapú pea ke fakatoka ha makatuʻunga ki ha toe ʻaʻahi atu ʻi he kahaʻú?
6 Naʻe fakamamafaʻi ʻe he polokalama efiafí ʻa e mahuʻinga ʻo e faʻifaʻitaki ki he Faiako Lahí, ʻa Sīsū. Ko e hā ʻa e ngaahi founga ʻokú ke feinga ai ke hoko lahi ange ʻo hangē ko iá? Mei he meʻa naʻá ke ako ʻi he malanga fakakongokonga hono ua ʻo e ʻahó, ʻoku anga-fēfē hoʻo ongoʻi te ke malava ke “Maʻu ʻa e ʻAonga Kakato Ange mei he Ako Fakateokalatí”? Ko e hā ha ngaahi fokotuʻu naʻá ke ngāueʻaki ke fakalahi ai ʻa hoʻo taimi tokanga he lolotonga ʻo e ako fakafoʻituituí mo e ngaahi fakataha ʻa e fakatahaʻangá?
7 ʻOku ʻikai ha veiveiua, ko e tokonaki hoko mai ko ia ko e Benefit From Theocratic Ministry School Education te ne tokoniʻi kitautolu ke tupulekina ʻetau malavá ʻi he tuʻunga ko e kau malanga mo e kau faiako ʻo e Folofola ʻa e ʻOtuá. ʻE fai ha tokanga lahi ange ki he ngaahi anga ʻo e lea ʻa ia naʻá ne fakaʻilongaʻi ʻa e kau sevāniti loto-tōnunga ʻa e ʻOtuá ʻi he ngaahi taimi ʻo e Tohitapú. ʻI he lēsoni taki taha ʻo e tohi ako foʻoú ʻoku ʻi ai ha ngaahi puha ʻoku fakahā fakanounou ai ʻa e meʻa ʻoku tau fiemaʻu ke faí, ʻuhinga ʻoku mahuʻinga aí pea mo e founga ke fai ai iá. ʻOku fakakau ki ai ʻa e ngaahi ngāue ʻaonga ke fai. ʻE ʻi ai ʻa e ngaahi fokotuʻutuʻu ʻe 29 ke fili mei ai ʻa e fanga tuofāfiné ʻi he taimi te nau fakahoko ai ʻenau ngaahi kongá. ʻI he faai atu ʻa e taimí, ko e ngaahi liliu naʻe fanongonongo atú ʻe fakahaaʻi ia ʻi he fokotuʻutuʻu ʻo e akó. ʻOku ʻi ai haʻo founga-tuʻumaʻu lelei ki he akó mo e teuteú koeʻuhi ke ke maʻu ʻa e ʻaonga kakato mei he Ako Fakafaifekau Fakateokalatí ʻi he uike taki taha?
8 Hoko ko e Kau Faiako ʻi he Vakai Atu ki he Taimí: Naʻe teuteuʻi ʻe he Hepelu 5:12 ʻa e ʻatamai ʻo e kau fanongó ki he Sāpaté. Ko e malanga fakakongokonga ʻo e pongipongí, “ʻOku Teuʻi Kitautolu ʻe he Kikite ʻa Malakaí ki he ʻAho ʻo Sihová,” naʻe fakaʻaiʻai ai kitautolu ke tau ʻoatu ki he ʻOtuá ʻa hotau lelei tahá pea ke fehiʻa ki he ngaahi ʻalunga kotoa ʻo e kākaá koeʻuhí ka tau lava ʻo hao ʻi he ʻaho lahi mo fakamanavahē ʻo Sihová. Ko e tulamá, “ʻApasia ki he Tuʻunga Mafai ʻo Sihová,” naʻe fakahaaʻi mālohi ai ʻa e founga naʻe iku ai ʻa e pōlepole, fieongoongoa, meheka mo e mateaki hala ʻa Kola mo hono kaungāfeohi ʻi he kuonga muʻá ki he ngaahi tōʻonga angatuʻu fakahangatonu kia Sihova tonu. Naʻe fakahanga ʻa e malanga hono hokó ki he fiemaʻu ʻi onopooni ke ʻapasia ki he mafai fakaʻotua ʻi he lotoʻi fāmilí pea mo e fakatahaʻangá. Ko e malanga maʻá e kakaí, “Ko Hai ʻOku Nau Akoʻi ki he Ngaahi Puleʻanga Kotoa Pē ʻa e Moʻoní?,” naʻá ne ʻomai ʻa e fakamoʻoni ko e Kau Fakamoʻoni ʻa Sihová ʻoku nau fai iá, ʻo kehe mei he Puleʻanga-Haʻa-Kalisitiane, ʻa ia ʻoku nau taku pē ʻoku nau akoʻi ʻa e moʻoni ʻo e Tohitapú.
9 ʻOku hā mahino, ʻoku akoʻi kitautolu ʻe Sihova ke tau hoko ko e kau faiako lelei ange ʻo ʻene Folofolá. ʻAi ke tau ngāueʻaki ʻa e meʻa kuo tau akó, ʻo ‘lamalama kiate kitautolu mo e meʻa ʻoku tau akoʻakí: koeʻuhi ke tau fakamoʻui kitautolu mo kinautolu foki ʻoku fanongo kiate kitautolú.’—1 Tim. 4:16.