Tofa Totonu ʻa e Folofola ʻa e ʻOtuá
1 ʻI he faifakamoʻoni ki ha ʻōfisa, “naʻe lea ai ʻa Filipe, ʻo kamata ʻaki ha konga Tohitapu [pau], ʻo ne fanongonongo kiate ia ʻa e ongoongo lelei fekauʻaki mo Sīsuú.” (Ng. 8:35, NW) Naʻe “tofa totonu [ʻe Filipe] ʻa e folofola ʻo e moʻoni.” (2 Tim. 2:15) Kae kehe, ʻi he ʻahó ni, kuo fakatokangaʻi ʻe he kau ʻovasia fefonongaʻakí ha kau malanga tokolahi ʻoku tātātaha ʻa ʻenau ngāueʻaki ʻa e Tohitapú ʻi he faifakamoʻoní. ʻOkú ke ngāueʻaki ʻa e Tohitapú ʻi hoʻo ngāue fakafaifekaú?
2 Ko e Folofola ʻa e ʻOtuá ʻa e matavai ʻo e meʻa kotoa pē ʻoku tau tui ki aí mo akoʻí. (2 Tim. 3:16, 17) Ko e meʻa ia ʻokú ne tohoakiʻi ʻa e kakaí kia Sihová pea akoʻi kinautolu ki he moʻuí. Ko e ʻuhinga ia ʻoku mahuʻinga ai ke tau ngāueʻaki ʻa e Tohitapú ʻi heʻetau ngāue fakafaifekaú kae ʻikai ko e talanoa pē fekauʻaki mo ha ngaahi kaveinga ʻoku tau mahuʻingaʻia aí. (Hep. 4:12) Koeʻuhi ko e tokolahi taha ʻo e kakaí ʻoku nau ʻilo siʻisiʻi fekauʻaki mo e Tohitapú, ʻoku fiemaʻu ke tau lau mei ai ʻo fakahaaʻi ange kiate kinautolu ʻa e fakahinohino ʻaonga ʻoku ʻomai aí pea mo e kahaʻu ʻokú ne tuku tauhi mai maʻá e faʻahinga ʻo e tangatá.
3 Lau Hangatonu mei he Tohitapú: Te ke ʻahiʻahi nai ke ʻalu he ngāue fakamalangá ʻo taʻeʻiai ha kato tohi. ʻE lava ke ke faʻo ha ngaahi tohi kehekehe ʻokú ke loto ke tuʻuakí ʻi ha kiʻi kato pea toʻotoʻo ʻa e Tohitapú ʻi ho nimá pe faʻo ʻi he kato ho valá. ʻI he taimi leva ʻokú ke fetalanoaʻaki ai mo ha taha, ʻe lava ke ke toʻo hake ʻa e Tohitapú ʻo ʻikai ke ʻai ai ʻa e tokotahá ke ne ongoʻi ʻokú ke teu ke fai ha malanga. ʻAi hoʻo tuʻú ke ʻi ha tuʻunga ʻe lava ai ʻa hoʻo tokotaha fanongó ke muimui fakataha ʻi hoʻo Tohitapú. Te ke kole ange nai kiate ia ke ne lau leʻo-lahi ha veesi. Ko ha maongo loloto ange ē ʻe hokó ʻi he taimi ʻoku lava ai ke ne sio ki he meʻa ʻoku leaʻaki ʻe he Tohitapú kae ʻikai ko ʻene fanongo pē ki aí meiate koe. Ko ia ai, ke tokoniʻi ia ke ne mahinoʻi ʻa e poini ʻi he konga tohí, fakamamafaʻi ʻa e ngaahi foʻi lea fakahoko-fakakaukaú.
4 Ko ha Tuʻuaki Konga Tohitapu ʻe Taha: ʻI he hili ʻa hono fakafeʻiloaki koé, te ke pehē nai: “ʻOku hanga ʻa e kakaí ki he ngaahi matavai kehekehe ki ha fakahinohino ki heʻenau moʻuí. Ko e hā ʻokú ke fakakaukau atu ko e matavai lelei taha ia ʻo e tataki ʻaongá? [Tuku ke ne tali.] Ko e hā hoʻo fakakaukau fekauʻaki mo e fakamatala ko ʻení? [Lau ʻa e Palovepi 2:6, 7, pea tuku ke ne tali.] Kuo fakamoʻoniʻi ʻa e ʻikai siaʻa ʻa e poto fakaetangatá, ʻo taki atu ai ʻa e kakai tokolahi ki he ʻamanaki-tōnoá. Ka, kuo fakamoʻoniʻi maʻu pē ʻa e poto ʻo e ʻOtuá ʻoku alafalalaʻanga mo ʻaonga.” Fakahā ange leva ʻa e tohi ʻokú ke tuʻuakí, pea fakamatalaʻi mei ai ha fakatātā ʻe taha ʻo e ʻaonga ʻo e poto ʻo e ʻOtuá.
5 Naʻe ngāueʻaki ʻe Sīsū ʻa e ngaahi Konga Tohitapú ke tokoniʻiʻaki ʻa e faʻahinga loto-totonú. (Luke 24:32) Naʻe fakamoʻoniʻi Fakatohitapu ʻe Paula ʻa e ngaahi meʻa naʻá ne akoʻí. (Ng. 17:2, 3) ʻE tupulaki ʻetau tuipau mo e fiefia ʻi he ngāue fakafaifekaú ʻi heʻetau hoko ʻo pōtoʻi ange ʻi hono tofa totonu ʻa e Folofola ʻa e ʻOtuá.